ନରସିଂହପୁର, ୪ା୮(ସ୍ବ.ପ୍ର.): ଅନ୍ଲାଇନରେ ବିଭିନ୍ନ ଘରକରଣାଠାରୁ ଆରମ୍ଭ କରି ନିତ୍ୟ ବ୍ୟବହାର୍ଯ୍ୟ ଜିନିଷ ଲୋକମାନେ ଘରେ ବସି ମଗାଉଛନ୍ତି। ହେଲେ କିଛି ଲୋକ ଠକାମିର ଶିକାର ହେଉଥିବା ଦେଖିବାକୁ ମିଳୁଛି। ଜଣେ ବ୍ୟକ୍ତି ଅନ୍ଲାଇନରେ ରେନିକୋଟ୍ ମଗାଇଥିବା ବେଳେ ପାର୍ସଲରୁ କିଛି ଜରି ଓ ଗାମୁଛାଟିଏ ବାହାରିଛି। କଟକ ଜିଲା ନରସିଂହପୁର ବ୍ଲକ ଅଧୀନ ନୀଳକଣ୍ଠପୁର ଗ୍ରାମର ସନ୍ତୋଷ କୁମାର ନାୟକ କ୍ଷେତ୍ରରେ ଏହା ଦେଖିବାକୁ ମିଳିଛି। ସନ୍ତୋଷ ଅନ୍ଲାଇନ ମାଧ୍ୟମରେ ଗତ ଜୁଲାଇ ୨୨ରେ ୩୯୫ ଟଙ୍କା ମୂଲ୍ୟର ଏକ ରେନିକୋଟ୍ ବୁକିଂ କରିଥିଲେ। ଗତ ୨ ତାରିଖରେ ଡେଲିଭରି ବଏ ଠାରୁ ପ୍ୟାକେଟକୁ ସନ୍ତୋଷ ରିସିଭ କରି ୩୯୫ ଟଙ୍କା ପୈଠ କରିଥିଲେ। କିଛି ସମୟ ପରେ ପ୍ୟାକେଟଟିକୁ ଖୋଲିବା ପରେ ପ୍ୟାକେଟ ଭିତରେ ଗୋଟିଏ ପଲିଥିନ ସହ ଗୋଟିଏ ଅଳ୍ପଦାମର ଗାମୁଛା ବାହାରିଥିଲା। ସଙ୍ଗେ ସଙ୍ଗେ ସେ ପାର୍ସଲ ଆଣି ଦେଇଥିବା ବ୍ୟକ୍ତିଙ୍କୁ ଯୋଗାଯୋଗ କରିବା ପରେ ଯେଉଁ ନମ୍ବରରେ ବୁକିଂ କରିଥିଲେ ସେହି ସାଇଡକୁ ଯାଇ ରିଟନର୍ର୍ ବୁକିଂ କରିବାକୁ କହିଥିଲେ। କିଛିଦିନ ପରେ ଏହା ରିଟର୍ନ ପାଇଁ ମେସେଜ ଆସିବ କହି ନିଜ ଉପରୁ ଦୋଷ ଖସାଇ ଦେଇଥିଲେ। ଅନ୍ଲାଇନ ଅର୍ଡର କରି ସାମଗ୍ରୀ ମଗାଇବା ଧାରା ଏବେ ବୃଦ୍ଧି ପାଉଥିବା ବେଳେ ଏହାକୁ ସତର୍କତାର ସହ କରିବାକୁ ଆଇନଜୀବୀ ଜ୍ଞାନ ରଞ୍ଜନ ନାୟକ କହିଛନ୍ତି।
