କୋଚି, ୨୧।୯: ଇଣ୍ଡିଆନ ସୁପର ଲିଗ୍ (ଆଇଏସ୍ଏଲ୍)ର ୧୦ମ ସଂସ୍କରଣ ଗୁରୁବାରଠାରୁ ଏଠାରେ ଆରମ୍ଭ ହେବ। ସ୍ଥାନୀୟ ଜବାହରଲାଲ ନେହେରୁ ଷ୍ଟାଡିୟମରେ କେରଳ ବ୍ଲାଷ୍ଟର୍ସ ଓ ବେଙ୍ଗାଲୁରୁ ଏଫ୍ସି ଉଦ୍ଘାଟନୀ ମ୍ୟାଚରେ ପରସ୍ପରକୁ ଭେଟିବେ। ୨୦୨୩-୨୪ ସିଜନ ପାଇଁ ବେଙ୍ଗାଲୁରୁ ଏଫ୍ସି କେତେଜଣ ହାଇପ୍ରୋଫାଇଲ ଖେଳାଳିଙ୍କୁ ରିଲିଜ କରିଛି। ସେମାନଙ୍କ ମଧ୍ୟରେ ଉଦାନ୍ତ ସିଂ, ସନ୍ଦେଶ ଝିଙ୍ଗାନ ଓ ରୟ କ୍ରିଷ୍ଣାଙ୍କ ପରି ତାରକା ଖେଳାଳି ସାମିଲ। ତେବେ ସେଟ୍ଅପ୍କୁ ଅନେକ ନୂଆ ଖେଳାଳି ଆସିଥିବାରୁ ଦଳ ଭଲ ପ୍ରଦର୍ଶନ ସହ ଅଭିଯାନ ଆରମ୍ଭ କରିବ ବୋଲି କୋଚ୍ ସିମନ ଗ୍ରେସନ ଆଶା ରଖିଛନ୍ତି।
ସେହିପରି ଆଗାମୀ ସିଜନରେ କେରଳ ବ୍ଲାଷ୍ଟର୍ସ ତାରକା ମିଡ୍ଫିଲ୍ଡର ସହଲ ଅବଦୁଲ ସମଦଙ୍କ ଅନୁପସ୍ଥିତି ଅନୁଭବ କରିବ। ସମଦ ଏବେ ମୋହନ ବାଗାନ ଜାଏଣ୍ଟ ପକ୍ଷରୁ ଖେଳୁଛନ୍ତି। ତେବେ ଭାରତର ଅନ୍ତର୍ଜାତୀୟ ଖ୍ୟାତିସମ୍ପନ୍ନ ଖେଳାଳି ପ୍ରୀତମ କୋଟାଲ, ପ୍ରବୀର ଦାସଙ୍କ ସମେତ କେତେକ ଖେଳାଳି ଆସିଥିବାରୁ ଏହି ଦଳର ରକ୍ଷଣଭାଗ ଦୃଢ଼ ହୋଇଛି। ସର୍ବିୟାର ଇଭାନ ଭୁକୋମାନୋଭିଚ୍ ଦଳର କୋଚ୍ ଅଛନ୍ତି।
ନଜରରେ ରହିବେ
ଆଗାମୀ ମ୍ୟାଚରେ କେରଳ ବ୍ଲାଷ୍ଟର୍ସର ହର୍ମିପାନ ରୁଇଭା ଓ ବେଙ୍ଗାଲୁରୁ ଏଫ୍ସିର ଗୁର୍ପ୍ରୀତ ସିଂ ସାନ୍ଧୁଙ୍କ ଉପରେ ନଜର ରହିବ। କେରଳର ୨୨ ବର୍ଷୀୟ ହର୍ମିପାନ ଜଣେ ଚମତ୍କାରୀ ସେଣ୍ଟରବ୍ୟାକ୍ ଭାବେ ନିଜକୁ ପ୍ରମାଣିତ କରିଛନ୍ତି। ଆଇଏସ୍ଏଲ୍ ୨୦୨୨-୨୩ରେ ତାଙ୍କର ଟ୍ୟାକ୍ଲ ସକ୍ସେସ ରେଟ୍ ଥିଲା ୮୬ ପ୍ରତିଶତ। ଭୁକୋମାନୋଭିଚ୍ଙ୍କ ଡିଫେନ୍ସିଭ ଯୋଜନାରେ ସେ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବେ। ସେହିପରି ଗୁର୍ପ୍ରୀତ ସିଂ ସାନ୍ଧୁ ହେଉଛନ୍ତି ଆଇଏସ୍ଏଲ୍ରେ ବେଙ୍ଗାଲୁରୁ ଦଳର ଦ୍ୱିତୀୟ ସର୍ବାଧିକ ସଫଳ ଖେଳାଳି। ଦଳର ୫୬ ମ୍ୟାଚ ବିଜୟରେ ସେ ଅଂଶୀଦାର ଅଛନ୍ତି। ସୁନୀଲ ଛେତ୍ରୀ ୫୭ ବିଜୟରେ ସାମିଲ ଥିବାରୁ ଏହି ତାଲିକାର ଶୀର୍ଷରେ ରହିଛନ୍ତି। ଛେତ୍ରୀଙ୍କ ଅନୁପସ୍ଥିତିରେ ସେ ଏହି ରେକର୍ଡର ସମକକ୍ଷ ହେବାକୁ ଲକ୍ଷ୍ୟ ରଖିଛନ୍ତି।
”ଚଳିତ ବର୍ଷ ଗଠିତ ଦଳକୁ ନେଇ ମୁଁ ସନ୍ତୁଷ୍ଟ। ଗତବର୍ଷଠାରୁ ଏହା ଭିନ୍ନ। ଆମେ କେତେଜଣ ଖେଳାଳିଙ୍କୁ ଛାଡ଼ିଛୁ ଏବଂ କେତେକ ନୂଆ ମୁହଁ ସାମିଲ କରିଛୁ। ଏହା ମଧ୍ୟରେ ବିଦେଶୀ ଓ ଭାରତୀୟ ଖେଳାଳି ସାମିଲ। ତେଣୁ ଆମେ ଏଥର ଭିନ୍ନ ଗ୍ରୁପ୍କୁ ନେଇ ଖେଳିବାକୁ ଯାଉଛୁ। ଆମେ ୬ ଜଣ ବିଦେଶୀ ଖେଳାଳିଙ୍କୁ ନେଇଛୁ। ସେମାନଙ୍କ ମଧ୍ୟରୁ ୪ ଜଣଙ୍କୁ ପରିସ୍ଥିତି ଅନୁସାରେ ଖେଳାଇବୁ। କେରଳ ବ୍ଲାଷ୍ଟର୍ସ ବିପକ୍ଷରେ ଭଲ ଫଳାଫଳ ସହ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛୁ“ ବୋଲି ବେଙ୍ଗାଲୁରୁ ଏଫ୍ସି କୋଚ୍ ଗ୍ରେସନ ପ୍ରକାଶ କରିଛନ୍ତି। ସେହିପରି କେରଳ ବ୍ଲାଷ୍ଟର୍ସ ଖେଳାଳି ପ୍ରୀତମ କୋଟାଲ କହିଛନ୍ତି ଯେ, ”ଉତ୍ସାହୀ ଦର୍ଶକଙ୍କ ସମ୍ମୁଖରେ ମୁଁ ପ୍ରଥମଥର ପାଇଁ ହଳଦିଆ ଜର୍ସିରେ ଖେଳିବାକୁ ଯାଉଛି। ତେଣୁ ଆଗାମୀ ମ୍ୟାଚକୁ ନେଇ ମୁଁ ଖୁବ୍ ଉତ୍ସାହିତ। ଚ୍ୟାଲେଞ୍ଜର ମୁକାବିଲା ପାଇଁ ଆମ ଦଳ ପ୍ରସ୍ତୁତ। ଟ୍ରଫି ବିଜୟ ଲକ୍ଷ୍ୟରେ ମୁଁ ମୋ ଦଳ ପାଇଁ ଶ୍ରେଷ୍ଠ ପ୍ରଦର୍ଶନ ଦେବାକୁ ବ୍ୟଗ୍ରତାର ସହ ଅପେକ୍ଷା କରିଛି“।
