କଟକ,୨୬ା୪ (କାର୍ତ୍ତିକ ସାହୁ)- ଭଦ୍ରକ ଓ ଯାଜପୁର ଜିଲା ଜେଲରୁ ଭିଡ଼ ହଟାଇବାକୁ କି ପଦକ୍ଷେପ ନେଇଛ ଜଣାଅ ବୋଲି ରାଜ୍ୟ ସରକାରଙ୍କୁ ହାଇକୋର୍ଟ ଶୁକ୍ରବାର ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ ମୁଖ୍ୟ ବିଚାରପତି ଚକ୍ରଧାରୀ ଶରଣ ସିଂ ଓ ବିଚାରପତି ଏମ୍.ଏସ୍. ରମଣଙ୍କୁ ନେଇ ଗଠିତ ଖଣ୍ଡପୀଠ ଶୁକ୍ରବାର ମାମଲାର ଶୁଣାଣି କରିଛନ୍ତି। ଶୁଣାଣିବେଳେ ରାଜ୍ୟ ସରକାରଙ୍କ ପକ୍ଷରୁ ସତ୍ୟପାଠ ଦାଖଲ କରାଯାଇଛି। ଉକ୍ତ ସତ୍ୟପାଠରେ ଦର୍ଶାଯାଇଛି, ଭଦ୍ରକ ଜିଲା ଜେଲରେ ଏବେ ୩୦୩ ଜଣ ବିଚାରାଧୀନ କଏଦୀ ରହୁଛନ୍ତି। ମାତ୍ର ଏଠାରେ ୨୦୧ ଜଣ କଏଦୀ ରହିବାର କ୍ଷମତା ରହିଛି। ସେହିପରି ଯାଜପୁର ଜିଲା ଜେଲ୍ର କ୍ଷମତା ୧୩୩ ଥିବାବେଳେ ଏବେ ସେଠାରେ ୨୩୭ ଜଣ ବିଚାରାଧୀନ କଏଦୀ ରହୁଛନ୍ତି। ଭଦ୍ରକରେ ନିର୍ମାଣାଧୀନ ନୂଆ ଜେଲ ୨୦୨୭ ଜୁନ୍ରେ ଓ ଯାଜପୁରରେ ନିର୍ମାଣାଧୀନ ନୂଆ ଜେଲ ୨୦୨୬ ଜୁନ୍ରେ ଶେଷ ହେବ ବୋଲି ରାଜ୍ୟ ସରକାରଙ୍କ ପକ୍ଷରୁ ହାଇକୋର୍ଟଙ୍କୁ ଅବଗତ କରାଯାଇଛି। ତେବେ ଜେଲରୁ ଭିଡ଼ ହଟାଇବା ନିମନ୍ତେ ନିଆଯାଇଥିବା ପଦକ୍ଷେପ ସମ୍ପର୍କରେ ଆସନ୍ତା ମେ’ ୩ ତାରିଖ ମଧ୍ୟରେ ଅବଗତ କରାଇବାକୁ ହାଇକୋର୍ଟ ରାଜ୍ୟ ସରକାରଙ୍କୁ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ପୂର୍ବରୁ ହାଇକୋର୍ଟ ମାମଲାର ଶୁଣାଣି କରି ଜେଲରେ ଅନ୍ତେବାସୀଙ୍କୁ ସର୍ବନିମ୍ନ ସୁବିଧା ଯଥା ଖାଦ୍ୟପେୟ, ବସ୍ତ୍ର, ପାଇଖାନା, ଗାଧୁଆଘର, ପାନୀୟଜଳ ଏବଂ ସେମାନଙ୍କର ଉପଯୁକ୍ତ ଯତ୍ନ ନିଆଯାଉଛି କି ନାହିଁ ସେନେଇ ତଥ୍ୟ ପ୍ରଦାନ କରିବାକୁ ଆଦେଶ ଦେଇଥିଲେ। ରାଜ୍ୟରେ ଜେଲ୍ ସଂସ୍କାର ସମ୍ପର୍କିତ ମାମଲାରେ ଜେଲରୁ ଭିଡ଼ କମାଇବା ଉପରେ ହାଇକୋର୍ଟ ପୂର୍ବରୁ ଗୁରୁତ୍ୱାରୋପ କରିଥିଲେ। ରାଜ୍ୟରେ ଯେଉଁଠି ନୂଆ ଜେଲ୍ ପ୍ରକଳ୍ପ କରାଯାଉଛି ସେଠାରେ ଜେଲ ତିଆରି ସହିତ ଏକାସାଙ୍ଗେ ପାଚେରି ମଧ୍ୟ ତିଆରି କରିବାକୁ ହାଇକୋର୍ଟ ଆଦେଶ ଦେଇଥିଲେ।
