ଚଣ୍ଡିଖୋଲ,୧୮ା୬(ଡି.ଏନ୍.ଏ.): ଯାଜପୁର ଜିଲା ବଡ଼ଚଣା ବ୍ଲକ୍ରେ ଅବସ୍ଥିତ ରାଜ୍ୟର ପ୍ରମୁଖ ଧର୍ମ, ସଂସ୍କୃତି, ଐତିହ୍ୟ ଓ ପର୍ଯ୍ୟଟନ ପୀଠ ଓଳାଶୁଣୀ ପାହାଡ଼ର ଉଭୟ ପୂର୍ବ ଏବଂ ପଶ୍ଚିମ ଦିଗରୁ ପାହାଡ଼ ଶୀର୍ଷ ପର୍ଯ୍ୟନ୍ତ ଓ ପରିବେଶ ପର୍ଯ୍ୟଟନସ୍ଥଳୀ କଟେଜ୍ ପର୍ଯ୍ୟନ୍ତ ଚଉଡ଼ା ପକ୍କାରାସ୍ତା ତିଆରି ହେଉଛି। ଏଥିପାଇଁ ପାହାଡ଼ରୁ ଶହଶହ ସଂଖ୍ୟାରେ ଗଛ କଟାଚାଲିଛି। ଫଳରେ ଏହାକୁ ନେଇ ସ୍ଥାନୀୟ ଅଞ୍ଚଳରେ ବ୍ୟାପକ ପ୍ରତିକ୍ରିୟା ପ୍ରକାଶ ପାଇଛି। ତେଣୁ ଶୀଘ୍ର ଗଛକଟା ବନ୍ଦ କରିବାକୁ ଦାବି ହୋଇଛି। ତେବେ ଜଙ୍ଗଲ ବିଭାଗର ଅପରିଣାମଦର୍ଶୀ କାର୍ଯ୍ୟ ପାଇଁ ଆଜି ପର୍ଯ୍ୟଟନକ୍ଷେତ୍ର ଓଳାଶୁଣୀ ଗୁମ୍ଫାର ସବୁଜ ବନାନୀ ବିପଦରେ ବୋଲି ଅଭିଯୋଗ ହୋଇଛି। ସ୍ଥାନୀୟ ଗ୍ରାମବାସୀ ଅଭିଯୋଗ କରିଛନ୍ତି ଯେ, ୧୫ ଦିନ ତଳୁ ବୁଲଡୋଜର୍ ସହାୟତାରେ ପାହାଡ଼ ଖୋଳା କାମ ଆରମ୍ଭ ହୋଇଥିଲା। ପରେ ଗଛଗୁଡ଼ିକୁ କାଟି ଦିଆଯାଇଥିଲା।
ଏଠାକୁ ବର୍ଷତମାମ ରାଜ୍ୟର ବିଭିନ୍ନ ସ୍ଥାନରୁ ଶହ ଶହ ସଂଖ୍ୟାରେ ପର୍ଯ୍ୟଟକ, ସାଧାରଣ ଲୋକ, ସାଧୁସନ୍ଥ ଓ ଛାତ୍ରୀଛାତ୍ର ଆସିଥାନ୍ତି। ଚଣ୍ଡିଖୋଲ-ପାରାଦୀପ ୫୩ ନଂ. ଜାତୀୟ ରାଜପଥ କଡ଼ରେ ଏକ ପ୍ରାକୃତିକ ପରିବେଶ ଭିତରେ ଥିବା ଓଳାଶୁଣୀ ପାହାଡ଼ର ସବୁଜ ବନାନୀ, ଏହି ପୀଠର ଅଧିଷ୍ଠାତ୍ରୀ ମା’ ଓଳାଶୁଣୀ, ସନ୍ଥ ଅରକ୍ଷିତ ଦାସଙ୍କ ସିଦ୍ଧି ଓ ସାଧନାପୀଠର ପ୍ରାକୃତିକ ପରିବେଷ୍ଟନୀ ପର୍ଯ୍ୟଟକଙ୍କୁ ଆକର୍ଷିତ କରିଥାଏ। ଏଠାରେ ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ବିପୁଳ ଟଙ୍କା ବ୍ୟୟରେ ନିର୍ମିତ ଦୁଇଟି ପର୍ଯ୍ୟଟନ ସୁବିଧା କେନ୍ଦ୍ର ଉଦ୍ଘାଟନ ହେବା ଦିନଠାରୁ ଗୋଟିଏ ଦିନବି ପର୍ଯ୍ୟଟକଙ୍କ ପାଇଁ ବ୍ୟବହାର ହୋଇ ନ ଥିଲେ ମଧ୍ୟ ଜଙ୍ଗଲ ବିଭାଗ ପକ୍ଷରୁ ନିର୍ମିତ ଗୋଟିଏ କୋଠରି ବିଶିଷ୍ଟ ୩ଟି ପରିବେଶ କଟେଜରେ ପର୍ଯ୍ୟଟକ ରାତ୍ରି ରହଣି କରିଥାନ୍ତି। କରୋନା ସମୟରେ କଟେଜଗୁଡ଼ିକ ବନ୍ଦ ଥିଲାବେଳେ ଚଳିତ ଜାନୁୟାରୀ ୨୬ରୁ ଏଠାରେ ଦୂରାଗତ ପର୍ଯ୍ୟଟକଙ୍କ ରହଣି ପାଇଁ ଅନଲାଇନ ଯୋଗେ ବୁକିଂ ଆରମ୍ଭ ହୋଇଛି। ଇତିମଧ୍ୟରେ ରାଜ୍ୟ ଜଙ୍ଗଲ ବିଭାଗ ଏହି ଓଳାଶୁଣୀ ପରିବେଶ ପର୍ଯ୍ୟଟନ କଟେଜର ଉନ୍ନତୀକରଣ ଓ ଏହାର ସମ୍ପ୍ରସାରଣ ଆଳରେ ଓଳାଶୁଣୀ ପାହାଡ଼ର ବିସ୍ତୀର୍ଣ୍ଣ ଅଞ୍ଚଳରୁ ପଥର ତାଡ଼ିବା ସହିତ ପୁରୁଣା ଗଛସବୁ କାଟିଦେଇଥିବା ଦେଖିବାକୁ ମିଳୁଛି।
ଓଳାଶୁଣୀ ପରିବେଶ ପର୍ଯ୍ୟଟନସ୍ଥଳୀର ବିକାଶ ପାଇଁ କଟକ ଡିଏଫ୍ଓ ପ୍ରାୟ ଏକ କୋଟି ଟଙ୍କାର ଖର୍ଚ୍ଚ ଅଟକଳ ସମ୍ବଳିତ ପ୍ରସ୍ତାବ ରାଜ୍ୟ ସରକାରଙ୍କୁ ଦେଇଥିବାବେଳେ ଏହାର ଆବଶ୍ୟକ ମଞ୍ଜୁରୀ ମିଳିନାହିଁ। ପ୍ରସ୍ତାବିତ ପ୍ରକଳ୍ପର କାର୍ଯ୍ୟ ଭିତରେ କଟେଜର ନବୀକରଣ, କଟେଜଗୁଡ଼ିକ ମଧ୍ୟରେ ସଂଯୋଗୀକରଣ ପଥ ନିର୍ମାଣ, ଟ୍ରେକିଂ ପାଇଁ ରାସ୍ତା ନିର୍ମାଣ ଓ କଟେଜ ପାଖରେ ପାର୍କିଂସ୍ଥଳ ନିର୍ମାଣ ଯୋଜନା ରହିଛି। ଏହାସହିତ କଟେଜ ପାଖରୁ ପାହାଡ଼ ପାଦଦେଶରେ ଥିବା ଗୋବରୀ ନଦୀ ପର୍ଯ୍ୟନ୍ତ ଯିବା ପାଇଁ ରାସ୍ତା ନିର୍ମାଣ ସହ ନଦୀକୂଳରେ ବୋଟିଂ ବ୍ୟବସ୍ଥା ମଧ୍ୟ ରହିଛି। କଟେଜ ପାଖରୁ ପ୍ରାୟ ଏକ କିଲୋମିଟର ଦୂର ନଦୀ ପର୍ଯ୍ୟନ୍ତ ପାଦଚଲାରାସ୍ତା ନିର୍ମାଣ ଆଳରେ ବୁଲ୍ଡୋଜର ଲଗାଇ ପାହାଡ଼କୁ ତାଡ଼ିବା ସମୟରେ ପାହାଡ଼ରେ ଲଗାଯାଇଥିବା ଶତାଧିକ ୟୁକାଲିପଟାସ୍, ଆକାଶିଆ ଓ ଅନ୍ୟ ଔଷଧୀୟ ବୃକ୍ଷସବୁକୁ ମୂଳ ସହିତ ତାଡ଼ି ଦିଆଯାଇଥିବା ଦେଖିବାକୁ ମିଳୁଛି। ପାହାଡ଼ ଖୋଳା ଓ ଗଛ କଟାଯିବା ସମ୍ପର୍କରେ କଟକ ଡିଏଫ୍ଓ ସଞ୍ଜୟ କୁମାର ସ୍ବାଇଁଙ୍କୁ ପଚାରିବାରେ ସେ କହିଛନ୍ତି, ଓଳାଶୁଣୀ ପରିବେଶ ପର୍ଯ୍ୟଟନସ୍ଥଳୀରେ ଏଭଳି ଗଛ କଟାଯାଇଥିବା ଖବର ମୋ ପାଖରେ ନାହିଁ। ସ୍ଥାନୀୟ ରେଞ୍ଜରଙ୍କ ପାଖରୁ ବୁଝି ତଥ୍ୟ ଦେଇପାରିବି। ଏ ସମ୍ପର୍କରେ ଚଣ୍ଡିଖୋଲ ଫରେଷ୍ଟର ଶଶିକାନ୍ତ ବେହେରାଙ୍କୁ ପଚାରିବାରେ ସେ କହିଛନ୍ତି, ସେଠାରେ ଥିବା ଜଙ୍ଗଲ ବିଭାଗର ପର୍ଯ୍ୟଟନ କୁଟିର ପାଇଁ ଏ ରାସ୍ତା ନିର୍ମାଣ ହୋଇ ଗୋବରୀ ନଦୀ ପର୍ଯ୍ୟନ୍ତ ଯିବ। ସେଥିପାଇଁ ଗଛଗୁଡ଼ିକ କଟା ହୋଇଛି।
