ଲୋଇସିଂହା,୨।୨(ସୁଶାନ୍ତ ବାରିକ):ଏବେ ବି ରାଜ୍ୟରେ ମଣ୍ଡିରେ ଧାନ ବିକ୍ରି ନେଇ ଅବ୍ୟବସ୍ଥା ଲାଗି ରହିଛି। ଧାନ ବିକ୍ରି ବାବଦ ଟଙ୍କା ପାଇବାରେ ଚାଷୀଙ୍କୁ ହଟହଟା ହେବକୁ ପଡୁଛି। ଧାନ ବିକ୍ରି ଟଙ୍କା ଆଣିବାକୁ ଯାଇ ବଲାଙ୍ଗୀର ଜିଲା ଆଗଲପୁର ବ୍ଲକର ଜଣେ ଯୁବ ଚାଷୀଙ୍କ ଜୀବନ ଯାଇଥିବା ଅଭିଯୋଗ ହୋଇଛି। ମୃତ ଚାଷୀ ଜଣକ ହେଲେ ଆଗଲପୁର ବ୍ଲକ ନଅଗାଁ(କ) ଗ୍ରାମର ବଳରାମ ପଧାନ। ବଳରାମଙ୍କ ଖରିଫ ଧାନ ବିକ୍ରି ବାବଦ ଟଙ୍କା ସ୍ଥାନୀୟ ବ୍ୟାଙ୍କ ଆକାଉଣ୍ଟରେ ପଇଠ ନ ହୋଇ ବାହାର ରାଜ୍ୟ କେରଳରେ ଥିବା ତାଙ୍କ ଆକାଉଣ୍ଟରେ ଜମା ହୋଇଛି। ସେହି ଟଙ୍କା ଉଠାଣ କରିବାକୁ ଯାଇ ସେଠାରେ ତାଙ୍କର ଆକସ୍ମିକ ଭାବେ ଶନିବାର ମୃତ୍ୟୁ ଘଟିଛି। ସରକାରଙ୍କ ଦୂରଦୃଷ୍ଟିହୀନତା ଏବଂ କୌଣସି ନିର୍ଦ୍ଦିଷ୍ଟ ନୀତିର ଅଭାବ ଯୋଗୁ ଅକାଳରେ ବଳରାମଙ୍କ ଜୀବନ ଯାଇଥିବା ଅଭିଯୋଗ କରି ସ୍ଥାନୀୟ ସାଲେଭଟାର ଯୁବନେତା ଆକାଶ ମିଶ୍ର କ୍ଷୋଭ ପ୍ରକାଶ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଆଗଲପୁର ବ୍ଲକ ନଅଗାଁ(କ) ପଞ୍ଚାୟତ ନଅଗାଁ(କ) ଗ୍ରାମର ଯୁବଚାଷୀ ବଳରାମଙ୍କ ମା’ ବାପାଙ୍କ ବହୁବର୍ଷ ପୂର୍ବରୁ ଦେହାନ୍ତ ହୋଇଯାଇଛି। ତାଙ୍କର ୨ ଭଉଣୀଙ୍କ ବିବାହ ହୋଇସାରିଛି। ବଳରାମ ଅବିବାହିତ ଥିବା ବେଳେ ଘରେ ଏକାକୀ ରହୁଥିଲେ। ଚଳିତବର୍ଷ ତାଙ୍କ ପୈତୃକ ଚାଷ ଜମିରେ ଖରିଫ ଧାନ ଚାଷ କରିଥିଲେ।
ପାକ୍ସ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ୨୦୨୫ ଡିସେମ୍ବର ୨୨ରେ ବଳରାମ ତାଙ୍କର ଅମଳ ଧାନ ୬୭ ବସ୍ତା (୩୦ କୁଇଣ୍ଟାଲ ନଅଗାଁ(କ) ପ୍ରାଥମିକ ସମବାୟ ସମିତି(ପାକ୍ସ)ରେ ବିକ୍ରି କରିଥିଲେ। କୁଇଣ୍ଟାଲ ପିଛା ୨୩ ଶହ ଏମ୍ଏସପି ଦର ଅନୁଯାୟୀ ୭୧ ହଜାର ୩ ଶହ ଟଙ୍କା ହୋଇଥିଲା। ଏମ୍ଏସପି ସହିତ ବୋନସ ୮ ଶହ ଟଙ୍କା ମିଶାଇଲେ ମୋଟ ୯୧ ହଜାର ୧୦୦ ଟଙ୍କା ଧାନ ବିକ୍ରି ବାବଦରେ ସେ ପାଇବା କଥା। ସରକାର ସପ୍ତାହକ ମଧ୍ୟରେ ଧାନ ବିକ୍ରି ଟଙ୍କା ଚାଷୀ ଆକାଉଣ୍ଟରେ ଜମା ହେଉଥିବା କହୁଛନ୍ତି। କିନ୍ତୁ ଧାନ ବିକ୍ରିର ଦୀର୍ଘ ଦିନ ବିତିଯାଇଥିଲେ ସୁଦ୍ଧା ବଳରାମଙ୍କ ସ୍ଥାନୀୟ ଅଞ୍ଚଳରେ ଥିବା ବ୍ୟାଙ୍କ ଆକାଉଣ୍ଟରେ ଟଙ୍କା ପଡିନଥିଲା। ବାରମ୍ବାର ଆକାଉଣ୍ଟ ଯାଞ୍ଚ କରି ସେ ନିରାଶ ହୋଇଥିଲେ। ଖୋଳତାଡ଼ କଲା ପରେ କିଛି ବର୍ଷ ପୂର୍ବରୁ ଦାଦନ ଖଟୁଥିବା ସମୟରେ କେରଳ ଅଞ୍ଚଳରେ ଖୋଲିଥିବା ବ୍ୟାଙ୍କ ଆକାଉଣ୍ଟରେ ଚଳିତବର୍ଷର ଧାନ ବିକ୍ରି ଟଙ୍କା ପଡିଥିବା ଜାଣିବାକୁ ପାଇଥିଲେ।
