ଓଟିଡିସିର ‘ଚନ୍ଦ୍ରଭାଗା ବିଚ୍‌ କାଫେ’
9:48 amDecember 2, 2020December 2, 2020 / 43

ଭୁବନେଶ୍ୱର,୨ା୧୨(ବ୍ୟୁରୋ): ରାଜ୍ୟର ପ୍ରମୁଖ ପର୍ଯ୍ୟଟନସ୍ଥଳୀ ଭାବେ ପରିଚିତ ପୁରୀର ଚନ୍ଦ୍ରଭାଗା ବେଳାଭୂମିରେ ଖୋଲିଛି ଓଡ଼ିଶା ପର୍ଯ୍ୟଟନ ଉନ୍ନୟନ ନିଗମ(ଓଟିଡିସି) କାଫେଟେରିଆ। ପୁରୀ ପରେ ଓଟିଡିସି ପକ୍ଷରୁ ଚନ୍ଦ୍ରଭାଗାରେ ଏହି ନୂତନ କାଫେଟେରିଆ ଖୋଲାଯାଇଛି। ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ ମଙ୍ଗଳବାର ଏହି କାଫେଟେରିଆକୁ ସର୍ବସାଧାରଣଙ୍କ ଉଦ୍ଦେଶ୍ୟରେ ଲୋକାର୍ପଣ କରିଛନ୍ତି। ଓଟିଡିସି ଦ୍ୱାରା ପରିଚାଳିତ ହେବାକୁ ଥିବା ଏହି କାଫେଟେରିଆର ନାମ ‘ଚନ୍ଦ୍ରଭାଗା ବିଚ୍‌ କାଫେ’ ରହିଛି। ଉଦ୍‌ଘାଟନୀ ଉତ୍ସବରେ ପର୍ଯ୍ୟଟନ ବିଭାଗ ସଚିବ ବିଶାଲ ଦେବଙ୍କ ସହ ଅନ୍ୟ ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏହାପୂର୍ବରୁ ଗତ ମାସରେ ପୁରୀ ବ୍ଲୁ ଫ୍ଲାଗ୍‌ ବିଚ୍‌ରେ ଓଟିଡିସି ପକ୍ଷରୁ ‘ଦି ହ୍ବାଇଟ୍‌ କ୍ରାବ୍‌’ ନାମରେ ଏକ କାଫେଟେରିଆ ଲୋକାର୍ପିତ ହୋଇଥିଲା। ପ୍ରଥମ ୩୦ଦିନ ମଧ୍ୟରେ ଏହି କାଫେଟେରିଆ ୩.୫ଲକ୍ଷ ଟଙ୍କାରୁ ଅଧିକ ବ୍ୟବସାୟ କରିଥିବାବେଳେ ଧୀରେ ଧୀରେ ଏହା ପର୍ଯ୍ୟଟକଙ୍କ ଦ୍ୱାରା ଲୋକପ୍ରିୟ ହେଉଛି। ପୁରୀର ବ୍ଲୁ ଫ୍ଲାଗ୍‌ ବିଚ୍‌ ପରେ ଚନ୍ଦ୍ରଭାଗା ବେଳାଭୂମିରେ ଆଉ ଏକ କାଫେଟେରିଆ ପ୍ରତିଷ୍ଠା କରି ଓଟିଡିସି ପର୍ଯ୍ୟଟକଙ୍କ ସୁବିଧା ସୁଯୋଗ ପାଇଁ ନୂଆ ପଦକ୍ଷେପ ନେଇଥିବା ଓଟିଡିସି ଅଧ୍ୟକ୍ଷା ଶ୍ରୀମୟୀ ମିଶ୍ର କହିଛନ୍ତି। ଏହି କାଫେଟେରିଆ ଦେଶ ବିଦେଶରୁ ଆସୁଥିବା ପର୍ଯ୍ୟଟକଙ୍କ ଆଦୃତି ଲାଭ କରିବ ବୋଲି ଶ୍ରୀମୟୀ ଆଶାବ୍ୟକ୍ତ କରିଛନ୍ତି। ଏହି ନୂଆ କାଫେଟେରିଆ ସମ୍ପର୍କରେ ସୂଚନା ଦେଇ ଓଟିଡିସିର ପରିଚାଳନା ନିର୍ଦ୍ଦେଶକ ସଚିନ୍‌ ଆର୍‌. ଯାଦବ କହିଥିଲେ, ଚନ୍ଦ୍ରଭାଗା ବିଚ୍‌ କାଫେରେ ପର୍ଯ୍ୟଟକମାନେ ନିଜର ପସନ୍ଦ ମୁତାବକ ଖାଦ୍ୟର ବରାଦ ଦେଇପାରିବେ। ସମ୍ପୂର୍ଣ୍ଣ ନିଆରା ଢଙ୍ଗରେ ଅଭିଜ୍ଞ ରୋଷେୟାମାନଙ୍କ ଦ୍ୱାରା ବିଭିନ୍ନ ପ୍ରକାରର ସୁସ୍ବାଦୁ ସି ଫୁଡ୍‌ ବା ସାମୁଦ୍ରିକ ଖାଦ୍ୟ ପ୍ରସ୍ତୁତ କରାଯାଇ ପର୍ଯ୍ୟଟକଙ୍କୁ ପରିବେଷଣ କରାଯିବ। ଏଠାରେ ବାଲିପ୍ରନ୍‌, କ୍ରାଫ୍ଟଚିଲ୍ଲି, ଫିସ୍‌ଫିଙ୍ଗର, ଗୋଲଡେନ୍‌ ଫ୍ରାଏଡ୍‌ ପ୍ରନ୍‌ ଭଳି ସି ଫୁଡ୍‌ ସହ ଚା ଓ କଫି ଆଦି ସୁଲଭ ମୂଲ୍ୟରେ ଉପଲବ୍ଧ ହେବ।