ନୂଆଦିଲ୍ଲୀ,୨୫ା୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବୁଧବାର କେନ୍ଦ୍ର କ୍ୟାବିନେଟ ବୈଠକ ବସି ମହାକାଶ କ୍ଷେତ୍ରରେ ବଡ଼ ସଂସ୍କାର ଆଣିବା ଲାଗି ଐତିହାସିକ ନିଷ୍ପତ୍ତି ନିଆଯାଇଛି। କ୍ୟାବିନେଟର ଏହି ଅନୁମୋଦନ ଫଳରେ ମହାକାଶ ସମ୍ପତ୍ତି ସମସ୍ତଙ୍କ ପାଇଁ ମୁକ୍ତ ରହିବ ଏବଂ ମହାକାଶ କାର୍ଯ୍ୟକ୍ରମର ସବୁ ବିଭାଗରେ ଘରୋଇ ସେକ୍ଟର ଅଂଶଗ୍ରହଣ କରିବାର ସୁଯୋଗ ପାଇବେ। ଏଥିପାଇଁ ଇଣ୍ଡିଆନ ନ୍ୟାଶନାଲ ସ୍ପେସ୍ ପ୍ରମୋଶନ ଆଣ୍ଡ ଅଥରାଇଜେଶନ (ଆଇଏନ୍-ସ୍ପେସ୍) ନାମରେ ନୂଆ ମହାକାଶ ବୋର୍ଡ ପ୍ରତିଷ୍ଠା ପ୍ରସ୍ତାବକୁ କ୍ୟାବିନେଟ ଅନୁମୋଦନ କରିଛି। କ୍ୟାବିନେଟ ବୈଠକ ଶେଷରେ ଗଣମାଧ୍ୟମକୁ ସୂଚନା ଦେଇ କେନ୍ଦ୍ରମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି, ଭାରତକୁ ଆତ୍ମନିର୍ଭର କରିବା ସହ ପ୍ରଯୁକ୍ତି କ୍ଷେତ୍ରରେ ଅତ୍ୟାଧୁନିକ କରାଇବା ନେଇ ପ୍ରଧାନମନ୍ତ୍ରୀଙ୍କର ସ୍ବପ୍ନକୁ ସାକାର କରିବା ଲାଗି ଏଭଳି ନିଷ୍ପତ୍ତି ନିଆଯାଇଛି। ନୂତନ ବୋର୍ଡ ଘରୋଇ କମ୍ପାନୀଗୁଡ଼ିକୁ ଭାରତୀୟ ମହାକାଶ ଭିତ୍ତିଭୂମି ବ୍ୟବହାର କରିବା ଲାଗି ସମାନ ସୁବିଧା ଯୋଗାଇଦେବ ବୋଲି ମହାକାଶ ବିଭାଗ ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂ କହିଛନ୍ତି। ଉତ୍ସାହପୂର୍ଣ୍ଣ ନୀତି ଏବଂ ଅନୁକୂଳ ନିୟାମକ ପରିବେଶ ମାଧ୍ୟମରେ ବୋର୍ଡ ଘରୋଇ ସଂସ୍ଥାଗୁଡ଼ିକର କାର୍ଯ୍ୟକୁ ମାର୍ଗଦର୍ଶନ ଦେବ। ତେବେ ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ) ପୂର୍ବଭଳି କାର୍ଯ୍ୟ କରିବ ଏବଂ ନବଗଠିତ ରାଷ୍ଟ୍ରାୟତ୍ତ ଉଦ୍ୟୋଗ ନ୍ୟୁ ସ୍ପେସ୍ ଇଣ୍ଡିଆ ଲିଃ (ଏନ୍ଏସ୍ଆଇଏ)ର ଭୂମିକା ବଢ଼ିବ ବୋଲି ଜିତେନ୍ଦ୍ର କହିଛନ୍ତି। ସଂସ୍କାର ଫଳରେ ଇସ୍ରୋ ଗବେଷଣା ଓ ବିକାଶ କାର୍ଯ୍ୟ, ନୂତନ ପ୍ରଯୁକ୍ତି, ମହାକାଶକୁ ମାନବ ପ୍ରେରଣ କାର୍ଯ୍ୟକ୍ରମ ଉପରେ ଅଧିକ ଧ୍ୟାନ ଦେବ। ଗ୍ରହ ସମ୍ବନ୍ଧୀୟ କେତେକ ଆବିଷ୍କାର କାର୍ଯ୍ୟକ୍ରମରେ ଘରୋଇ ସେକ୍ଟରକୁ ମଧ୍ୟ ଅଂଶଗ୍ରହଣ କରିବାର ସୁଯୋଗ ମିଳିବ।
ମହାକାଶ ସେକ୍ଟରରେ ସଫଳତା ହାସଲ କରିଥିବା ଅଳ୍ପ କେତୋଟି ଦେଶ ମଧ୍ୟରେ ଭାରତ ରହିଛି। ନୂଆ ସଂସ୍କାର ଫଳରେ ଏହି କ୍ଷେତ୍ରକୁ ଅଧିକ ଶକ୍ତି ଓ ଗତିଶୀଳତା ମିଳିବ, ଯାହା ଦେଶକୁ ମହାକାଶ କାର୍ଯ୍ୟକ୍ରମର ପରବର୍ତ୍ତୀ ପର୍ଯ୍ୟାୟକୁ ଯିବାରେ ସହାୟକ ହେବ। ଏହା କେବଳ ମହାକାଶ ସେକ୍ଟରର ବିକାଶକୁ ତ୍ୱରାନ୍ବିତ କରିବ ତାହା ନୁହେଁ, ବିଶ୍ୱ ମହାକାଶ ଅର୍ଥନୀତିରେ ଭାରତୀୟ ଶିଳ୍ପ ଗୁରୁତ୍ୱପୂର୍ଣ୍ଣ ଭୂମିକା ନେବାରେ ସହାୟକ ହୋଇପାରିବ। ଫଳରେ ପ୍ରଯୁକ୍ତି କ୍ଷେତ୍ରରେ ବିପୁଳ ନିଯୁକ୍ତି ସୁଯୋଗ ସୃଷ୍ଟି ହେବା ସହ ଭାରତ ବିଶ୍ୱ ପ୍ରଯୁକ୍ତିର ପାଓ୍ବାରହାଉସ୍ ହୋଇପାରିବ।
