ଭୁବନେଶ୍ୱର,୧୨।୭(ବ୍ୟୁରୋ): ସାରା ବିଶ୍ୱରେ କରୋନାର ଭୟାବହତାକୁ ନେଇ ସ୍ଥିତି ଖରାପ ହେବା ପରେ ରାଜ୍ୟଗୁଡ଼ିକରେ ପ୍ରଶାସନିକ ଅଧିକାରୀମାନେ ନୂଆ ନିୟମ ଅନୁପାଳନ କରି ଏହାର ମୁକାବିଲା ପାଇଁ ଅଣ୍ଟା ଭିଡିଛନ୍ତି। କରୋନା ଯେପରି ସାଧାରଣରେ ସଂକ୍ରମଣ ନ ହେବ ସେଥିଲାଗି ଗତ ଦୁଇ ସପ୍ତାହ ତଳେ ପୁରୀ ଜିଲାପାଳ ବଲଓ୍ବନ୍ତ ସିଂହ ପ୍ରତ୍ୟେକ ଶନିବାର ଓ ରବିବାର ଜିଲାକୁ ଶଟ୍ଡାଉନ୍ ଘୋଷଣା କରିଥିଲେ। ଏଥିରେ ଆଗାମୀ କିଛିଦିନ ପର୍ଯ୍ୟନ୍ତ ପୁରୀ ଜିଲାକୁ ଅନ୍ୟ କୌଣସି ଜିଲାର ଲୋକେ ପ୍ରବେଶ କରିପାରିବେ ନାହିଁ ବୋଲି କଟକଣା ଲଗାଯାଇଥିଲା। ଏସବୁ ନିୟମ ଭିତରେ ରବିବାର ଶଟ୍ଡାଉନ୍ ନିୟମ ପାଳନ କରାଯାଉଥିବା ଲକ୍ଷ୍ୟ କରାଯାଇଛି। ତେବେ ଜିଲା ଭିତରକୁ ଆସୁଥିବା କାର୍ ଗୁଡ଼ିକ ପିପିଲି ଟୋଲ୍ ଗେଟ୍ଠାରେ ଅଟକାଇ ସେମାନଙ୍କୁ କୌଣସି ଗୁରୁତ୍ୱପୂର୍ଣ୍ଣ କାର୍ଯ୍ୟ ନ ଥିଲେ ଭିତରକୁ ପ୍ରବେଶ କରିପାରିବେ ନାହିଁ ବୋଲି କୁହାଯାଉଛି। ହେଲେ ସେହି ରାସ୍ତା ଦେଇ ଯାଉଥିବା ବାଇକ୍ଗୁଡ଼ିକୁ ଯାଞ୍ଚ କରାଯାଉନାହିଁ। ଫଳରେ ବାଇକ୍ରେ ଯାଉଥିବା ସମସ୍ତ ଯାତ୍ରୀ ଗେଟ୍ ଦେଇ ଜିଲା ଭିତରକୁ ପ୍ରବେଶ କରୁଛନ୍ତି। ଏଠାରେ ଶଟ୍ଡାଉନ୍ ନିୟମ କେତେ ମାତ୍ରାରେ ସଫଳ କରାଯିବାକୁ ଚେଷ୍ଟା କରାଯାଉଛି ତାହା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ବାଇକ୍ ଯାଞ୍ଚ କରାଯାଉ ନ ଥିବା ଘଟଣାକୁ ପୁରୀ ଏସ୍ପି ଭୁଲ ଦର୍ଶାଉଥିବା ବେଳେ ସ୍ଥାନୀୟ ଚେକିଂ ପଏଣ୍ଟରେ ଉପସ୍ଥିତ ଥିବା ଅଧିକାରୀ କିନ୍ତୁ ଓଲଟା କଥା କହୁଛନ୍ତି। ସେମାନଙ୍କୁ ଏନେଇ ପଚରାଯିବାରେ ଉପର ଅଧିକାରୀ ଯାହା କହୁଛନ୍ତି, ଆମେ ତାହା ପାଳନ କରୁଛି। କେବଳ କାର୍ ଯାଞ୍ଚ କରିବାକୁ କୁହାଯାଇଛି। ବାଇକ୍ ନୁହେଁ ବୋଲି କହିଛନ୍ତି। ଅନ୍ୟପଟେ ଏହାକୁ ନେଇ କିଛି ଯାତ୍ରୀ ପ୍ରଶ୍ନ ଉଠାଇବା ପରେ ତରବରିଆ ଭାବେ ନିୟମକୁ ପରିବର୍ତ୍ତନ କରିବାକୁ ଚେଷ୍ଟା କରାଯାଉଥିବା ଲକ୍ଷ୍ୟ କରାଯାଇଥିଲା। ହେଲେ ଚେକିଂ ହେଉଥିବା ସ୍ଥାନରୁ ଲୋକଙ୍କୁ ଫେରାଇ ଦିଆଯାଉଥିବା ବେଳେ ଅନ୍ୟ ଦଶ ପ୍ରକାର ଗଳାବାଟରେ ବାହାରି ପୁରୀ ଯାଉଛନ୍ତି। ସେମାନଙ୍କୁ ରୋକିବା ପାଇଁ ପ୍ରଶାସନ କୌଣସି ଚେଷ୍ଟା କରୁ ନ ଥିବା ଦେଖିବାକୁ ମିଳୁଛି। ଏଭଳି ସ୍ଥିତି ଜାରି ରହିଲେ ଆଗାମୀ ଦିନରେ ପୁରୀରେ କରୋନା ସଂକ୍ରମଣ ବଢ଼ିପାରେ ବୋଲି ସାଧାରଣରେ ଚର୍ଚ୍ଚା ହେଉଛି।
