୨୦୧୪ରେ ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଭାଜପା ସରକାର କେନ୍ଦ୍ରରେ କ୍ଷମତାସୀନ ହେବା ପରଠାରୁ ଭାରତରେ ସଂଖ୍ୟାଲଘୁ ମୁସଲମାନ ଓ ଆଦିବାସୀ ସମୁଦାୟ ବିରୋଧରେ ହିଂସା ବଢ଼ିବାରେ ଲାଗିଥିବା ୨୦୨୧ରେ ଆମେରିକା ଏକ ମାନବାଧିକାର ରିପୋର୍ଟରେ ଦର୍ଶାଇଥିଲା। ସେହିପରି ୟୁଏସ୍ କମିଶନ ଅନ୍ ଇଣ୍ଟରନ୍ୟାଶନାଲ ରିଲିଜିଅସ୍ ଫ୍ରିଡମ୍ ପକ୍ଷରୁ ଚଳିତ ବର୍ଷ ପ୍ରକାଶିତ ରିପୋର୍ଟରେ ମଧ୍ୟ ଭାରତରେ ଜାତି ଓ ଧର୍ମ ଭିତ୍ତିକ ସ୍ବାଧୀନତା ନଷ୍ଟ ହେବାରେ ଲାଗିଥିବା କୁହାଯାଇଛି।
ଗତ ଏପ୍ରିଲ ୧୬ରେ ଉତ୍ତର-ପଶ୍ଚିମ ଦିଲ୍ଲୀର ଜାହାଙ୍ଗୀରପୁରୀରେ ହନୁମାନ ଜୟନ୍ତୀ ପାଳନ ଉପଲକ୍ଷେ ଶୋଭାଯାତ୍ରା ଚାଲିଥିବାବେଳେ ଏକ ମସ୍ଜିଦ ନିକଟରେ ଲୋକଙ୍କ ଉପରକୁ ଟେକାମାଡ଼ ହୋଇଥିଲା। ଏହି ସାମ୍ପ୍ରଦାୟିକ ଦଙ୍ଗା ପରେ ମୁସଲମାନମାନଙ୍କ ଘରଗୁଡ଼ିକୁ ବୁଲ୍ଡୋଜର ମଡ଼ାଇ ଭାଙ୍ଗି ଦିଆଯାଇଥିଲା। ୨୦ ତାରିଖରେ ଉଚ୍ଛେଦ ପ୍ରକ୍ରିୟା ବନ୍ଦ କରିବାକୁ ସୁପ୍ରିମକୋର୍ଟଙ୍କ ନିର୍ଦ୍ଦେଶକୁ କେନ୍ଦ୍ର ସରକାରଙ୍କ ଅଧୀନରେ ଥିବା ଦିଲ୍ଲୀ ପୋଲିସ ଏବଂ ଉତ୍ତର ଦିଲ୍ଲୀ ମହାନଗର ନିଗମ (ଏନ୍ଏମ୍ଡିସି)ର ଭାଜପା ମେୟର ରାଜା ଇକ୍ବାଲ ସିଂ ମାନି ନ ଥିଲେ।
ଭାଜପା ଶାସିତ କର୍ନାଟକର କେତେକ ଶିକ୍ଷାନୁଷ୍ଠାନରେ ଗତ ଫେବୃୟାରୀ-ମାର୍ଚ୍ଚରେ ମୁସଲମାନ ଛାତ୍ରୀମାନଙ୍କୁ ହିଜାବ ପିନ୍ଧିବାକୁ ବାରଣ କରାଯାଇଥିଲା। ଏହି ବିବାଦ ଥମି ନ ଥିବାବେଳେ ଗୁରୁବାର ଦକ୍ଷିଣ କନ୍ନଡ ଜିଲାରେ ଅନୁରୂପ ଘଟଣା ଦେଖିବାକୁ ମିଳିଛି। ତାଗିଦ୍ ସତ୍ତ୍ୱେ ହିଜାବ ପିନ୍ଧି ଆସିଥିବା ୬ ଜଣ ଛାତ୍ରୀଙ୍କୁ ଉପିନାଙ୍ଗଡ଼ି ସରକାରୀ ପ୍ରିୟୁନିଭର୍ସିଟି କଲେଜ କର୍ତ୍ତୃପକ୍ଷ ନିଲମ୍ବନ କରିଛନ୍ତି। ସେହିପରି ମାଙ୍ଗାଲୁରୁ ୟୁନିଭର୍ସିଟି କଲେଜର ୧୬ ଛାତ୍ରୀ ହିଜାବ ପିନ୍ଧି ଆସି ସେମାନଙ୍କୁ ପ୍ରବେଶ ଅନୁମତି ଦେବାକୁ ଦାବି କରିଥିଲେ। କଲେଜ କର୍ତ୍ତୃପକ୍ଷ ସେମାନଙ୍କୁ ଅନୁମତି ନ ଦେବା ସହ ୧୨ ଜଣଙ୍କୁ ଫେରାଇ ଦେଇଛନ୍ତି।
ଗତ ମେ’ ୧୮ରେ ମଧ୍ୟପ୍ରଦେଶର ନୀମଚ୍ ଜିଲାରେ ଜଣେ ୬୫ ବର୍ଷୀୟ ବ୍ୟକ୍ତିଙ୍କୁ ମୁସଲମାନ ବୋଲି ସନ୍ଦେହ କରି ସ୍ଥାନୀୟ ଭାଜପା ନେତା ଦୀନେଶ କୁଶଓ୍ବାହ ଆଧାର କାର୍ଡ ମାଗିଥିଲେ। ବୃଦ୍ଧ ଭନଓ୍ବରଲାଲ ଜୈନ ଆଧାର କାର୍ଡ ଦେଖାଇ ନ ପାରିବାରୁ ଦୀନେଶ ତାଙ୍କୁ ମାଡ଼ ମାରିଥିଲେ। ଏଥିରେ ତାଙ୍କର ମୃତ୍ୟୁ ଘଟିଥିଲା। ଭନଓ୍ବରଲାଲ ଥିଲେ ପଡ଼ୋଶୀ ରାଜସ୍ଥାନ ଅନ୍ତର୍ଗତ ଚିତ୍ତୋରଗଡ଼ ଜିଲା ନିବାସୀ। ସେ ମାନସିକ ଅସୁସ୍ଥ ଥିଲେ ଏବଂ ଦୁଇଦିନ ପୂର୍ବରୁ ନିଜ ଗାଁରୁ ନିଖୋଜ ହୋଇଯାଇଥିଲେ।
