ବରଗଡ଼ ଅଫିସ୍,(ପ୍ରେମାନନ୍ଦ ଖମାରୀ)୨।୧୨: ପଦ୍ମପୁର ଉପନିର୍ବାଚନ ୩ ପ୍ରମୁଖ ଦଳ ବିଜେଡ଼ି, ଭାଜପା, କଂଗ୍ରେସ ପାଇଁ ଗୁରୁତ୍ୱ ବହନ କରୁଛି। ଉକ୍ତ ନିର୍ବାଚନ ମଣ୍ଡଳୀରେ ପୁରୁଖା ଓ ପ୍ରବୀଣ ନେତାଙ୍କ ମଧ୍ୟରେ ପ୍ରତିଦ୍ୱନ୍ଦିତା ହେଉଥିଲା। କିନ୍ତୁ ଚଳିତ ଉପନିର୍ବାଚନରେ ସେଥିରେ ବ୍ୟତିକ୍ରମ ଦେଖାଯାଇଛି। କଂଗ୍ରେସ ଏବଂ ଭାଜପାର ୨ ପୁରୁଖା ତଥା ପ୍ରବୀଣ ନେତାଙ୍କ ସହିତ ବିଜେଡ଼ିର ତରୁଣ ତଥା ନବାଗତାଙ୍କ ଲଢ଼େଇ ଚାଲିଛି। ସାମ୍ପ୍ରତିକ ସ୍ଥିତିକୁ ଦେଖିଲେ ଏଠାରେ କିଏ ବିଜୟ ମୁକୁଟ ପିନ୍ଧିବ, ତାହା ଆକଳନ କରିବା ସହଜ ହେଉନାହିଁ। କିନ୍ତୁ ଏଠାରେ ପ୍ରଥମଥର ପାଇଁ ପ୍ରବୀଣ ଓ ତରୁଣଙ୍କ ମଧ୍ୟରେ ଲଢ଼େଇ ଚାଲିଛି, ଏହାକୁ କେହି ଅସ୍ବୀକାର କରିପାରିବେନାହିଁ ।
ପଦ୍ମପୁର ଉପନିର୍ବାଚନରେ ଏଥର ୧୦ ପ୍ରାର୍ଥୀ ନିର୍ବାଚନ ମଇଦାନକୁ ଓହ୍ଲାଇଛନ୍ତି। ବର୍ତ୍ତମାନ ସ୍ଥିତିକୁ ଅନୁଧ୍ୟାନ କଲେ ୩ ପ୍ରମୁଖ ଦଳ ବିଜେଡ଼ି, ଭାଜପା ଏବଂ କଂଗ୍ରେସ ମଧ୍ୟ ସିଧାସଳଖ ଲଢ଼େଇ ଚାଲିଛି । ବିଜେଡ଼ିରୁ ବର୍ଷା ସିଂ ବରିହା, ଭାଜପାରୁ ପ୍ରଦୀପ ପୁରୋହିତ ଏବଂ କଂଗ୍ରେସରୁ ସତ୍ୟଭୂଷଣ ସାହୁ ନିର୍ବାଚନ ରଣାଙ୍ଗନକୁ ଓହ୍ଲାଇଛନ୍ତି। ପ୍ରଦୀପ ଏବଂ ସତ୍ୟଭୂଷଣ ଏହି ଆସନ ପାଇଁ ନୂଆ ନୁହନ୍ତି। ଉଭୟେ ପୂର୍ବରୁ ଏହି ଆସନରେ ବିଧାୟକ ଥିବାବେଳେ ସେମାନେ ରାଜନୀତିରେ ଅଭିଜ୍ଞ ଏବଂ ପୁରୁଖା। କିନ୍ତୁ ବର୍ଷା ନିର୍ବାଚନ ମଇଦାନରେ ସମ୍ପୂର୍ଣ୍ଣ ନୂଆ। ସେ ରାଜନୈତିକ ପରିବାରର ଝିଅ ଏବଂ ରାଜନୈତିକ ପରିବାରର ବୋହୂ ମଧ୍ୟ। ବର୍ଷାଙ୍କ ସହିତ ୨ ପୁରୁଖାଙ୍କ ଲଢ଼େଇ ଏବେ ପଦ୍ମପୁର ନିର୍ବାଚନ ମଣ୍ଡଳୀରେ ଚର୍ଚ୍ଚାର ବିଷୟ ହୋଇଛି ।
