ବିଜୁ ମଇଦାନରୁ ମୁହଁ ଫେରାଉଛନ୍ତି ବୟସ୍କ

ଅନୁଗୋଳ ଅଫିସ, ୧୪।୧: ଅନୁଗୋଳ ସହର ଭିଆଇପି ରୋଡ୍‌ରେ ଥିବା ବିଜୁ ମଇଦାନରେ ଏବେ ସୁସ୍ଥ ବାତାବରଣ ନାହିଁ। ବିଶେଷକରି ସନ୍ଧ୍ୟାରେ ଏଠାରେ ଅସାମାଜିକଙ୍କ ଆଡ୍ଡା ଜମୁଛି। ରାତି ଅନ୍ଧାରର ସୁଯୋଗ ନେଇ ବିଭିନ୍ନ ଅପରାଧର ବ୍ଲୁ ପ୍ରିଣ୍ଟ ପ୍ରସ୍ତୁତ କରାଯାଉଛି। ବିଳମ୍ବିତ ରାତି ପର୍ଯ୍ୟନ୍ତ ମଦ୍ୟପାନ ଚାଲୁଛି। ଏହାଛଡ଼ା ପ୍ରେମୀଯୁଗଳଙ୍କ ଅସଂଯତ କାର୍ଯ୍ୟକଳାପ ବିଜୁ ମଇଦାନ ପରିବେଶକୁ ଅପ୍ରୀତିକର କରିଦେଉଛି। ଫଳରେ ସକାଳେ ଓ ସନ୍ଧ୍ୟାରେ ଭ୍ରମଣ, ବ୍ୟାୟାମ କରିବାକୁ ଆସୁଥିବା ସହରର ବୟସ୍କ ବା ବରିଷ୍ଠ ନାଗରିକମାନେ ଆଉ ଏଠାକୁ ଆସିବାକୁ ଉଚିତ ମଣୁନାହାନ୍ତି। ଦୀର୍ଘଦିନ ହେଲା ଏପରି ସ୍ଥିତି ସୃଷ୍ଟି ହୋଇଥିଲେ ମଧ୍ୟ ପୋଲିସ ଏଥିପ୍ରତି ନଜର ଦେଉ ନ ଥିବାରୁ ବୁଦ୍ଧିଜୀବୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
ସହରର ବିଭିନ୍ନ ସଭା, ସମିତି, ଉତ୍ସବ ଆଦି ବିଜୁ ମଇଦାନରେ ଆୟୋଜନ କରାଯାଇଥାଏ। ଲୋକଙ୍କ ସୁବିଧାକୁ ଦୃଷ୍ଟିରେ ରଖି ତାଳଚେର-ଅନୁଗୋଳ-ମେରାମଣ୍ଡଳି (ତାମଡା) କର୍ତ୍ତୃପକ୍ଷଙ୍କ ପକ୍ଷରୁ ଏହାର ନିର୍ମାଣ କରାଯାଇଥିଲା। ନିକଟରେ ଉତ୍ତର କେନ୍ଦ୍ରାଞ୍ଚଳ ଡିଆଇଜିଙ୍କ ବାସଗୃହ, ଏସ୍‌ପିଙ୍କ ଆବାସିକ କାର୍ଯ୍ୟାଳୟ ଥିବାରୁ ଏହା ଏକ ସୁରକ୍ଷିତ ଅଞ୍ଚଳ ବୋଲି ପରିଗଣିତ ହେଉଥିଲା। ଫଳରେ ସହରର ବହୁ ବରିଷ୍ଠ ନାଗରିକ ଏଠାକୁ ସକାଳ ଓ ସନ୍ଧ୍ୟା ଭ୍ରମଣ ପାଇଁ ଆସନ୍ତି। ମଇଦାନ ଚାରିପଟେ ଥିବା ଓ୍ବାକିଂ ଟ୍ରାକ୍‌ରେ ସେମାନେ ଅଭ୍ୟାସ କରିବା ସହ ଦୀର୍ଘ ସମୟ ଧରି ବ୍ୟାୟାମ ଓ ବସାଉଠା କରନ୍ତି। ପିଲାଙ୍କଠାରୁ ଯୁବଗୋଷ୍ଠୀଙ୍କ ପର୍ଯ୍ୟନ୍ତ ଏଠାରେ କ୍ରୀଡ଼ାଭ୍ୟାସ କରନ୍ତି। କିନ୍ତୁ ଦୀର୍ଘଦିନ ହେଲା ବିଜୁ ମଇଦାନ ପ୍ରତି ପ୍ରଶାସନ ଅବହେଳା କରିଚାଲିଛି। ଆବଶ୍ୟକ ମରାମତି ଅଭାବରୁ ଏହାର ବିଭିନ୍ନ ନିର୍ମାଣ ଅଂଶ ଭାଙ୍ଗିରୁଜି ଗଲାଣି। ‘ବିଜୁ ମଇଦାନ’ ଲେଖା ମଧ୍ୟ ଫଳକରୁ ଉଠିଗଲାଣି। ସେହିପରି ଓ୍ବାକିଂ ଟ୍ରାକ୍‌ ଓ ନିର୍ମାଣ କରାଯାଇଥିବା ବେଞ୍ଚ ପ୍ରେମୀଯୁଗଳଙ୍କ କବ୍‌ଜାକୁ ଚାଲିଗଲାଣି। ସର୍ବଦା ଅସାମାଜିକଙ୍କ ଆଡ୍ଡା ଜମୁଥିବାରୁ ଏଠାକୁ ଆସୁଥିବା ବୟସ୍କ ମହିଳା ପୁରୁଷମାନେ ଆଉ ସୁରକ୍ଷିତ ମଣୁନାହାନ୍ତି। ସନ୍ଧ୍ୟାହେଲେ ଚାରି ପାଖରେ ବିଭିନ୍ନ ନିଶା ସାମଗ୍ରୀ ସେବନ କରାଯାଉଛି। ବିଳମ୍ବିତ ରାତି ପର୍ଯ୍ୟନ୍ତ ନିଶାଖୋର, ଅସାମାଜିକଙ୍କ ଉପସ୍ଥିତି ରହୁଛି। ଅନେକ ସମୟରେ ଗଣ୍ଡଗୋଳ ହେବା ସହ ଏଠାରେ ଖଣ୍ଡା, ଭୁଜାଲି ମଧ୍ୟ ବୁଲୁଛି। ଭିଆଇପି ଅଞ୍ଚଳ ହୋଇଥିବାରୁ ମଇଦାନ ନିକଟ ରାସ୍ତାରେ ଜଜ୍‌, ଜିଲାପାଳ, ଏସ୍‌ପି, ରାଜନେତାମାନେ ଯାତାୟାତ କରୁଥିଲେ ମଧ୍ୟ ଅସାମାଜିକମାନେ କାହାକୁ ଭୟ କରୁନାହାନ୍ତି। ଏ ନେଇ ଅସନ୍ତୋଷ ବଢ଼ୁଥିବା ବେଳେ ମଙ୍ଗଳବାର ସନ୍ଧ୍ୟାରେ ଏସ୍‌ପି ଜଗମୋହନ ମୀନା ଘଟଣାସ୍ଥଳକୁ ଯାଇ ସ୍ଥିତି ପହଞ୍ଚତ୍ ଯାଞ୍ଚ କରିଥିବା ସୂଚନା ମିଳିଛି।

