ନିମାପଡ଼ା,୨୦।୯(ଡି.ଏନ୍.ଏ.): ଭୁବନେଶ୍ୱରରୁ ଦୈନିକ ନିମାପଡ଼ା-କୋଣାର୍କ ରୁଟ୍ରେ ୮ଟି ମୋ ବସ୍ ଚଳାଚଳ କରୁଛି। ହେଲେ ଉକ୍ତ ରାସ୍ତାରେ ମୋ ବସ୍ଗୁଡ଼ିକର ରୋଡ୍ ପରମିଟ୍ ନ ଥାଇ ଓ ସମୟ ନ ମାନି ମନମୁଖି ଭାବେ ଯାତାୟାତ କରୁଥିବା ନିମାପଡ଼ା ଘରୋଇ ବସ୍ ମାଲିକ ସଂଘ ପକ୍ଷରୁ ଅଭିଯୋଗ କରାଯାଇଛି। ମନଇଚ୍ଛା ମୋ ବସ୍ଗୁଡ଼ିକ ନିମାପଡ଼ା-କୋଣାର୍କ ରୁଟ୍ରେ ଚଳାଚଳ କରୁଥିବାରୁ ନିମାପଡ଼ା ଅଞ୍ଚଳର ପ୍ରାୟ ୫୦ଟି ଘରୋଇ ବସ୍ର ମାଲିକମାନେ କ୍ଷତିର ସମ୍ମୁଖୀନ ହେଉଛନ୍ତି। ବସ୍ଗୁଡ଼ିକର ସମୟ ସାରଣୀକୁ କେନ୍ଦ୍ରକରି ମୋ ବସ୍ କର୍ମଚାରୀ ଓ ଘରୋଇ ବସ୍ କର୍ମଚାରୀଙ୍କ ମଧ୍ୟରେ ତୀବ୍ର ବିବାଦ ଦେଖାଦେଇଛି। କରୋନା ଯୋଗୁ ଗତ ୨ବର୍ଷ ହେଲା ଘରୋଇ ବସ୍ର ମାଲିକମାନେ ଦେବାଳିଆ ହୋଇପଡ଼ିଥିବାରୁ ବସ୍ର ଟିକସ ପୈଠ କରିବା ଓ କର୍ମଚାରୀଙ୍କୁ ଦରମା ଦେବାକୁ ଅସମର୍ଥ ହୋଇପଡ଼ିଛନ୍ତି। ଏ ଅଞ୍ଚଳର ଯାତ୍ରୀମାନଙ୍କର ଗମନାଗମନ ସୁବିଧା ଦୃଷ୍ଟିରୁ ସରକାର ମୋ ବସ୍ ସେବା ଯୋଗାଇ ଦେଇଥିବା ସ୍ବାଗତଯୋଗ୍ୟ ପଦକ୍ଷେପ। ହେଲେ ରୋଡ୍ ପର୍ମିଟ ନ ଥିବା ଓ ନିର୍ଦ୍ଧାରିତ ସମୟ ସାରଣୀକୁ ନ ମାନି ମନଇଚ୍ଛା ମୋ ବସ୍ରେ ଯାତ୍ରୀ ପରିବହନ କରିବା ଅତ୍ୟନ୍ତ ଦୁର୍ଭାଗ୍ୟଜନକ ବିଷୟ ବୋଲି ନିମାପଡ଼ାର ଘରୋଇ ବସ୍ ମାଲିକ ସନ୍ତୋଷ କୁମାର ସେନାପତି, ସନ୍ଦୀପ କୁମାର ସ୍ବାଇଁ, ପ୍ରକାଶ ଚନ୍ଦ୍ର ମହାନ୍ତି, ବିଜୟ ମିଶ୍ର ପ୍ରମୁଖ କହିଛନ୍ତି। ବିନା ପର୍ମିଟରେ ଭୁବନେଶ୍ୱରରୁ ନିମାପଡ଼ା, କୋଣାର୍କ ରୁଟ୍ରେ ମୋ ବସ ଚଳାଚଳକୁ ତୁରନ୍ତ ବନ୍ଦ କରାଯିବାକୁ ଉପରୋକ୍ତ ଘରୋଇ ବସ୍ ମାଲିକମାନେ ରାଜ୍ୟ ପରିବହନ ମନ୍ତ୍ରୀ, ସଚିବଙ୍କ ନିକଟରେ ଦାବି କରିଛନ୍ତି। ମୋ ବସ୍ ଚଳାଚଳର ଏଭଳି ବେପରୁଆ କାର୍ଯ୍ୟ ସମ୍ପର୍କରେ ନିମାପଡ଼ା ଘରୋଇ ବସ୍ ମାଲିକ ସଂଘର କର୍ମକର୍ତ୍ତାମାନେ ରାଜ୍ୟ ପରିବହନ କମିଶନର, ସଚିବ, ପୁରୀ ଜିଲାପାଳ, କ୍ୟାପିଟାଲ ରିଜନ ଅର୍ବାନ ଟ୍ରାନ୍ସପୋର୍ଟ (କ୍ରୁଟ)କର୍ତ୍ତୃପକ୍ଷଙ୍କୁ ଅବଗତ କରିଛନ୍ତି।
