ବ୍ରହ୍ମପୁର ଅଫିସ,୨୧ା୨: ବ୍ରହ୍ମପୁର ବଡ ମେଡିକାଲରେ ପୁଣି ଅବ୍ୟବସ୍ତା ଦେଖାଦେଇଛି। ବିନା ନୋଟିସ୍ରେ ଅସ୍ଥିଶଲ୍ୟ ବିଭାଗ ଅସ୍ତ୍ରୋପଚାର (ଓଟି)ବନ୍ଦ କରାଯାଇଛି। ୩ ଦିନ ହେଲା ଏହି ବିଭାଗରେ ଓଟି ବନ୍ଦ ହେବା ଦ୍ୱାରା ଦକ୍ଷିଣ ଓଡ଼ିଶାର ବିଭିନ୍ନ ସ୍ଥାନରୁ ଆସୁଥିବା ରୋଗୀ ହଇରାଣ ହେଉଛନ୍ତି। ଅସ୍ତ୍ରୋପଚାର ପାଇଁ ରୋଗୀମାନେ ୨୪ଘଣ୍ଟା ଖାଲି ପେଟରେ ରହିଥାନ୍ତି। କିନ୍ତୁ ସେମାନେ ଖାଲିପେଟରେ ରହିବା ପରେ ଫେରାଇ ଦିଆଯାଉଥିବାରୁ ସେମାନେ ଅସୁବିଧା ଭୋଗୁଛନ୍ତି। ଶୁକ୍ରବାର ଜଣେ ରୋଗୀଙ୍କର ଅସ୍ତ୍ରୋପଚାର ଲାଗି ଦିନ ଧାର୍ଯ୍ୟ କରାଯାଇଥିଲା। କୌଣସି କାରଣରୁ ତାହା ହୋଇ ନ ପାରି ସୋମବାରକୁ ସ୍ଥିର କରାଗଲା। ରୋଗୀଙ୍କୁ ନେଇ ଡାକ୍ତର ଓଟିରେ ପହଞ୍ଚିବା ବେଳେ ଅସ୍ତ୍ରୋପଚାର ପାଇଁ ଆବଶ୍ୟକ ଜିନିଷ ଆସି ନ ଥିଲା, କିମ୍ବା ଏ ସମ୍ପର୍କରେ କାହାକୁ ନୋଟିସ୍ କରାଯାଇ ନ ଥିଲା। ଫଳରେ ଡାକ୍ତର ଓ ରୋଗୀ ଓଟିରୁ ଫେରି ଆସିଥିଲୋ। ପ୍ରକାଶ ଯେ, ରୋଗୀଙ୍କ ଅସ୍ତ୍ରୋପଚାର ପାଇଁ ଆବଶ୍ୟକ ସାମଗ୍ରୀ ଏଚ୍ଏଲ୍ଏଲ୍ ପ୍ରାଇଭେଟ୍ ଲିମିଟେଡ ଯୋଗାଣ କରୁଥିଲା। ଅସ୍ତ୍ରୋପଚାର ପାଇଁ ତାରିଖ ଧାର୍ଯ୍ୟ ହେବା ପରେ ଡାକ୍ତର (ଇଣ୍ଡେନ୍) କରି ଅଧୀକ୍ଷକଙ୍କ ଅଫିସକୁ ପଠାଇଥିଲେ। ସେଠାରୁ ସବୁ ସାମଗ୍ରୀ ଆସିଲେ ଅସ୍ତ୍ରୋପଚାର ହେଉଥିଲା। କିନ୍ତୁ ତାହା ଆସୁ ନ ଥିବାରୁ ଅସ୍ତ୍ରୋପଚାର ହୋଇପାରୁ ନାହିଁ।
ସମ୍ପର୍କରେ ଅଧୀକ୍ଷକ ପ୍ରଫେସର ଡା.ସନ୍ତୋଷ କୁମାର ମିଶ୍ରଙ୍କୁ ପଚାରିବାରୁ ଏଚ୍ଏଲ୍ଏଲ୍ ସମସ୍ତ ସାମଗ୍ରୀ ଯୋଗାଣ କରୁଥିଲା। କିନ୍ତୁ ବର୍ତ୍ତମାନ ଏକ ନୂଆ ସଂସ୍ଥା ଏହାର ଟେଣ୍ଡର ପାଇଛି। ଏଚ୍ଏଲ୍ଏଲ୍ ବିନା ନୋଟିସରେ ଏ ସବୁ ବନ୍ଦ କରିଦେଇଛି। ନୂଆ ସଂସ୍ଥାକୁ ଇଣ୍ଡେନ ହୋଇଥିବା ସାମଗ୍ରୀ ଯୋଗାଣ କରିବାକୁ ନିର୍ଦ୍ଦେଶ ଦିଆଯାଇଛି। ଖୁବ୍ଶୀଘ୍ର ଅସ୍ତ୍ରୋପଚାର ଆରମ୍ଭ ହେବ ବୋଲି ସେ ସୂଚନା ଦେଇଛନ୍ତି।
