କେନ୍ଦୁଝର,୨୦ା୧(ସ୍ବ.ପ୍ର.): କେନ୍ଦୁଝର ଜିଲା ସଦର ତହସିଲ ଅନ୍ତର୍ଗତ ନୂଆଗାଁ ପଞ୍ଚାୟତ ବିରକିଶୋରପୁର ଗ୍ରାମରେ ସରକାରୀ ଜମିର କିସମ ପରିବର୍ତ୍ତନ ପାଇଁ ଗ୍ରାମବାସୀଙ୍କୁ ନୋଟିସ୍ କରାଯାଇଛି। ଜମିକୁ ଇଡ୍କୋ ମାଧ୍ୟମରେ ଅଧିଗ୍ରହଣ ପରେ ଏକ ଇସ୍ପାତ କାରଖାନା ପାଇଁ ହସ୍ତାନ୍ତର କରାଯିବ। ଏଥିପାଇଁ କିସମ ପରିବର୍ତ୍ତନ ଓ ଜବରଦଖଲ ଉଚ୍ଛେଦ ପାଇଁ ସର୍ବସାଧାରଣ ଇସ୍ତାହାର କରାଯାଇଛି। ନୋଟିସ୍ରେ ପଥରବଣି, ଜଳାଶୟ, ନାଳ କିସମ, ଗୋଦାଣ୍ଡ, ରାସ୍ତା, ପର୍ବତ, ଝାଟି ଜଙ୍ଗଲ, ନୟନଝରି ଓ ଦାଣ୍ଡ ରହିିଛି। ଫଳରେ ଗ୍ରାମବାସୀ ଏହାକୁ ବିରୋଧ କରି ଗୁରୁବାର ସଦର ତହସିଲାଦାରଙ୍କ କାର୍ଯ୍ୟାଳୟ ଘେରାଉ କରି ପ୍ରତିବାଦ କରିଛନ୍ତି।
ଅଭିଯୋଗ ମୁତାବକ, ଉକ୍ତ ଜମି ନ ଦେବାକୁ ଗ୍ରାମବାସୀ ପୂର୍ବରୁ ବିରୋଧ କରି ଆସୁଛନ୍ତି। ଗ୍ରାମର ଅନେକ ଲୋକଙ୍କ କମ ଜମି ଥିବାରୁ ଅଧିଗ୍ରହଣ ହେଲେ ଲୋକଙ୍କ ଜୀବନଜୀବିକା ପ୍ରଭାବିତ ହେବ। ସେହିପରି ଜଳାଶୟ ମାନଙ୍କରେ ଲୋକମାନେ ଶ୍ନାନ, ଶୌଚ କରିବା ସହ ଗୃହପାଳିତ ପଶୁ ପାଣି ପିଉଥିଲେ। କିସମ ପରିବର୍ତ୍ତନ ହେଲେ ଜଳ ସମସ୍ୟା ଦେଖାଦେବ ବୋଲି କହିଛନ୍ତି। ଉକ୍ତ ଅଞ୍ଚଳରେ ୪ଟି କାରଖାନା ରହିଥିବାରୁ ବହୁ ପରିମାଣର ବାୟୁ ଏବଂ ଜଳ ପ୍ରଦୂଷଣ ହେଉଛି। ଏଣୁ ଏଠାରେ ଆଉ କାରଖାନା ହେଲେ ପ୍ରଦୂଷଣ ମାତ୍ରା ବଢ଼ିବ ବୋଲି କହିଛନ୍ତି। ସେହିପରି ଉକ୍ତ ଅଞ୍ଚଳରେ ଥିବା ପାହାଡ଼ରେ ବୃକ୍ଷଲତା, ଜଡ଼ିବୁଟି ତଥା ବସବାସ କରୁଥିବା ବନ୍ୟପ୍ରାଣୀ କ୍ଷତିଗସ୍ତ ହେବା ସହ ବାସସ୍ଥଳୀ ହରାଇବେ। ଏଠାରେ କାରଖାନା ହେଲେ ଜଳାଶୟ ଓ ବନ୍ଧ କ୍ଷତିଗସ୍ତ ହେବା ସହ ଜଳସ୍ତର ହ୍ରାସ ପାଇବ। ଫଳରେ ଜଳ ସମସ୍ୟା ସାଙ୍ଗକୁ ଚାଷବାସରେ ସମସ୍ୟା ଦେଖାଦେବ ବୋଲି କହିଛନ୍ତି। ଜମି ଇଡ୍କୋ ଜରିଆରେ ଅଧିଗ୍ରହଣ ହେବାକୁ ଯାଉଥିବାରୁ ତହସିଲ ପକ୍ଷରୁ ଗ୍ରାମବାସୀଙ୍କ ମତାମତ ପାଇଁ ୩୧ ଡିସେମ୍ବରରେ ନୋଟିସ୍ କରିଥିଲେ। ତେବେ ନୋଟିସ୍ ଜାନୁୟାରୀ ୧୨ରେ ସେମାନଙ୍କୁ ପ୍ରୋସେସ ସର୍ଭର ଦ୍ୱାରା ପ୍ରଦାନ କରାଯାଇଛି। ୧୫ ରୁ ୩୦ ଦିନ ମଧ୍ୟରେ ମତାମତ ଦେବାକୁ କୁହାଯାଇଛି। ଏନେଇ ଅଧିକ ସମୟ ଦେବାକୁ ସେମାନେ ଦାବି କରିଛନ୍ତି। ଇଡ୍କୋ ଜମି ମାଗିଥିବାରୁ ଉକ୍ତ ଅଞ୍ଚଳରେ ଥିବା ସରକାରୀ ଜମି ଚିହ୍ନଟ କରାଯାଇଛି। ସେସବୁ ନେଇ ଲୋକଙ୍କ କୌଣସି ଅଭିଯୋଗ ଥିଲେ ଆହ୍ବାନ କରାଯାଇଛି। ଏଣୁ ଲୋକମାନେ ଅଭିଯୋଗ ଦାଖଲ କରିବାକୁ ଆସିଥିଲେ ବୋଲି ସଦର ତହସିଲଦାର ଆଶୀଷ ମହାପାତ୍ର କହିଛନ୍ତି।
