ରଘୁନାଥପୁର,୧୯। ୩ (ଡି.ଏନ୍.ଏ.): ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ କେରେକେରାସ୍ଥିତ ବିଭୂତିକ୍ଷେତ୍ର ପ୍ରଭୁ ଗୋରେଖନାଥଙ୍କ ପୀଠରେ ୨୦୨୨ ଜୁଲାଇ ୧୯ରୁ ଭକ୍ତଙ୍କ ପାଇଁ ଉଦ୍ଦିଷ୍ଟ ମାନସିକ ରୋଷଭୋଗ ତଥା ପ୍ରସାଦ ବ୍ୟବସ୍ଥା ପୀଠ ପ୍ରଶାସନ ପକ୍ଷରୁ ବନ୍ଦ କରିଦିଆଯାଇଛି। ୧୦୦ ବର୍ଷର ଏହି ପରମ୍ପରାକୁ ବନ୍ଦ କରି ଦିଆଯାଇଥିବାରୁ ଭକ୍ତଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି। ଏନେଇ ଶନିବାର ୫୦ରୁ ଊର୍ଦ୍ଧ୍ୱ ମହିଳା ଓ ପୁରୁଷ ପୀଠ କାର୍ଯ୍ୟନିର୍ବାହୀ ଅଧିକାରୀ ସୌମ୍ୟରଞ୍ଜନ ପରିଜାଙ୍କୁ ଅଭିଯୋଗପତ୍ର ପ୍ରଦାନ କରିଛନ୍ତି। ଭକ୍ତଙ୍କ ଭାବଧାରା ପ୍ରତି ଦୃଷ୍ଟି ଦିଆ ନ ଗଲେ ଆଗାମୀଦିନରେ ଆନ୍ଦୋଳନ କରାଯିବ ବୋଲି ସେମାନେ ଚେତାବନୀ ଦେଇଛନ୍ତି। ଏ ସମ୍ପର୍କରେ ପୂଜକ ଦିଲୀପ କୁମାର ପଣ୍ଡା କୁହନ୍ତି, ଦୀର୍ଘଦିନରୁ ରୋଷଭୋଗ ଭଳି ପ୍ରଚଳିତ ପରମ୍ପରାକୁ ବନ୍ଦ କରି ଭକ୍ତଙ୍କ ଭକ୍ତି ଭାବନା ପ୍ରତି କୁଠାରାଘାତ କରାଯାଇଛି। ଏହା ହିନ୍ଦୁଧର୍ମ ପାଇଁ ଆଦୌ ଶୁଭଙ୍କର ନୁହେଁ ବୋଲି ମାନସ ଦାସ କହିଛନ୍ତି। ସେହିପରି ବୁଦ୍ଧିଜୀବୀ ସୁରେଶ ମଲ୍ଲ, ଭକ୍ତବତ୍ସଳ ବେହେରା, ମନୋରଞ୍ଜନ ଜେନା ଓ ସତ୍ୟବ୍ରତ ତ୍ରିପାଠୀ ପ୍ରମୁଖ ଅଧିକାରୀ ପରିଜାଙ୍କଠାରୁ ଏ ସମ୍ପର୍କରେ ସ୍ପଷ୍ଟୀକରଣ ଚାହିଁଥିଲେ। ଏ ପ୍ରସଙ୍ଗରେ ପରିଜା କହିଥିଲେ, ଏହା ତାଙ୍କ କର୍ତ୍ତୃତ୍ୱରୁ ବାହାରେ ଏବଂ ଅଭିଯୋଗପତ୍ର କମିଶନରଙ୍କୁ ପ୍ରଦାନ କରାଯିବ। ପ୍ରଭୁଙ୍କ ଜନ୍ମୋତ୍ସବରେ ହୋଇଥିବା ସାଂସ୍କୃତିକ କାର୍ଯ୍ୟକ୍ରମ ପେମେଣ୍ଟରେ ୩୦ ହଜାର ଟଙ୍କା ହଡ଼ପ କରାଯାଇଥିବା ଅଭିଯୋଗ ହୋଇଥିଲା। ଏଥିସହ ପୀଠ ପୁଷ୍କରଣୀର ପୁନରୁଦ୍ଧାର, ଚପଲ ଷ୍ଟାଣ୍ଡ, ଦର୍ଶନ ସମୟରେ ମହାପ୍ରଭୁଙ୍କ ଫାଟକ ଉନ୍ମୁକ୍ତ ରଖାଯିବା ସହ ବିବାହ ଓ ବ୍ରତ ଆଦିରେ ଲୋକଙ୍କୁ ଘର ଯୋଗାଇଦେବା ପାଇଁ ଅଭିଯୋଗକାରୀ ଦାବି କରିଥିଲେ। ଆସନ୍ତା ଗୁରୁବାର ମଧ୍ୟରେ ସେବକ, ଅଞ୍ଚଳବାସୀଙ୍କ ସହ ପ୍ରସାଦ ବ୍ୟବସ୍ଥା ଓ ଅନ୍ୟାନ୍ୟ ସମସ୍ୟା ସମ୍ପର୍କରେ ଆଲୋଚନା କରି ନିଷ୍ପତ୍ତି ଜଣାଇବାକୁ ପୀଠ ଉପଦେଷ୍ଟା ଦାୟିତ୍ୱରେ ଥିବା ପ୍ରଶାନ୍ତ ଭୂୟାଁ ଓ ସୁଶାନ୍ତ କୁମାର ଦାଶଙ୍କୁ ଅଧିକାରୀ ପରିଜା କହିଥିଲେ। ଅଭିଯୋଗପତ୍ର ପ୍ରଦାନବେଳେ ବିନି ସାମନ୍ତରାୟ, ଅନୁରାଧା ମହାନ୍ତି, କ୍ଷୀରବାଳା ଦାସ, ସୁଲୋଚନା ଦାସ, ସବିତା ଗୁରୁ, ବାସନ୍ତୀ ଦାସ, କଣ୍ଢେଇ ଦାସ, ସବିତା ଦାସଙ୍କ ସହ ଅନ୍ୟ ମହିଳାମାନେ ଉପସ୍ଥିତ ଥିଲେ।
