ନୂଆଦିଲ୍ଲୀ,୧୭।୧୨(ପି.ଟି.): ହକି ବିଶ୍ୱକପ ଟ୍ରଫି ଟୁର୍ର ନୂଆଦିଲ୍ଲୀ ପର୍ଯ୍ୟାୟ ଶୁକ୍ରବାର ଆରମ୍ଭ ହୋଇଛି। କେନ୍ଦ୍ର କ୍ରୀଡା ଓ ଯୁବ ବ୍ୟାପାର, ସୂଚନା ଓ ପ୍ରସାରଣ ବିଭାଗ ମନ୍ତ୍ରୀ ଅନୁରାଗ ଠାକୁର ଟ୍ରଫି ଉନ୍ମୋଚନ କରିଛନ୍ତି। ଏହି କାର୍ଯ୍ୟକ୍ରମ ହକି ବିଶ୍ୱକପରେ ଭାରତର ସଫଳତାକୁ ନେଇ ଆଶାବାଦୀ ଥିବା ନେଇ ପ୍ରକାଶ କରିଛନ୍ତି କ୍ରୀଡାମନ୍ତ୍ରୀ ଅନୁରାଗ ଠାକୁର। ଆସନ୍ତା ଜାନୁୟାରୀ ୧୩ରୁ ୨୯ ଯାଏ ଭୁବନେଶ୍ୱର ଓ ରାଉରକେଲାରେ ଏହି ବିଶ୍ୱକପ ଅନୁଷ୍ଠିତ ହେବ। ଟୋକିଓ ୨୦୨୦ରେ ଦଳର ପ୍ରଦର୍ଶନ ଆଉ ଆତ୍ମବିଶ୍ୱାସ ବଳରେ ଭାରତ ଚଳିତ ଟୁର୍ନାମେଣ୍ଟରେ ଚମତ୍କାର ପ୍ରଦର୍ଶନ କରିବ ବୋଲି ଅନୁରାଗ ମତ ରଖିଛନ୍ତି। ବିଶ୍ୱର ଅନ୍ୟ ୧୫ ଦଳକୁ ଚ୍ୟାଲେଞ୍ଜ ଦେବା ପାଇଁ ଭାରତ ପ୍ରସ୍ତୁତ ବୋଲି ଅନୁରାଗ କହିଛନ୍ତି। ଭାରତୀୟ ଦଳର ପ୍ରସ୍ତୁତି ବେଶ ଚମତ୍କାର ରହିଛି। ତେଣୁ ପ୍ରସ୍ତୁତିକୁ ଦେଖିଲେ କହି ହେବ କି କେବଳ ବିଶ୍ୱକପ ନୁହେଁ ପ୍ୟାରିସ୍ ୨୦୨୪ରେ ମଧ୍ୟ ଦଳ ଭଲ ପ୍ରଦର୍ଶନ କରିବ। ଭାରତ ଶେଷ ଥର ପାଇଁ ୧୯୭୫ ବିଶ୍ୱକପରେ ଚାମ୍ପିୟନ୍ ଆଖ୍ୟା ଅର୍ଜନ କରିଥିଲା। ଭାରତ ଉକ୍ତ ସଫଳତା ପୁନର୍ବାର ଦୋହରାଇବ ବୋଲି ଠାକୁର କହିଛନ୍ତି। କେବଳ ଠାକୁର ନୁହନ୍ତି ପୂର୍ବତନ ଭାରତୀୟ ଅଧିନାୟକ ଜାଫର ଇକ୍ବାଲ ମଧ୍ୟ ସମାନ ମତ ଦେଇଛନ୍ତି। ୧୯୭୫ ଦଳର ଅଧିନାୟକ ଅଜିତ୍ ପାଲ ସିଂ ମଧ୍ୟ ସମାନ ମତ ଦେଇଛନ୍ତି। ଟୁର୍ନାମେଣ୍ଟରେ କାହାକୁ ଫେବରିଟ୍ କହିବା କଷ୍ଟ ମାତ୍ର ଭାରତର ପୋଡିୟମ ଫିନିଶ ସମ୍ଭାବନା ଅଧିକ ବୋଲି ସେ କହିଛନ୍ତି।
