ଭୋଗରାଇ, ୧୬।୧(ଡି.ଏନ୍.ଏ.): ବାଲେଶ୍ୱର ଜିଲା ଭୋଗରାଇ ବ୍ଲକ ଚନ୍ଦନେଶ୍ୱର ବର୍ଡର ରାସ୍ତାର ମହାନ୍ତି ଛକଠାରେ ସୋମବାର ପଶ୍ଚିମବଙ୍ଗ ଅଭିମୁଖେ ଯାଉଥିବା ଏକ ଗୋରୁ ବୋଝେଇ ଟ୍ରକ୍ ଭାରସାମ୍ୟ ହରାଇ ଓଲଟି ପଡ଼ିବାରୁ ୧୪ଟି ଗୋରୁଙ୍କ ଘଟଣାସ୍ଥଳରେ ମୃତ୍ୟୁ ଘଟିଛି। ୧୦ ଗୋରୁ ଗୁରୁତର ଆହତ ହୋଇଛନ୍ତି। ଘଟଣାସ୍ଥଳକୁ ଚନ୍ଦନେଶ୍ୱର ଫାଣ୍ଡି ଜମାଦାର ବିଶ୍ୱନାଥ କରଙ୍କ ସମେତ ତାଳସାରୀ ମେରାଇନ ଥାନା ଓ ଭୋଗରାଇ ଥାନା ପୋଲିସ କର୍ମଚାରୀମାନେ ସ୍ଥାନୀୟ ଲୋକଙ୍କ ସାହାଯ୍ୟରେ ମୃତ ଓ ଜୀବିତ ଗୋରୁଗୁଡ଼ିକୁ ଉଦ୍ଧାର କରିଛନ୍ତି। ପ୍ରାଣୀଧନ ଚିକିତ୍ସା ଅଧିକାରୀଙ୍କ ସହ ଏକ ଡାକ୍ତରୀ ଟିମ୍ ସେଠାକୁ ଯାଇ ଗୁରୁତର ହୋଇଥିବା ଗୋରୁଗୁଡ଼ିକୁ ଚିକିତ୍ସା କରୁଥିବା ବେଳେ ସାମାଜିକ କର୍ମୀ ଦିଲୀପ କାମିଳାଙ୍କ ସହ ବହୁ ସ୍ବେଚ୍ଛାସେବୀ ଗୋରୁଗୁଡ଼ିକର ସେବା କରୁଛନ୍ତି। ଗାଡ଼ିରେ ଥିବା ପଶ୍ଚିମବଙ୍ଗର ଗୋରୁ ମାଲିକ ଓ ଟ୍ରକ ଡ୍ରାଇଭର ଘଟଣାସ୍ଥଳରୁ ଚମ୍ପଟ ମାରିଛନ୍ତି। ଅନ୍ୟ ଜଣେ ବଙ୍ଗୀୟ ହେଲପରଙ୍କୁ ଲୋକଙ୍କ କବଳରୁ ପୋଲିସ ଉଦ୍ଧାର କରି ଥାନାରେ ଅଟକ ରଖି ପଚରାଉଚୁରା କରୁଛି। ଏହି ଟ୍ରକ୍ରେ ୭୦ରୁ ଊର୍ଦ୍ଧ୍ୱ ଗୋରୁ ଥିବା ବେଳେ ଭଦ୍ରକରୁ ପଶ୍ଚିମବଙ୍ଗକୁ ଗୋରୁ ଚାଲାଣ ହେଉଥିବା ସୂଚନା ମିଳିଛି।