ପରେ ଚାଷ ସମୟର ଧାରକରଜ ଟଙ୍କା ପରିଶୋଧ କରିବା ପାଇଁ ବଳରାମ ତାଙ୍କର ଜଣେ ସହଯୋଗୀଙ୍କୁ ସାଙ୍ଗରେ ଧରି କେରଳ ଅଭିମୁଖେ ଗତ ଗୁରୁବାର ଯାଇଥିଲେ। କିନ୍ତୁ ସେଠାରେ ଶନିବାର ପହଞ୍ଚତ୍ ଅସୁସ୍ଥ ଅନୁଭବ କରିଥିଲେ। ସାଙ୍ଗରେ ଯାଇଥିବା ସହଯୋଗୀ ସ୍ଥାନୀୟ ଲୋକଙ୍କ ସହାୟତାରେ ତାଙ୍କୁ ସେଠାକାର ଡାକ୍ତରଖାନାରେ ଭର୍ତ୍ତି କରିଥିଲେ। ତେବେ ଚିକିତ୍ସାଧୀନ ଥିବା ବେଳେ ଡାକ୍ତର ବଳରାମଙ୍କୁ ମୃତ ଘୋଷଣା କରିଥିବା ତାଙ୍କ ଭିଣେଇ ସୁବଳ ସାହୁଙ୍କ ସୂତ୍ରରୁ ପ୍ରକାଶ। ଭିଣେଇଙ୍କ କହିବା ଅନୁଯାୟୀ, କେରଳ ଗଲା ଦିନ ତାଙ୍କ ସ୍ବାସ୍ଥ୍ୟବସ୍ଥା ଠିକ୍ ଥିଲା। ଆକସ୍ମିକ ମୃତ୍ୟୁକୁ ନେଇ ତାଙ୍କ ଭଉଣୀ ଓ ଭିଣେଇ ଭାଙ୍ଗି ପଡିଥିବା ସୁବଳ କହିଛନ୍ତି। ସରକାରଙ୍କ ମଣ୍ଡି ପରିଚାଳନାଗତ ଅବ୍ୟବସ୍ଥା ନେଇ ଚାଷୀ ସଂଗଠନ ପକ୍ଷରୁ ଜାନୁଆରୀ ୨୮ରେ ଓଡିଶା ବନ୍ଦ ଡାକରା ଦିଆଯାଇଥିଲା। ଏହାସତ୍ତ୍ୱେ ଅବ୍ୟବସ୍ଥାର ସୁଧାର ହେଉନ ଥିବାରୁ ଧାନ ବିକ୍ରି ବାବଦ ଟଙ୍କା ଉଠାଣ ପାଇଁ ସୁଦୂର କେରଳକୁ ଯାଇ ଜଣେ ଯୁବଚାଷୀଙ୍କ ଜୀବନ ଚାଲିଯିବା ଘଟଣାରେ ବିଜେଡି ଯୁବ ନେତା ଆକାଶ ମିଶ୍ର ନିଜ ସାମାଜିକ ଗଣମାଧ୍ୟମରେ କ୍ଷୋଭ ପ୍ରକାଶ କରିଛନ୍ତି। ମୃତ ଯୁବଚାଷୀଙ୍କ ମରଶରୀର ଗାଁକୁ ଆଣିବା ବ୍ୟବସ୍ଥା କରିବା ସାଙ୍ଗକୁ ଖର୍ଚ୍ଚ ଜିଲା ପ୍ରଶାସନ ବହନ କରିବାକୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଥିବା ମିଶ୍ର କହିଛନ୍ତି। ଏ ସମ୍ପର୍କରେ ପାକ୍ସ ସମ୍ପାଦକ ରଞ୍ଜନ ସାହୁଙ୍କୁ ପଚାରିବାରେ ପାକ୍ସରେ ଶହ ଶହ ଚାଷୀ ପଞ୍ଜୀକୃତ ଅଛନ୍ତି। ନିର୍ଦ୍ଧିଷ୍ଟ ଜଣେ ଚାଷୀଙ୍କ ସମ୍ପର୍କରେ ତଥ୍ୟ ଜାଣିବା ଏତେଟା ସହଜ ନୁହେଁ। ଏବେ ସରକାର ଡିବିଟି ମାଧ୍ୟମରେ ଟଙ୍କା ପଇଠ କରୁଛନ୍ତି। ଏକ୍ଷେତ୍ରରେ କେରଳର ଆକାଉଣ୍ଟ କାର୍ଯ୍ୟକ୍ଷମ ଥିବ, ତେଣୁ ସେହି ଆକାଉଣ୍ଟରେ ଟଙ୍କା ଜମା ହୋଇଥିବ ବୋଲି ସେ କହିଥିଲେ।
Dharitri – Odisha’s No.1 Odia Daily
