ଯାଜପୁର ଅଫିସ,୯ା୧୨: ଭାରତୀୟ ଚିକିତ୍ସା କେନ୍ଦ୍ରୀୟ ପରିଷଦ ଓ କେନ୍ଦ୍ରୀୟ ନୀତି ଆୟୋଗ ଦ୍ୱାରା ଜାରି ବିଜ୍ଞପ୍ତିକୁ ଭାରତୀୟ ଚିକିତ୍ସକ ସଂଘ ଯାଜପୁରରୋଡ ଶାଖା ପକ୍ଷରୁ ବିରୋଧ କରାଯାଇଛି। ଏହିକ୍ରମରେ ମଙ୍ଗଳବାର ଯାଜପୁରରୋଡ୍ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ଡୁବୁରୀସ୍ଥିତ ମେଡିକା ଚିକିତ୍ସାଳୟଠାରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ସଂଘ ସଦସ୍ୟ ଉପସ୍ଥିତ ଜନସାଧାରଣଙ୍କୁ ଏହି ବିଜ୍ଞପ୍ତିର କୁପରିଣାମ ସମ୍ବନ୍ଧରେ ଅବଗତ କରାଇଥିଲେ। ଜଣେ ଆୟୁର୍ବେଦିକ ଚିକିତ୍ସକ ଯାହାଙ୍କର ଶିକ୍ଷାର ମୂଳମନ୍ତ୍ର ଏକଦମ ଅଲଗା କିପରି ମାତ୍ର ୨ ବର୍ଷର ଶଲ୍ୟ ପ୍ରଶିକ୍ଷଣପ୍ରାପ୍ତ ହେବା ପରେ ସାଧାରଣ ଓ ସୁପର ସ୍ପେସିଆଲିଟି ଅପରେଶନ କରିବାକୁ ସକ୍ଷମ ହେବେ ସେ ନେଇ ପ୍ରଶ୍ନ କରାଯାଇଥିଲା। ଅପରେଶନ ପରେ ରୋଗୀ ଏଲୋପାଥିକ ନା ଆୟୁର୍ବେଦିକ ଔଷଧ ସେବନ କରିବେ। ଅପରେଶନ ପାଇଁ ଆବଶ୍ୟକ ନିଶା ଏଲୋପାଥିକ ନିଶ୍ଚେତକ ନା ଆୟୁର୍ବେଦିକ ଚିକିତ୍ସକ ଦେବେ। ଏପରି ବିଭ୍ରାନ୍ତିକର ପରିସ୍ଥିତି ସୃଷ୍ଟି କରି ସରକାର ଜନସାଧାରଣଙ୍କ ସ୍ବାସ୍ଥ୍ୟ ସହିତ ଖେଳ ଖେଳୁଛନ୍ତି ବୋଲି ସଂଘର ସଦସ୍ୟମାନେ କହିଥିଲେ। ପ୍ରତିବାଦ ସତ୍ତ୍ବେ ସରକାର ଯଦି ଏହି ଜନସାଧାରଣ ବିରୋଧୀ ବିଜ୍ଞପ୍ତିକୁ ବାତିଲ ନ କରନ୍ତି ତେବେ ଆସନ୍ତା ୧୧ତାରିଖ ସକାଳ ୬ଟାଠାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ସମସ୍ତ ବେସରକାରୀ ଓ ସରକାରୀ ଚିକିତ୍ସାଳୟ ବନ୍ଦ ରହିବ ଏବଂ କଣସି ଅଣକୋଭିଡ୍ ଚିକିତ୍ସା କରାଯିବ ନାହିଁ ବୋଲି ପ୍ରତିବାଦ ସମୟରେ ଚେତାବନୀ ଦିଆଯାଇଥିଲା। ଏଥିରେ ଜନସାଧାରଣଙ୍କ ନିମନ୍ତେ ଯେଉଁ ଅସୁବିଧା ସୃଷ୍ଟି ହେବ ସେଥିପାଇଁ ସରକାର ଦାୟୀ ରହିବେ ବୋଲି କୁହାଯାଇଥିଲା। ବିକ୍ଷୋଭରେ ସଂଘ କେନ୍ଦ୍ରୀୟ କାର୍ଯ୍ୟକାରିଣୀ ସଦସ୍ୟ ଡା. ପ୍ରସନ୍ନ କୁମାର ସାହୁ, ସଭାପତି ଡା. ହେମନ୍ତ କିଶୋର ସାହୁ, ସମ୍ପାଦକ ଡା. ଗୌରୀ ଶଙ୍କର ଷଡ଼ଙ୍ଗୀ, ନୃସିଂହଚରଣ ପରିଡା, ଡା. ସୁଦେଷ୍ଣା ଷଡ଼ଙ୍ଗୀ, ଡା. ସନ୍ତୋଷ କୁମାର ପୃଷ୍ଟି, ଡା. ଅନ୍ତର୍ଯ୍ୟାମୀ ସାହୁ, ଡା. ବିକ୍ରମାନନ୍ଦ ମହାରଣା, ଡା. ଆଦ୍ୟା ଅନିନ୍ଦିତା, ମେଡିକା ହସ୍ପିଟାଲର ଶୁଭ୍ରାଂଶୁ ଶେଖର ସୂତାର, ଡା. ଜୟନ୍ତ ବୈଦ୍ୟ, ଡା. କୁନାଳ ଗୁପ୍ତା ପ୍ରମୁଖ ଚିକିତ୍ସକ ଭାଗ ନେଇଥିଲେ।
