ବାଲେଶ୍ୱର ଅଫିସ, ୨୨।୫-ବାଲେଶ୍ୱର ଜିଲାରେ ସମ୍ଭାବ୍ୟ ବାତ୍ୟା ‘ୟାସ୍’ର ମୁକାବିଲା ପାଇଁ ପ୍ରସ୍ତୁତି ଆରମ୍ଭ ହୋଇଛି। ଜିଲା ପ୍ରଶାସନ ପକ୍ଷରୁ ବିଭିନ୍ନ ବାତ୍ୟା ଆଶ୍ରୟସ୍ଥଳୀକୁ ପ୍ରଶାସନିକ ଅଧିକାରୀମାନେ ପରିଦର୍ଶନ କରି ସ୍ଥିତି ଅନୁଧ୍ୟାନ କରୁଛନ୍ତି। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କଠାରୁ ନିର୍ଦ୍ଦେଶ ପାଇବା ପରେ ପ୍ରତ୍ୟେକ ବ୍ଲକର ତହସିଲଦାର, ବିଡିଓ ଟିମ୍ ଗଠନ କରି ବାତ୍ୟା ଆଶ୍ରୟସ୍ଥଳୀକୁ ଯାଇ ସ୍ଥିତି ପରଖିଛନ୍ତି।
ବାତ୍ୟା ପୂର୍ବରୁ ବ୍ଲକରେ ଥିବା ପ୍ରତ୍ୟେକ ବାତ୍ୟା ଆଶ୍ରୟସ୍ଥଳୀରେ ଭିତ୍ତିଭୂମି ଠିକ୍ଠାକ୍ ରହିଛି କି ନାହଁି ଅନୁଧ୍ୟାନ କରାଯାଇଛି। ସଦର ବ୍ଲକରେ ବିଡିଓ, ଅତିରିକ୍ତ ବିଡିଓ, ଅତିରିକ୍ତ ତହସିଲଦାରଙ୍କୁ ନେଇ ୪ଟି ଟିମ୍ ଗଠନ କରାଯାଇ ଅଲଗା ଅଲଗା ବାତ୍ୟା ଆଶ୍ରୟସ୍ଥଳୀକୁ ଯାଇ ଲୋକେ ରହିବା ଭଳି ସ୍ଥିତି ଯଥା-ପାନୀୟଜଳ, ଘରର ଅବସ୍ଥା, ଝରକା ଓ କବାଟ, ଶୌଚାଳୟ, ବିଦ୍ୟୁତ୍, ସଫାସୁତୁରା ଆଦିର ଅନୁଧ୍ୟାନ କରାଯାଉଛି। କୌଣସି ସ୍ଥାନରେ ଅସୁବିଧା ଥିଲେ ଜରୁରୀକାଳୀନ ଭିତ୍ତିରେ ସଜଡ଼ାଯିବାର ବ୍ୟବସ୍ଥା ହୋଇଛି। ମୁଖ୍ୟତଃ ଜିରୋ କାଜୁଆଲିଟି ଉପରେ ଗୁରୁତ୍ୱ ଦିଆଯାଉଛି। ସଦର ତହସିଲରେ ପୂର୍ବରୁ ସମସ୍ତ ବାତ୍ୟା ସମୟରେ ପ୍ରାୟ ୮ହଜାର ଲୋକଙ୍କୁ ସ୍ଥାନାନ୍ତରିତ କରାଯାଉଥିବା ବେଳେ ଚଳିତବର୍ଷ କୋଭିଡ୍-୧୯ ଗାଇଡ୍ଲାଇନ୍କୁ ଲକ୍ଷ୍ୟରେ ରଖି ୧୯ହଜାର ଲୋକଙ୍କୁ ସ୍ଥାନାନ୍ତରିତ କରାଯିବାର ଲକ୍ଷ୍ୟ ରଖାଯାଇଛି। ସେଥିପାଇଁ ସଦର ବ୍ଲକରେ ଥିବା ୩୧ ମଲ୍ଟି ପରପଜ ବାତ୍ୟା ଆଶ୍ରୟସ୍ଥଳୀ ସହ ୭୯ ସେଣ୍ଟର ଚିହ୍ନଟ କରାଯାଇ ବିଭିନ୍ନ ଦାୟିତ୍ୱ ନେବା ପାଇଁ ଟିମ୍ ଗଠନ କରାଯାଇଛି। ସରକାରଙ୍କ ସତର୍କତା ନିୟମକୁ ଅବଲମ୍ବନ କରି ଜିରୋ କାଜୁଆଲିଟି ରଖିବା ସହିତ ସମସ୍ତଙ୍କୁ ସୁରକ୍ଷିତ ରଖିବା ପାଇଁ ବ୍ୟବସ୍ଥା କରାଯାଉଛି। ପ୍ରତ୍ୟେକ ଆଶ୍ରୟସ୍ଥଳୀରେ ପ୍ରାୟ ଭିତ୍ତିଭୂମି ଭଲ ରହିଛି। ସାନିଟାଇଜ୍ କରାଯିବ। ଯଦି ବାତ୍ୟା ଉଗ୍ରରୂପ ନେଇ ବିଦ୍ୟୁତ୍ ସରବରାହରେ ବ୍ୟାଘାତ ହେଲେ ଡିଜିର ବ୍ୟବସ୍ଥା ପାଇଁ ପ୍ରସ୍ତୁତ ରହିଛି ବୋଲି ସଦର ତହସିଲଦାର ଅନାମିକା ସିଂ ପ୍ରକାଶ କରିଛନ୍ତି।
