କଟକ,୨ା୨ (କାର୍ତ୍ତିକ ସାହୁ): ରାଜ୍ୟରେ କାର୍ଯ୍ୟରତ ଅଙ୍ଗନଓ୍ବାଡି କର୍ମୀମାନଙ୍କୁ ଅନ୍ୟ ରାଜ୍ୟ ଭଳି ବର୍ଦ୍ଧିତ ଦରମା, ଚାକିରି ଭତ୍ତା, ଅବସରକାଳୀନ ସୁବିଧା ସହ ଅନ୍ୟାନ୍ୟ ସୁବିଧା ପ୍ରଦାନ କରାଯାଉ। ଏନେଇ କେତେଜଣ ଅଙ୍ଗନଓ୍ବାଡି କର୍ମୀ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ସେମାନଙ୍କ ଆବେଦନକୁ ବିଚାର କରି ସରକାର ଆବଶ୍ୟକ ପଦକ୍ଷେପ ନେବା ପାଇଁ ନିର୍ଦ୍ଦେଶ ଦେବାକୁ ସେମାନେ ହାଇକୋର୍ଟଙ୍କୁ ପ୍ରାର୍ଥନା କରିଛନ୍ତି।
ମାମଲାର ବିବରଣୀ ଅନୁଯାୟୀ, ଅଙ୍ଗନଓ୍ବାଡି କେନ୍ଦ୍ର ରାଜ୍ୟ ଓ କେନ୍ଦ୍ର ସରକାରଙ୍କ ମିଳିତ ଆନୁକୂଲ୍ୟରେ ପରିଚାଳିତ ହେଉଛି। ଅଙ୍ଗନଓ୍ବାଡି କର୍ମୀମାନେ ପ୍ରାଥମିକ ସ୍ତରରେ ରହି ସ୍ଥାନୀୟ ପ୍ରଶାସନ ପାଇଁ ସରକାରୀ ଯୋଜନାଗୁଡ଼ିକର ରୂପାୟନ ନିମନ୍ତେ କାର୍ଯ୍ୟ କରୁଛନ୍ତି। ସେମାନଙ୍କର ପ୍ରାଥମିକ କାର୍ଯ୍ୟ ୬ ବର୍ଷରୁ କମ୍ ବୟସର ପିଲାଙ୍କୁ ଶିକ୍ଷାଦାନ, ସ୍ବାସ୍ଥ୍ୟ ପରୀକ୍ଷା, ଟିକାକରଣ, ଖାଦ୍ୟ ପୋଷଣ ସହ ଲୋକମାନଙ୍କୁ ପରିବାର ନିୟୋଜନ ଓ ସୁସ୍ବାସ୍ଥ୍ୟ ପାଇଁ ଆବଶ୍ୟକ ଶିକ୍ଷା ପ୍ରଦାନ କରିବା। ସେମାନେ ସେମାନଙ୍କର ପ୍ରାଥମିକ କର୍ତ୍ତବ୍ୟ ସହିତ ସରକାରଙ୍କର ସମସ୍ତ ପ୍ରାଥମିକ ସ୍ତରୀୟ କାର୍ଯ୍ୟ ସମାପନ କରୁଛନ୍ତି। ଏପରି କି ଜନଗଣନା, ଭୋଟର ତାଲିକା, ରାଶନ କାର୍ଡ ପ୍ରସ୍ତୁତି ଏବଂ ଜାତିଭିତ୍ତିକ ଗଣନାରେ ଘରକୁ ଘର ବୁଲି ସର୍ଭେ କାର୍ଯ୍ୟ କରୁଛନ୍ତି। ଗ୍ରାମ୍ୟ ଉନ୍ନୟନ କମିଟିରେ ମଧ୍ୟ ସେମାନେ ସଦସ୍ୟ ରହି ଗ୍ରାମ୍ୟ ପରିମଳ ସଫା ଓ ପ୍ରଦୂଷଣମୁକ୍ତ ରଖିବାରେ ସହାୟକ ହେଉଛନ୍ତି। ଏଡ୍ସ, ମ୍ୟାଲେରିଆ, ଡେଙ୍ଗୁ, ପଲ୍ସ ପୋଲିଓ, ଟିବି ଆଦି ରୋଗ ନିୟନ୍ତ୍ରଣ ଦିଗରେ କାର୍ଯ୍ୟ କରୁଛନ୍ତି। ଏତେ କାର୍ଯ୍ୟ କରିବା ପରେ ବି ସେମାନଙ୍କୁ ସର୍ବନିମ୍ନ ମଜୁରି ଦିଆଯାଉ ନାହିଁ। ଓଡ଼ିଶାରେ ଅଣକୁଶଳୀ ଶ୍ରମିକଙ୍କୁ ୩୪୫ ଟଙ୍କା ଓ କୁଶଳୀ ଶ୍ରମିକଙ୍କୁ ୪୩୫ ଟଙ୍କା ଦୈନିକ ମଜୁରି ଦେବାକୁ ସ୍ଥିର ହୋଇଥିବାବେଳେ ସେମାନଙ୍କ ମାସିକ ରୋଜଗାର ଯଥାକ୍ରମେ ୧୦ ହଜାର ୩୫୦ ଟଙ୍କା ଓ ୧୩ ହଜାର ୫୦ ଟଙ୍କାରୁ ଅଧିକ ରହୁଛି। ହେଲେ ଜଣେ ଅଙ୍ଗନଓ୍ବାଡି କର୍ମୀଙ୍କ ମାସିକ ଦରମା ୭,୫୦୦ ଟଙ୍କା ଓ ଉପକେନ୍ଦ୍ର ପାଇଁ ୪,୫୦୦ ଟଙ୍କା ଦିଆଯାଉଛି। ନିଯୁକ୍ତି ପାଇଁ ସେମାନଙ୍କ ଯୋଗ୍ୟତା ସର୍ବନିମ୍ନ ସ୍ନାତକ ରହିଥିବାବେଳେ ଚୟନ ପ୍ରକ୍ରିୟାରେ ସେମାନଙ୍କୁ ଉତ୍ତୀର୍ଣ୍ଣ ହେବାକୁ ପଡୁଛି। ସରକାରୀ ଚାକିରିରେ ଜଣେ ପିଅନ ଏବଂ କନିଷ୍ଠ କିରାଣି ପଦବୀରେ ମୂଳ ଦରମା ସହ ଡିଏ ଓ ବର୍ଦ୍ଧିତ ଘରଭଡ଼ା ଆଦି ମିଶି ମାସକୁ ୩୦,୦୦୦ ଟଙ୍କାରୁ ଅଧିକ ହେଉଛି। ସେମାନଙ୍କୁ ସରକାରୀ ଛୁଟି ସମେତ ଅନ୍ୟାନ୍ୟ ସୁବିଧାସୁଯୋଗ ପ୍ରଦାନ କରାଯାଉଛି। ହେଲେ ଅଙ୍ଗନଓ୍ବାଡି କର୍ମୀଙ୍କୁ ମାସିକ ୭,୫୦୦ ଟଙ୍କା ଦରମା ବ୍ୟତୀତ ଅନ୍ୟ କିଛି ସୁବିଧା ଦିଆଯାଉନାହିଁ। ବିଭିନ୍ନ ପଞ୍ଚାୟତ ସମ୍ପାଦକ ପୂର୍ବରୁ ମାସିକ ୫୦୦ ଟଙ୍କାରେ କାମ କରୁଥିବାବେଳେ ପରବର୍ତ୍ତୀ ସମୟରେ ସେମାନଙ୍କୁ ସରକାରୀ କର୍ମଚାରୀର ମାନ୍ୟତା ଦିଆଯିବା ସହ ପଞ୍ଚାୟତର ନିର୍ବାହୀ ଅଧିକାରୀ ଭାବେ ପଦଯୁକ୍ତ କରାଯାଇଛି। ଅଙ୍ଗନଓ୍ବାଡି କର୍ମୀମାନେ କେନ୍ଦ୍ର ଓ ରାଜ୍ୟ ସରକାରଙ୍କ ଅନୁଦାନରୁ ୬୦:୪୦ ଅନୁପାତରେ ଅତ୍ୟନ୍ତ କମ୍ ଦରମା ପାଉଛନ୍ତି। ତେଣୁ ତେଲେଙ୍ଗାନା, ଦିଲ୍ଲୀ, କର୍ନାଟକ, ତାମିଲନାଡୁ ଓ ମଧ୍ୟପ୍ରଦେଶ ରାଜ୍ୟ ଭଳି ଓଡ଼ିଶାରେ ଅଙ୍ଗନଓ୍ବାଡି କର୍ମୀମାନଙ୍କୁ ବର୍ଦ୍ଧିତ ଦରମା ସହ ଅବସରକାଳୀନ ଓ ଚାକିରିର ଅନ୍ୟାନ୍ୟ ସୁବିଧା ପ୍ରଦାନ କରାଯାଉ ବୋଲି ହାଇକୋର୍ଟଙ୍କୁ ନିବେଦନ କରାଯାଇଛି। ଏହି ମାମଲାରେ କେନ୍ଦ୍ର ସରକାରଙ୍କ ମହିଳା ଓ ଶିଶୁ ବିକାଶ ମନ୍ତ୍ରଣାଳୟର ପ୍ରମୁଖ ଶାସନ ସଚିବ, ରାଜ୍ୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ବିଭାଗର ପ୍ରମୁଖ ଶାସନ ସଚିବଙ୍କୁ ପକ୍ଷଭୁକ୍ତ କରାଯାଇଛି। ସବିତା ଦାସ, ମେନକା ଦାସ, ସୁଷମା ନାୟକ, ପ୍ରତିମା ବେହେରା, ସୁକାନ୍ତି କୋଥାଳଙ୍କ ପକ୍ଷରୁ ହାଇକୋର୍ଟରେ ଏହି ଆବେଦନ କରାଯାଇଛି।