ଅସାମାଜିକଙ୍କୁ ସାବାଡ୍‌ କରାଯିବ
ବିଜୁ ମଇଦାନରେ ଅସାମାଜିକଙ୍କ ଆଡ୍ଡା ନେଇ ପୂର୍ବରୁ ଅଭିଯୋଗ ହୋଇଆସୁଛି। ଘଟଣାସ୍ଥଳକୁ ଯାଇ ତଦାରଖ କରିଛି। ସେଠାରେ ନିଶାସେବନ ସହ ଅପରାଧ ଘଟାଇବାର ଯୋଜନା କରୁଥିବା ଅସାମାଜିକଙ୍କୁ ସାବାଡ୍‌ କରିବାକୁ ପୋଲିସ ପଦକ୍ଷେପ ନେଉଛି। ଖୁବ୍‌ଶୀଘ୍ର ସୁସ୍ଥ ବାତାବରଣ ଫେରାଇ ଅଣାଯିବ।
-ଜଗମୋହନ ମୀନା, ଏସ୍‌ପି

ପ୍ରଶାସନର ଅବହେଳା ଦାୟୀ
ବିଜୁ ମଇଦାନ ଯେଉଁ ଉଦ୍ଦେଶ୍ୟରେ ହୋଇଥିଲା, ସେଥିରୁ ଏହା ବିଚ୍ୟୁତ ହୋଇଛି। ସେଠାରେ ଅସାମାଜିକଙ୍କ ଆଡ୍ଡା ଜମିବା ପାଇଁ ପ୍ରଶାସନର ଅବହେଳା ଦାୟୀ। ତାଳଚେର-ଅନୁଗୋଳ-ମେରାମଣ୍ଡଳି (ତାମଡା) କର୍ତ୍ତୃପକ୍ଷ ଏହାକୁ ଅଣଦେଖା କରୁଥିବାରୁ ସେଠାରେ ଯାବତୀୟ ଅନୈତିକ କାର୍ଯ୍ୟ ଚାଲୁଛି। ପୋଲିସ ଅଧିକ ପଇଁତରା ମାରିବା ସହ ଉକ୍ତ ଗୋଷ୍ଠୀଙ୍କୁ ସାବାଡ୍‌ କରୁ।
-ସୁବୋଧ ମିଶ୍ର, ବୁଦ୍ଧିଜୀବୀ

ସଂକୋଚ ଲାଗୁଥିବାରୁ ଯାଉନାହୁଁ
ରାତି ପାହିଲେ ଶହ ଶହ ଲୋକ ବିଜୁ ମଇଦାନକୁ ୱାକିଂ କରିବାକୁ ଯାଆନ୍ତି। ସନ୍ଧ୍ୟାରେ ସରକାରୀ କର୍ମଚାରୀଙ୍କଠାରୁ ଆରମ୍ଭ କରି ସବୁବର୍ଗର ଲୋକେ ଆସିଥାନ୍ତି। କିନ୍ତୁ ଅପରାଧୀଙ୍କ ଆଡ୍ଡା ଯୋଗୁ ସେଠାକୁ ଯିବାକୁ ଭୟ ଲାଗୁଛି। ସେହିପରି ପ୍ରେମୀଯୁଗଳମାନେ ସେଠାରେ ଏପରି ପରିବେଶ ସୃଷ୍ଟି କରିଛନ୍ତି, ଯେଉଁଠିକୁ ଯିବାକୁ ସଂକୋଚ ଲାଗୁଛି।
-ଗଙ୍ଗାଧର ପଟ୍ଟନାୟକ, ବୁଦ୍ଧିଜୀବୀ

କାର୍ଯ୍ୟାନୁଷ୍ଠାନ ହେଲେ ଚେତିବେ
ସନ୍ଧ୍ୟାହେଲେ ନିଶାଡ଼ିମାନେ ବିଜୁ ମଇଦାନକୁ ନିଜ କବ୍ଜାକୁ ନେଇଯାଉଛନ୍ତି। ଫଳରେ ସାଧାରଣ ଲୋକମାନେ ଯିବାଆସିବା କରିବାକୁ ଭୟ କରୁଛନ୍ତି। ବିଭିନ୍ନ ସମୟରେ ଗଣ୍ଡଗୋଳ ସହ ଅପରାଧୀମାନେ ଆପରାଧିକ କାର୍ଯ୍ୟ ପାଇଁ ସେଠାରେ ଜମା ହେଉଛନ୍ତି। ଅନୁଗୋଳ ପୋଲିସ ସୁରକ୍ଷା ବ୍ୟବସ୍ଥା କରିବା ଆବଶ୍ୟକ।
-ରତ୍ନାକର ମହାପାତ୍ର, ବୁଦ୍ଧିଜୀବୀ


Enter your email to get our daily news in your inbox.

All Right Reserved By Dharitri.Com

ଅଫିସରେ ମହିଳା ଆର୍‌ଆଇଙ୍କୁ ଆକ୍ରମଣ

ଆନନ୍ଦପୁର,୨୦।୧୨(ସ୍ବ.ପ୍ର.): କେନ୍ଦୁଝର ଜିଲା ଆନନ୍ଦପୁର ମହିଳା ରାଜସ୍ବ ନିରୀକ୍ଷକ ସୀମା ସିମନ୍ତିନୀ ସାହୁ ସୋମବାର ସକାଳେ କାର୍ଯ୍ୟାଳୟରେ କାର୍ଯ୍ୟରତ ଥିବାବେଳେ ମରଣାନ୍ତକ ଆକ୍ରମଣର ଶିକାର ହୋଇଛନ୍ତି।...

୮ ମାସ ଧରି ବନ୍ଦ ରହିବ ଭୁବନେଶ୍ୱର ବିମାନବନ୍ଦର, ପ୍ରଭାବିତ ହୋଇପାରେ ବିମାନ ସେବା

ଭୁବନେଶ୍ୱର,୧୭।୯(ବ୍ୟୁରୋ): ୮ ମାସ ଧରି ବନ୍ଦ ରହିବ ଭୁବନେଶ୍ୱର ବିମାନବନ୍ଦର। ରନଓ୍ବେ ରିକାର୍ପେଟିଂ କାର୍ଯ୍ୟ ପାଇଁ ବିମାନବନ୍ଦରକୁ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି। ଫଳରେ ନଭେମ୍ବର...

