ଚଣ୍ଡିଖୋଲ/ବାଲିଚନ୍ଦ୍ରପୁର,୨୯ା୧୨(ପ୍ରଦୀପ୍ତ କୁମାର ପୃଷ୍ଟି/ଗିରିଜା ପ୍ରସାଦ ସାହୁ): ଯାଜପୁର ଜିଲାର ପ୍ରସିଦ୍ଧ ପର୍ଯ୍ୟଟନସ୍ଥଳୀ ଭାବରେ ପରିଚିତ ଓଳାଶୁଣୀ ଗୁମ୍ଫା ମେଳା ପାଇଁ ଏକ ପ୍ରସ୍ତୁତି ବୈଠକ ପାହାଡ଼ ଶୀର୍ଷଦେଶରେ ଥିବା ଗଣେଶ ମଣ୍ଡପ ପରିସରରେ ଅନୁଷ୍ଠିତ ହୋଇଯାଇଛି। ଓଳାଶୁଣୀ ମଠର ମଠାଧିଶ ମହନ୍ତ ଡ. ନାମାନନ୍ଦ ଦାଶଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେରେ ପ୍ରଥମେ ମହନ୍ତ ପର୍ଶୁରାମ ଦାସଙ୍କ ଶ୍ରାଦ୍ଧ ଦିବସ ପାଳନ କରାଯାଇଥିଲା। ପରେ ଓଳାଶୁଣୀ ଉନ୍ନୟନ ପରିଷଦ ପକ୍ଷରୁ ମେଳା ସମ୍ପର୍କରେ ଆଲୋଚନା କରାଯାଇଥିଲା। ଜାନୁଆରୀ ୨୫ରେ ମେଳା ଆରମ୍ଭ ହେବ ବୋଲି ସୂଚନା ଦିଆଯାଇଥିଲା।
ଜିଲା ପ୍ରଶାସନକୁ ପ୍ରସ୍ତୁତି ବୈଠକ କରିବା ପାଇଁ ପରିଷଦ ପକ୍ଷରୁ ପତ୍ର ପ୍ରେରଣ କରାଯିବ ବୋଲି ସ୍ଥିରକରାଯାଇଥିଲା। ଦୀର୍ଘ ଦିନ ହେବ ସମ୍ପାଦକ ପଦବୀ ଖାଲି ପଡ଼ିଥିବାରୁ ତୁରନ୍ତ ସର୍ବ ସମ୍ମତିକ୍ରମେ ସ୍ଥାୟୀ ସମ୍ପାଦକ ନିଯୁକ୍ତି କରିବାକୁ ମତପ୍ରକାଶ ପାଇଥିଲା। ମେଳାକୁ ଲକ୍ଷାଧିକ ଭକ୍ତଙ୍କ ସମାଗମ ନେଇ ବିଭିନ୍ନ ସମସ୍ୟା ଓ ଦାୟିତ୍ୱ ସମ୍ପର୍କରେ ବିଶଦ ଆଲୋଚନା ହୋଇଥିଲା। ବୈଠକରେ ଅଶୋକ ସାମଲ, ଦିଲୀପ ସାମଲ, ରତିକାନ୍ତ ସାମଲ, ଶରତ ସିଂହ, ରୁଦ୍ରନାରାୟଣ ସିଂହ, ଉମେଶ ସାମଲ, ଦେବାଶିଷ ସିଂହ, ବୈନେତେୟ ଦାସ, ପ୍ରଶନ୍ନ ପରିଡ଼ା, ଅନିଲ ଭୁୟାଁ, ଅଲେଖ ସାମଲ, ଶ୍ୟାମସୁନ୍ଦର ମହାରଣା, ଯଯାତି ସିଂହ, ମହେନ୍ଦ୍ର କୁମାର ରଣସିଂ, ବଳରାମ ବେହେରା, ଧ୍ରୁବଚରଣ ସାମଲ, ଅମୂଲ୍ୟ ସିଂହ, ପ୍ରଫୁଲ୍ଲ ପଣ୍ଡା, ବିକ୍ରମ କେଶରୀ ପ୍ରଧାନ, ବାଜେନ୍ଦ୍ର ମହାରଣା ଓ ନୀଳମାଧବ ସାମଲ ପ୍ରମୁଖ ଯୋଗଦେଇ ଆଲୋଚନାରେ ଅଂଶଗ୍ରହଣ କରିଥିଲେ।
