ଛତ୍ରପୁର, ୧।୯ (ଦିଲ୍ଲୀପ ସାମଲ): ପଠାଣି ସାମନ୍ତ ଗଣିତ ମେଧା ବୃତ୍ତି ପରୀକ୍ଷାରେ ଛତ୍ରପୁର ସରସ୍ୱତୀ ଶିଶୁ ବିଦ୍ୟାମନ୍ଦିରର ଛାତ୍ରଛାତ୍ରୀମାନେ ଉଲ୍ଲେଖନୀୟ ସଫଳତା ହାସଲ କରି ବିଦ୍ୟାଳୟ ତଥା ଅଞ୍ଚଳ ପାଇଁ ଗୌରବ ଆଣିଦେଇଛନ୍ତି। ୨୦୨୩-୨୪ ଏବଂ ୨୦୨୪-୨୫ ଶିକ୍ଷାବର୍ଷର ଫଳାଫଳ ଅନୁଯାୟୀ, ଉଭୟ ଷ୍ଟେଜ୍-୧ ଓ ଷ୍ଟେଜ୍-୨ ପରୀକ୍ଷାରେ ବିଦ୍ୟାଳୟର କୃତୀ ଛାତ୍ରଛାତ୍ରୀମାନେ ଶ୍ରେଷ୍ଠ ପ୍ରଦର୍ଶନ କରିଛନ୍ତି।
୨୦୨୩-୨୪ ଶିକ୍ଷାବର୍ଷର ଷ୍ଟେଜ୍-୧ରେ କେ. କ୍ରିଷ୍ଣା ବାବୁ ଛତ୍ରପୁର ପୌରାଞ୍ଚଳରେ ପ୍ରଥମ ସ୍ଥାନ ହାସଲ କରିଥିବା ବେଳେ ଓମ୍ ପ୍ରସାଦ ବେହେରା ତୃତୀୟ, ହୃଷିକେଶ ପାଢ଼ୀ ପଞ୍ଚମ ଓ ଜେ. ଲାବଣ୍ୟା ଷଷ୍ଠ ସ୍ଥାନ ଅଧିକାର କରିଥିଲେ। ସେହିପରି ଷ୍ଟେଜ୍-୨ରେ ରୁଦ୍ର ପ୍ରସାଦ ମହାପାତ୍ର ପ୍ରଥମ, ସୁରଜ କୁମାର ଗୌଡ଼ ଦ୍ୱିତୀୟ ଏବଂ ତେଜସ୍ୱିନୀ ଶତପଥୀ ତୃତୀୟ ସ୍ଥାନ ହାସଲ କରି ବିଦ୍ୟାଳୟର ମାନ ବୃଦ୍ଧି କରିଛନ୍ତି।
ସେହିପରି ୨୦୨୪-୨୫ ଶିକ୍ଷାବର୍ଷର ଷ୍ଟେଜ୍-୧ରେ ମହେଶ୍ୱର ସ୍ୱାଇଁ ଛତ୍ରପୁର ପୌରାଞ୍ଚଳରେ ପ୍ରଥମ ଏବଂ ସ୍ୱାଧୀନ ପ୍ରଧାନ ଦ୍ୱିତୀୟ ସ୍ଥାନ ହାସଲ କରିଛନ୍ତି। ଅପରପକ୍ଷରେ ଷ୍ଟେଜ୍-୨ରେ ଅଙ୍କିତ କୁମାର ଆଚାର୍ଯ୍ୟ ପ୍ରଥମ ଏବଂ କେ. ଆଦିତ୍ୟ କୁମାର ରେଡ୍ଡୀ ଚତୁର୍ଥ ସ୍ଥାନ ହାସଲ କରି କୃତକାର୍ଯ୍ୟ ହୋଇଛନ୍ତି।
ଛାତ୍ରଛାତ୍ରୀଙ୍କ ଏହି ଚିତ୍ତାକର୍ଷକ ସଫଳତାରେ ବିଦ୍ୟାଳୟର ସମସ୍ତ ଗୁରୁଜୀ-ଗୁରୁମା ଅତ୍ୟନ୍ତ ଖୁସି ପ୍ରକାଶ କରିବା ସହ ସମସ୍ତ ସଫଳ ପରୀକ୍ଷାର୍ଥୀଙ୍କୁ ଶୁଭେଚ୍ଛା ଓ ସମ୍ବର୍ଦ୍ଧନା ଜଣାଇଛନ୍ତି। ବିଦ୍ୟାଳୟର ଗୁଣାତ୍ମକ ଶିକ୍ଷାଦାନ ଓ ଉତ୍ସର୍ଗୀକୃତ ପ୍ରଚେଷ୍ଟା ପାଇଁ ଅଭିଭାବକମାନେ ବିଦ୍ୟାଳୟର ଗୁରୁଜୀ, ଗୁରୁମା ଏବଂ ପରିଚାଳନା କମିଟିକୁ ଗଭୀର ଧନ୍ୟବାଦ ଜଣାଇଛନ୍ତି।