ଚିକିତ୍ସା ସେବା ଅନୁଧ୍ୟାନ କଲେ ଜିଲାପାଳ

ଅନୁଗୋଳ ଅଫିସ୍‌, ୨୪ା୧ ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି ଗୁରୁବାର ଜିଲା ମୁଖ୍ୟ ଚିକିତ୍ସାଳୟ ପରିଦର୍ଶନରେ ଯାଇ ଚିକିତ୍ସା ସେବା ଅନୁଧ୍ୟାନ କରିଛନ୍ତି। ମେଡିକାଲରେ...

ଭାଜପା ବିଧାୟକ ମଦନମୋହନ ଦତ୍ତଙ୍କ ପରଲୋକ

ବାଲେଶ୍ୱର ଅଫିସ/ଭୁବନେଶ୍ୱର, ୧୭।୬(ବ୍ୟୁରୋ): ବାଲେଶ୍ୱର ସଦର ଭାଜପା ବିଧାୟକ ମଦନମୋହନ ଦତ୍ତଙ୍କର ବୁଧବାର ପରଲୋକ ଘଟିଛି। ମୃତ୍ୟୁ ବେଳକୁ ତାଙ୍କୁ ୬୧ ବର୍ଷ ହୋଇଥିଲା। ଭୁବନେଶ୍ୱରର...

ରାଜ୍ୟର ଅଧା ଜିଲା ମାଓବାଦୀ ପ୍ରଭାବିତ

ଭୁବନେଶ୍ୱର,୨।୭(ବ୍ୟୁରୋ): ରାଜ୍ୟର ଅଧା ଜିଲା ମାଓବାଦୀ କାର୍ଯ୍ୟକଳାପ ଦ୍ୱାରା ପ୍ରଭାବିତ। ସ୍ବରାଷ୍ଟ୍ର ମନ୍ତ୍ରଣାଳୟର ଶ୍ରେଣୀ ବିଭାଗ ଅନୁଯାୟୀ କୋରାପୁଟ ଏବଂ ମାଲକାନଗିରି ଅତ୍ୟନ୍ତ ବାମପନ୍ଥୀ ଉଗ୍ରବାଦ...

ସବାଇ ଘାସକୁ ଜିଆଇ ଟ୍ୟାଗ୍‌ ପାଇଁ ଆବେଦନ

ଭୁବନେଶ୍ୱର,୩।୬(ବ୍ୟୁରୋ): ସବାଇ ଘାସକୁ ମିଳିବ ଜିଓଗ୍ରାଫିକାଲ ଇଣ୍ଡିକେଶନ (ଜି.ଆଇ.) ଟ୍ୟାଗ। ରାଜ୍ୟ ସମବାୟ ହସ୍ତଶିଳ୍ପ ନିଗମ ଏ ନେଇ ଆବେଦନ କରିଛି। ନିଗମ ପକ୍ଷରୁ ଆଇପି...

ନକଲି ଡାକ୍ତରଙ୍କ ଘରେ ଚଢ଼ାଉ: ୧୫ ପାସ୍‌ବୁକ୍‌ ଜବତ

ଭୁବନେଶ୍ୱର,୨୩।୨(ବ୍ୟୁରୋ): ନକଲି ଡାକ୍ତର ରମେଶ ସ୍ବାଇଁଙ୍କ ଗୋଟିଏ ପରେ ଗୋଟିଏ ଗୁମର ଖୋଲିବାରେ ଲାଗିଛି । ପ୍ରତିଦିନ ନୂଆ ନୂଆ ମାମଲା ସାମ୍ନାକୁ ଆସୁଛି। ତାଙ୍କ...

ଡରାଇଲାଣି ତୃତୀୟ ଲହର

ବାରିପଦା ଅଫିସ,୨୭।୮-କରୋନା ମହାମାରୀର ତୃତୀୟ ଲହର ଆଶଙ୍କାକୁ ନେଇ ସମସ୍ତେ ଭୀତସ୍ତତ। ସେପ୍ଟେମ୍ବର ଶେଷ ଓ ଅକ୍ଟୋବର ପ୍ରାରମ୍ଭରେ ସଂକ୍ରମଣ ବଢ଼ିବା ସମ୍ଭାବନା ଥିବା ନେଇ...

Advertisement
Archives

Model This Week