ପଦ୍ମପୁର ନିର୍ବାଚନ ମଣ୍ଡଳୀରେ ଭାଜପା ପ୍ରାର୍ଥୀ ପ୍ରଦୀପଙ୍କ ବ୍ୟକ୍ତିତ୍ୱ ନିଆରା। ରାଜନୀତିକୁ ପ୍ରବେଶ କରିବା ପୂର୍ବରୁ ସେ ବାଲ୍କୋ ଆନ୍ଦୋଳନ, ଗନ୍ଧମାର୍ଦ୍ଧନ ସୁରକ୍ଷା ଆନ୍ଦୋଳନରେ ସ୍ବତନ୍ତ୍ର ପରିଚୟ ସୃଷ୍ଟି କରିଆସିଛନ୍ତି। ସେହିପରି ଆଞ୍ଚଳିକ ସମସ୍ୟା, ଚାଷୀ ଆନ୍ଦୋଳନରେ ମଧ୍ୟ ସାମିଲ ହୋଇ ଜନସମ୍ପର୍କ ରଖିଛନ୍ତି। ଏଥିପାଇଁ ରାଜ୍ୟରେ ବିଜେଡ଼ି ଶାସନ ଚାଲିଥିଲେ ସୁଦ୍ଧା ଗତ ୨୦୧୪ ସାଧାରଣ ନିର୍ବାଚନରେ ପ୍ରଦୀପ ଜିଲାର ୫ ବିଧାନସଭା ନିର୍ବାଚନ ମଣ୍ଡଳୀ ମଧ୍ୟରୁ ପଦ୍ମପୁର ଆସନକୁ ଦଖଲ କରିଥିଲେ। କେବଳ ସେତିକି ନୁହେଁ, ସେତେବେଳେ ଜିଲାରେ ଭାଜପା ଜିଲା ପରିଷଦ ଗଠନ କରିଥିଲା। କିନ୍ତୁ ପରବର୍ତ୍ତୀ ସମୟରେ ପ୍ରଦୀପ ଲୋକଙ୍କ ଆସ୍ଥା ହରାଇଥିଲେ ଏବଂ ୨୦୧୯ ସାଧାରଣ ନିର୍ବାଚନରେ ବିଜେଡ଼ି ପ୍ରାର୍ଥୀ ସ୍ବର୍ଗତ ବିଜୟ ରଞ୍ଜନ ସିଂ ବରିହାଙ୍କ ହାତକୁ ପୁଣି ଆସନଟି ଫେରି ଯାଇଥିଲା ।
ବିଜୟଙ୍କ ପାଇଁ ଏହି ଆସନ ନୂଆ ନ ଥିଲା। ଏଠାରୁ ସେ ସର୍ବାଧିକ ୫ଥର ବିଜୟୀ ହୋଇଥିଲେ। ତାଙ୍କ ଦେହାନ୍ତ ପରେ ଏହି ଉପନିର୍ବାଚନ ହେଉଛି ଏବଂ ବିଜୁ ଜନତା ଦଳ ସ୍ବର୍ଗତ ବରିହାଙ୍କ ଝିଅ ବର୍ଷାଙ୍କୁ ନିର୍ବାଚନ ମଇଦାନକୁ ଛାଡ଼ିଛି। ବର୍ଷା ନିର୍ବାଚନୀ ମଇଦାନରେ ନୂଆ ହୋଇ ପାରନ୍ତି, କିନ୍ତୁ ତାଙ୍କ ପାଖରେ ରାଜନୈତିକ ଅଭିଜ୍ଞତା ନାହିଁ କହିଲେ ଠିକ୍ ହେବ ନାହିଁ। ବର୍ଷା ସ୍ବର୍ଗତ ବରିହାଙ୍କ ଝିଅ ହୋଇଥିବାବେଳେ ସତ୍ୟବାଦୀର ପୂର୍ବତନ ବିଧାୟକ ରମାରଞ୍ଜନ ବଳିୟାର ସିଂଙ୍କ ବୋହୂ। ପିଲାବେଳେ ସେ ତାଙ୍କ ବାପାଙ୍କଠାରୁ ରାଜନୀତି ବାବଦରେ ଜ୍ଞାନ ଆହରଣ କରିବା ସହିତ ବାପାଙ୍କ ସେବା ମନୋବୃତ୍ତି ଆଖିରେ ଦେଖି ଆସିଥିବା କହିଛନ୍ତି।
ସେହିପରି କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁ ମଧ୍ୟ ପଦ୍ମପୁର ନିର୍ବାଚନ ମଣ୍ଡଳୀରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଆସିଛନ୍ତି। ପଦ୍ମପୁର ଆସନରୁ ସେ ୩ଥର ବିଜୟ ଲାଭ କରିଛନ୍ତି। ୧୯୮୦, ୧୯୮୫ ଏବଂ ୨୦୦୪ ସାଧାରଣ ନିର୍ବାଚନରେ ପଦ୍ମପୁର ନିର୍ବାଚନ ମଣ୍ଡଳୀବାସୀ ତାଙ୍କୁ ଆଶୀର୍ବାଦ କରି ସାହୁଙ୍କୁ ବିଜୟୀ କରିଥିଲେ। ମାତ୍ର ପରବର୍ତ୍ତୀ ସମୟରେ ଏହି ନିର୍ବାଚନ ମଣ୍ଡଳୀବାସୀ ତାଙ୍କୁ ଆଉ ସୁଯୋଗ ଦେଇନାହାନ୍ତି। ଏପରିକି ୨୦୧୪ ସାଧାରଣ ନିର୍ବାଚନରେ ଦଳ ମଧ୍ୟ ସତ୍ୟଭୂଷଣଙ୍କ ପ୍ରତି ଆସ୍ଥା ପ୍ରକଟ କରି ନ ଥିଲା। କିନ୍ତୁ ୨୦୧୯ ସାଧାରଣ ନିର୍ବାଚନରେ କଂଗ୍ରେସ ସତ୍ୟଭୂଷଣଙ୍କୁ ନିର୍ବାଚନ ମଇଦାନକୁ ଛାଡ଼ିଥିବା ବେଳେ ଚଳିତ ଉପନିର୍ବାଚନରେ ମଧ୍ୟ ତାଙ୍କୁ ସୁଯୋଗ ଦେଇଛି । ନିର୍ବାଚନ ମଇଦାନକୁ ଓହ୍ଲାଇଥିବା ସବୁ ପ୍ରାର୍ଥୀଙ୍କ ମଧ୍ୟରୁ ବର୍ଷୀୟାନ ସତ୍ୟଭୂଷଣଙ୍କ ନିରାଡ଼ମ୍ବର ପ୍ରଚାର, ବ୍ୟକ୍ତିତ୍ୱ ଲୋକଙ୍କୁ ଆକୃଷ୍ଟ କରୁଛି। ଅନ୍ୟପଟେ ବିଜେଡ଼ି ଏବଂ ଭାଜପା ନେତାଙ୍କ ମଧ୍ୟରେ ଯେଭଳି ବୟାନବାଜି ଚାଲିଛି, ତାହା ମଧ୍ୟ କଂଗ୍ରେସ ପାଇଁ ସହାୟକ ହୋଇଛି। ଏହି ଦୃଷ୍ଟିରୁ ତାଙ୍କ ସପକ୍ଷରେ ଅଧିକ ମତଦାନ ହେବ ବୋଲି ସତ୍ୟଭୂଷଣ ଆଶାବାଦୀ ଅଛନ୍ତି।
