ଭୁବନେଶ୍ୱର, ୩।୧ (ତପନ ସ୍ବାଇଁ): କଟକର ଜବାହରଲାଲ ନେହେରୁ ଇନ୍ଡୋର ଷ୍ଟାଡିୟମରେ ଚାଲିଥିବା ଅଲ୍ଟିମେଟ ଖୋ ଖୋରେ ମଙ୍ଗଳବାର ଅନୁଷ୍ଠିତ ଓଡ଼ିଶା ଜଗରନଟ୍ସ-ଚେନ୍ନାଇ କୁଇକ୍ ଗନ୍ସ ମ୍ୟାଚ ୩୦-୩୦ ପଏଣ୍ଟରେ ଟାଇ ରହିଛି। ଏହା ପୂର୍ବରୁ ଦୁଇ ଦଳ ମଧ୍ୟରେ ଅନୁଷ୍ଠିତ ମ୍ୟାଚ ମଧ୍ୟ ଟାଇ ରହିଥିଲା। ଶେଷ ପର୍ଯ୍ୟାୟରେ ଓଡ଼ିଶା ଖେଳାଳିମାନେ ଚମତ୍କାର ଡିଫେଣ୍ଡ କରି ଚେନ୍ନାଇକୁ ପଏଣ୍ଟ ଭାଗ କରିବାକୁ ବାଧ୍ୟ କରି ଦେଇଥିଲେ। ଜଗରନଟ୍ସ ପକ୍ଷରୁ ମହେଶ ପି. ୬ ପଏଣ୍ଟ ହାସଲ କରିଥିବାବେଳେ ଚେନ୍ନାଇ କୁଇକ୍ ଗନ୍ସର ରାମଜି କାଶ୍ୟପ ସର୍ବାଧିକ ୩.୪୮ ସେକେଣ୍ଡ ଡିଫେଣ୍ଡ କରିଥିଲେ। ଓଡ଼ିଶା ଜଗରନଟ୍ସ ଦଳ ଏପର୍ଯ୍ୟନ୍ତ ୬ଟି ମ୍ୟାଚ ଖେଳିଥିବାବେଳେ ୨ଟି ଲେଖାଏ ବିଜୟ, ପରାଜୟ ଓ ମ୍ୟାଚ ଟାଇ ରଖିଛି। ପୂର୍ବ ୨ ମ୍ୟାଚରେ ଦଳ ଡିସେମ୍ବର ୩୦ରେ ଦଳ ଗୁଜରାଟ ଜାଏଣ୍ଟ୍ସଠାରୁ ୨୯-୩୪ ଓ ୩୧ରେ ତେଲୁଗୁ ଯୋଦ୍ଧାସଠାରୁ ୨୮-୨୯ ପଏଣ୍ଟରେ ହାରିଥିଲା। ରାଜସ୍ଥାନ ଓ୍ବାରିୟର୍ସ ବିପକ୍ଷରେ ୩୫-୨୭ରେ ବିଜୟ ସହ ଅଭିଯାନ ଆରମ୍ଭ କରିଥିବା ଜଗରନଟ୍ସ ପରବର୍ତ୍ତୀ ମ୍ୟାଚକୁ ଚେନ୍ନାଇ କୁଇକ୍ ଗନ୍ସ ସହ ୩୪-୩୪ରେ ଟାଇ ରଖିଥିଲା। ନିଜର ତୃତୀୟ ମ୍ୟାଚରେ ଏହି ଦଳ ମୁମ୍ବାଇ ଖିଲାଡିଜ୍କୁ ୩୧-୨୮ରେ ପରାସ୍ତ କରିଥିଲା। ଓଡ଼ିଶା-ଚେନ୍ନାଇ ପୂର୍ବ ମ୍ୟାଚ ବେଶ୍ ରୋମାଞ୍ଚକ ରହିଥିଲା। ଚେନ୍ନାଇ କୁଇକ୍ ଗନ୍ସ ୬ ମ୍ୟାଚରୁ ୪ ବିଜୟ ଓ ୨ ଟାଇ ସହ ୧୬ ପଏଣ୍ଟ ପାଇ ଶୀର୍ଷରେ ନିଜ ସ୍ଥାନ ଦୃଢ଼ କରିଛି। ବୁଧବାର ମୁମ୍ବାଇ ଖିଲାଡିଜ୍ ପ୍ରଥମ ମ୍ୟାଚରେ ତେଲୁଗୁ ଯୋଦ୍ଧାସକୁ ଭେଟିବ।
ମୁମ୍ବାଇ ୨୬-ଗୁଜରାଟ ୨୬
ଦିବସର ଦ୍ୱିତୀୟ ମ୍ୟାଚ ମଧ୍ୟ ଟାଇ ରହିଛି। ମୁମ୍ବାଇ ଖିଲାଡିଜ୍ ଓ ଗୁଜରାଟ ଜାଏଣ୍ଟ୍ସ ମଧ୍ୟରେ ଅନୁଷ୍ଠିତ ମ୍ୟାଚ ୨୬-୨୬ରେ ଶେଷ ହୋଇଛି। ୬ ମ୍ୟାଚରୁ ଗୁଜରାଟ ୧୪ ଓ ମୁମ୍ବାଇ ୭ ପଏଣ୍ଟ ପାଇଛି।
