ଝାରସୁଗୁଡା ଅଫିସ,୨।୪: ଛତିଶଗଡ଼ ରାୟଗଡ଼ ଜିଲା ଚକ୍ରଧରନଗର ଥାନା ଅଞ୍ଚଳରେ ଘଟିଥିବା ଡବଲ ମର୍ଡର ମାମଲାରେ ରାୟ ଶନିବାର ପ୍ରକାଶ ପାଇଛି। ରାୟଗଡ ଅତିରିକ୍ତ ଜିଲା ଦୌରାଜଜ କଳ୍ପନା ଦାଶ ଏବଂ ତାଙ୍କ ଝିଅ ବବଲି ହତ୍ୟାକାଣ୍ଡ ମାମଲାର ବିଚାର କରି ମୁଖ୍ୟ ଅଭିଯୁକ୍ତ ତଥା ବ୍ରଜରାଜନଗର ପୂର୍ବତନ ବିଧାୟକ ଅନୁପ ସାଏଙ୍କୁ ଆଜୀବନ କାରାଦଣ୍ଡରେ ଦଣ୍ଡିତ କରିଛନ୍ତି। ଏହି ମାମଲାରେ ଛନ୍ଦି ହୋଇଥିବା ଅନ୍ୟତମ ଅଭିଯୁକ୍ତ ଅନୁପଙ୍କ ଡ୍ରାଇଭର ବର୍ଦ୍ଧନ ଟପ୍ପୋଙ୍କୁ କୋର୍ଟ ନିର୍ଦ୍ଦୋଷରେ ଖଲାସ କରିଛନ୍ତି। କୋର୍ଟର ଏହି ରାୟ ପ୍ରକାଶ ପାଇବା ପରେ ଏହା ସାରା ରାଜ୍ୟରେ ଚର୍ଚ୍ଚାର ବିଷୟ ହୋଇଛି।
ସୂଚନାଯୋଗ୍ୟ, ଗତ ୨୦୧୬ ମସିହାରେ ଛତିଶଗଡ ରାୟଗଡ ଜିଲା ଚକ୍ରଧର ନଗର ଥାନା ଅଞ୍ଚଳରେ ଜଣେ ମହିଳା ଓ ଏକ ଝିଅକୁ ହତ୍ୟାକରି ଫିଙ୍ଗି ଦିଆଯାଇଥିଲା । ପୋଲିସ ମୃତଦେହ ଦ୍ବୟକୁ ଜବତ କରି ଚକ୍ରଧର ନଗର ଥାନାରେ ଏକ ମାମଲା ରୁଜୁକରି ତଦନ୍ତ ଚଳାଇଥିଲା। ପୋଲିସ ତଦନ୍ତ ପରେ ଏହା ବ୍ରଜରାଜନଗରର କଳ୍ପନା ଦାଶ ଓ ତାଙ୍କ ଝିଅ ବବଲିଙ୍କ ମୃତଦେହ ବୋଲି ଜଣାପଡିଥିଲା। ତା’ପରେ ପୋଲିସ ତଦନ୍ତ କରି ଏହି ହତ୍ୟାକାଣ୍ଡରେ ବ୍ରଜରାଜନଗର ଅନୁପ ଓ ତାଙ୍କ ଡ୍ରାଇଭର ବର୍ଦ୍ଧନଙ୍କ ସମ୍ପୃକ୍ତି ରହିଥିବା ଜାଣିବାକୁ ପାଇଥିଲା। ଉଭୟଙ୍କୁ ପୋଲିସ ଗତ ୨୦୨୦ ଫେବୃଆରୀ ୧୩ ତାରିଖରେ ଗିରଫକରି କୋର୍ଟ ଚାଲାଣ କରିଥିଲା । ଏହି ମାମଲା କୋର୍ଟରେ ବିଚାରାଧୀନ ଥିଲା। ଗତ ୨ମାସ ତଳେ ଡ୍ରାଇଭର ଟପ୍ପୋ ଜେଲରୁ ମୁକୁଳିଥିଲେ। ଅନୁପ ଜେଲରେ ଥିଲେ। କୋର୍ଟରେ ଏହାର ବିଚାର ଚାଲିଥିବା ବେଳେ ଏପ୍ରିଲ ୨ ତାରିଖରେ ଏହାର ଚୂଡାନ୍ତ ରାୟ ପ୍ରକାଶ ପାଇବାର ଥିଲା।
