ଆଳି,୩୧।୧୨(ଡି.ଏନ.ଏ.): ଆଳି ଥାନା ପଦନୀପାଳ ଗ୍ରାମର ମାଳତି ମଲ୍ଲିକଙ୍କ ସ୍ଥିତିବାନ ସତ୍ତ୍ୱକୁ ଜଣେ ବ୍ୟକ୍ତି ଉପଯୋଗ କରି ବାଲି ଚାଲାଣ କରୁଛନ୍ତି। ସେ ଗ୍ରାମର କେତେଜଣ ମହିଳାଙ୍କୁ ନେଇ ଗାଡି ଅଟକ ରଖିଥିବା ବେଳେ ପଦନୀପାଳ ସରପଞ୍ଚ କେତେଜଣ ବ୍ୟକ୍ତିଙ୍କ ସହ ତାଙ୍କୁ ଅଶାଳୀନ ଭାବେ ଗାଳିଗୁଲଜ କରିବା ସହ ଦୁର୍ବ୍ୟବହାର ପ୍ରଦର୍ଶନ କରିଥିବା ଥାନାରେ ଅଭିଯୋଗ କରିଛନ୍ତି। ଅଭିଯୋଗ ଅନୁଯାୟୀ, ପଦନୀପାଳ ଗ୍ରାମ ନିକଟରେ ପ୍ରବାହିତ ଖରସ୍ରୋତା ନଦୀରୁ ଜଣେ ବ୍ୟକ୍ତି ନିୟମିତ ଭାବେ ବାଲି ଉଠାଣ କରୁଥିବା ବେଳେ ତାଙ୍କ ସ୍ଥିତିବାନ ଜମିକୁ ବ୍ୟବହାର କରୁଛନ୍ତି। ଫଳରେ ତାହା ନଷ୍ଟ ହେବାକୁ ବସିଲାଣି। ତେଣୁ ସେ ଗୁରୁବାର ଗ୍ରାମର ଆରତୀ ମଲିକ, ଝୁନାରାଣୀ ମଲିକ, ସଞ୍ଜୁଲତା ମଲିକ, ପ୍ରତିମା ମଲିକ, ବିଳାସୀ ମଲିକ, ସୁକୁମାରୀ ମଲିକ, ଚମ୍ପାବତୀ ମଲିକ ବିରୋଧ କରି ବାଲି ନେଉଥିବା ଗାଡିକୁ ବାଲି ନ ଉଠାଇ ଫେରାଇ ଦେଇଥିଲେ। ଏଥିଯୋଗୁ ସରପଞ୍ଚ ବିକ୍ରମ ମଲିକ, କ୍ଷୀରୋଦ ମଲିକ, ପ୍ରମୋଦ ମଲିକ, ପ୍ରଭାକର ମଲିକ, ବିକାଶ ମଲିକ, ଅଶୋକ ମଲିକ, ଚୌଧୁରୀ ମଲିକ ପ୍ରମୁଖ ସେମାନଙ୍କୁ ରାସ୍ତାରେ ଅଟକ ରଖି ଅଶ୍ଳୀଳ ଭାଷାରେ ଗାଳି ଗୁଲଜ କରିବା ସହିତ ଦୁର୍ବ୍ୟବହାର ପ୍ରଦର୍ଶନ କରିଥିଲେ। ଏପରି କି ତାଙ୍କ ବେକରୁ ସୁନାଚେନ ଛିଡାଇ ନେଇ ଯାଇଥିବା ମଧ୍ୟ ଅଭିଯୋଗ କରିଛନ୍ତି। ଗ୍ରାମରେ ଏହି ଘଟଣାର କୌଣସି ସମାଧାନ ନ ହେବାରୁ ସେମାନେ ଆଇନର ଦ୍ୱାରସ୍ଥ ହୋଇଛନ୍ତି। ଏ ନେଇ ଥାନାରେ ପୋଲିସ ନଂ. ୫୭୨/୨୨ରେ ମାମଲା ରୁଜୁ କରି ତଦନ୍ତ ଆରମ୍ଭ କରିଛି।
