କାମାକ୍ଷାନଗର,୨୮।୧୦(ଡି.ଏନ୍.ଏ.): ଢେଙ୍କାନାଳ ଜିଲାର ଆଦିବାସୀ ଅଧ୍ୟୁଷିତ କଙ୍କଡ଼ାହାଡ଼ ବ୍ଲକରେ ସରକାରୀ ଯୋଜନାର ଅର୍ଥ ହରିଲୁଟ୍ ହେଉଥିବା ଅଭିଯୋଗ ହେଉଛି। ଜନଜାତି ସମ୍ପ୍ରଦାୟର ଲୋକଙ୍କ ଲାଗି ଆସୁଥିବା ଜନହିତକର ପ୍ରକଳ୍ପ ସମ୍ପର୍କିତ ଅନୁଦାନ ଟଙ୍କା ହଡ଼ପ କରାଯାଉଥିବା ସୂଚନା ଅଧିକାର କର୍ମୀ ଅରବିନ୍ଦ ପାଳ କହିଛନ୍ତି। ଏପରି କି ସୂଚନା ଅଧିକାର ଆଇନ ବଳରେ ଏ ସମ୍ପର୍କିତ ତଥ୍ୟ ମାଗିଲେ ଦାୟିତ୍ୱରେ ଥିବା ଅଧିକାରୀ ଦେଉନାହାନ୍ତି, ଯାହାକୁ ନେଇ ସାଧାରଣରେ ଅସନ୍ତୋଷ ତୀବ୍ର ହେବାରେ ଲାଗିଛି। ଅନ୍ୟପଟେ ଜନସ୍ବାର୍ଥ ସମ୍ପର୍କିତ ପ୍ରସଙ୍ଗରେ ଏଭଳି ଅବହେଳା ପାଇଁ ସମ୍ପୃକ୍ତ ଅଧିକାରୀଙ୍କୁ ପଦସ୍ଥ ଅଧିକାରୀଙ୍କ ପକ୍ଷରୁ ତାଗିଦ୍ କରାଯାଇଛି।
ରାଇବୋଲ ପଞ୍ଚାୟତରେ ୨୦୧୯-୨୦ରୁ ୨୦୨୨-୨୩ ଆର୍ଥିକ ବର୍ଷରେ ଏମ୍ଜିଏନ୍ଆର୍ଇଜିଏସ୍ରେ ହୋଇଥିବା କାର୍ଯ୍ୟ, ଭତ୍ତା, ସାଧାରଣ ବଣ୍ଟନ ବ୍ୟବସ୍ଥାରେ ଅନ୍ତର୍ଭୁକ୍ତ ହିତାଧିକାରୀଙ୍କ ସମ୍ପର୍କରେ କଙ୍କଡ଼ାହାଡ଼ ଗ୍ରାମର ସୂଚନା ଅଧିକାର କର୍ମୀ ଅରବିନ୍ଦ ତଥ୍ୟ ମାଗିଥିଲେ। ତେବେ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ତଥା ସୂଚନା ଅଧିକାରୀ (ପିଆଇଓ) ଝୁନାରାଣୀ ସିଂ ଏହାକୁ ଗ୍ରହଣ କରି ନ ଥିଲେ। ଫଳରେ ଗତ ୧୪ ତାରିଖରେ ଉକ୍ତ ଆବେଦନ ଫର୍ମ ଫେରି ଆସିଥିଲା। ତେବେ ଚିଠି ଉପରେ ୭ଦିନ ଧରି ପଞ୍ଚାୟତ କାର୍ଯ୍ୟାଳୟ ଖୋଲାଯାଇ ନ ଥିବା ଉଲ୍ଲେଖ ରହିଛି, ଯାହା ଅନ୍ୟ ଏକ ବିବାଦ ସୃଷ୍ଟି କରିଛି। ଏତେଦିନ ଯାଏ କାହିଁକି ପଞ୍ଚାୟତ କାର୍ଯ୍ୟାଳୟ ଖୋଲାଯାଇ ନ ଥିବା ତାହାକୁ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ଘଟଣାର ସତ୍ୟାସତ୍ୟ ଜାଣିବା ଲାଗି ପିଆଇଓ ସିଂଙ୍କୁ ତାଙ୍କ ମୋବାଇଲ (ନଂ. ୮୬୫୮୪୩୨୫୩୯)ଯୋଗାଯୋଗ କରାଯାଇଥିଲେ ହେଁ ସେ ଫୋନ୍ ଉଠାଇ ନ ଥିଲେ। ତେଣୁ ତାଙ୍କର ପ୍ରତିକ୍ରିୟା ମିଳିପାରିନାହିଁ।
ଏ ନେଇ ଗ୍ରାମ ପଞ୍ଚାୟତ ସମ୍ପ୍ରସାରଣ ଅଧିକାରୀ (ଜିପିଇଓ) ଦାୟିତ୍ୱରେ ଥିବା ସୁରେଶ ଚନ୍ଦ୍ର ପଣ୍ଡାଙ୍କ ପ୍ରତିକ୍ରିୟା ଲୋଡ଼ାଯିବାରୁ ସେ ପିଆଇଓଙ୍କୁ ତାଗିଦ୍ କରିଥିବା କହିଛନ୍ତି। ଏଥିସହ କାହିଁକି ୭ଦିନ ହେଲା ପଞ୍ଚାୟତ ଅଫିସ୍ ବନ୍ଦ ଥିଲା ତାହାର ସ୍ପଷ୍ଟୀକରଣ ମାଗିଛନ୍ତି। ଅନ୍ୟପଟେ ଏହାର ସତ୍ୟାସତ୍ୟ ଅନୁଧ୍ୟାନ କରିବା ଲାଗି ସୂଚନାଧିକାର କର୍ମୀ ଅରବିନ୍ଦ ଜିଲା ପ୍ରଶାସନ ନିକଟରେ ଦାବି କରିଛନ୍ତି।