ମୋ ବସ୍ କର୍ମଚାରୀ ଓ ଘରୋଇ ବସ୍ ମାଲିକଙ୍କ ବିବାଦ ସମ୍ପର୍କରେ ପ୍ରଶାସନର ଉଚ୍ଚ କର୍ତ୍ତୃପକ୍ଷ ଓ ନିମାପଡ଼ା ଥାନାରେ ବାରମ୍ବାର ଅଭିଯୋଗ କରାଯାଇଛି। ହେଲେ ପ୍ରଶାସନିକ ହେୟ ମନୋଭାବ ଯୋଗୁ ବିବାଦର ସ୍ଥାୟୀ ସମାଧାନ ହୋଇପାରୁ ନାହିଁ। ପ୍ରଶାସନ ଓ ପରିବହନ ବିଭାଗ କର୍ତ୍ତୃପକ୍ଷ ଏ ଦିଗରେ ଦୃଷ୍ଟି ଦେଇ ତୁରନ୍ତ ସମାଧାନ କରିବା ଓ ବିନା ପରମିଟ୍ରେ ନିମାପଡ଼ା- କୋଣାର୍କ ରୁଟ୍ରେ ଆସୁଥିତ୍ବା ମୋ ବସ୍ଗୁଡ଼ିକୁ ବନ୍ଦ କରିବାକୁ ନିମାପଡ଼ା ଘରୋଇ ବସ୍ ମାଲିକ ସଂଘ ସଭାପତି ବିଚିତ୍ରାନନ୍ଦ ଖଟୋଇ, ସମ୍ପାଦକ ସୁନୀଲ ପରିଜା, ଷ୍ଟାଣ୍ଡ ସମ୍ପାଦକ ସରୋଜ ସାହୁ, ଉପଦେଷ୍ଟା ଅଜୟ ମିଶ୍ର, ସନ୍ତୋଷ ସେନାପତି ପ୍ରମୁଖ ଦାବି କରିଛନ୍ତି। ଯଦି ଆସନ୍ତା ୩ ଦିନ ମଧ୍ୟରେ ପ୍ରଶାସନ ଓ ପରିବହନ ବିଭାଗ ଏ ଦିଗରେ ଦୃଷ୍ଟି ନ ଦିଅନ୍ତି, ତେବେ ନିମାପଡ଼ା ଘରୋଇ ବସ୍ ମାଲିକ ସଂଘ ପକ୍ଷରୁ ଆସନ୍ତା ୨୪ତାରିଖରେ ନିମାପଡ଼ା ବସ୍ଷ୍ଟାଣ୍ଡ ସମ୍ମୁଖରେ ରାସ୍ତାରୋକୋ କରାଯିବ ବୋଲି ବସ୍ ମାଲିକ ସଂଘ କର୍ମକର୍ତ୍ତାମାନେ ଚେତାବନୀ ଦେଇଛନ୍ତି। ଏ ସମ୍ପର୍କରେ ଭୁବନେଶ୍ୱରର ମୋ ବସ୍ ସେବାର ଅପରେଶନ ମ୍ୟାନେଜର ଭବାନୀଶଙ୍କର ମହାରଣା କହିଛନ୍ତି, ନିମାପଡ଼ା- କୋଣାର୍କ ରୋଡ୍ ପରମିଟ ମୋ ବସ୍ ପାଇଁ ରହିଛି। ଯେଉଁ ନିମାପଡ଼ା ଘରୋଇ ବସ୍ ମାଲିକ ସଂଘ ସହ ମୋ ବସ୍ କର୍ମଚାରୀଙ୍କ ମଧ୍ୟରେ ଦେଖାଦେଇଥିତ୍ବା ବିବାଦ ସମ୍ପର୍କରେ କ୍ରୁଟର ଉଚ୍ଚ କର୍ତ୍ତୃପକ୍ଷଙ୍କୁ ଅବଗତ କରିଛି।
