ଭୁବନେଶ୍ୱର, ୪।୧(କ୍ରୀଡ଼ା ପ୍ରତିନିଧି)- ଓଡ଼ିଶା କ୍ରିକେଟ ଆସୋସିଏଶନ (ଓସିଏ) ଆନୁକୂଲ୍ୟରେ କଟକର ବାରବାଟୀ ଷ୍ଟାଡିୟମରେ ଚାଲିଥିବା ଏମ୍ଜିଏମ୍ ଟି୨୦ କ୍ରିକେଟ ଲିଗ୍ର ରବିବାର ଅନୁଷ୍ଠିତ ମ୍ୟାଚରେ ଓଡ଼ିଶା ପାନ୍ଥର୍ସ ସୁପର ଓଭରରେ ବିଜୟୀ ହୋଇଛି। ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଓଡ଼ିଶା ଜାଗୁଆର୍ସ ୨୦ ଓଭରରେ ୭ ଉଇକେଟ ହରାଇ ୧୦୫ ରନ କରିଥିଲା। ଗିରିଜା ରାଉତ ସର୍ବାଧିକ ୩୬ ରନ କରିଥିବାବେଳେ ବିପକ୍ଷ ଦଳର ଜୟନ୍ତ ବେହେରା ଓ ଶୁଭମ୍ ନାୟକ ୨ଟି ଲେଖାଏ ଏବଂ ବସନ୍ତ ମହାନ୍ତି ଓ ଆଲୋକ ସାହୁ ଗୋଟିଏ ଲେଖାଏ ଉଇକେଟ ନେଇଥିଲେ। ଜବାବରେ ପାନ୍ଥର୍ସ ପୂରା ୨୦ ଓଭର ଖେଳିଥିଲେ ହେଁ ୭ ଉଇକେଟ ହରାଇ ସେହି ୧୦୫ ରନରେ ସୀମିତ ରହିଥିଲା। ନିଶିକାନ୍ତ ରାଉତ ୩୨ ରନରେ ଅପରାଜିତ ରହିଥିଲେ ହେଁ ଦଳକୁ ଜିତାଇପାରି ନ ଥିଲେ। ସ୍ପର୍ଶ ସୋମାନି ୩୧ ଓ ଆଲୋକ ସାହୁ ୨୫ ରନ କରିଥିଲେ। ପ୍ରତିପକ୍ଷ ଦଳର ନିର୍ବିଶଙ୍କର ବାରିକ ୨ଟି ଏବଂ ମନୋଜ କାଶ୍ୟପ, ରାହୁଲ ଚୌଧାରୀ, ରଶ୍ମିରଞ୍ଜନ ସାହୁ ଓ ଅଭିଜିତ ବାରିକ ଗୋଟିଏ ଲେଖାଏ ଉଇକେଟ ନେଇଥିଲେ। ସ୍କୋର ବରାବର ରହିବାରୁ ଫଳାଫଳ ନିର୍ଣ୍ଣୟ ପାଇଁ ସୁପରଓଭରର ସହାୟତା ନିଆ ଯାଇଥିଲା। ସୁପର ଓଭରରେ ପ୍ରଥମେ ବ୍ୟାଟିଂ କରିଥିବା ପାନ୍ଥର୍ସ ୭ ରନ କରି ୨ଟିଯାକ ଉଇକେଟ ହରାଇଥିଲା। ଜବାବରେ ଜାଗୁଆର୍ସ ୫ଟି ବଲ ଖେଳି ୪ ରନ କରିଥିବାବେଳେ ୨ ଉଇକେଟ ହରାଇ ଅଲ୍ଆଉଟ ହୋଇଯାଇଥିଲା। ବିଜୟୀ ଦଳର ନିଶିକାନ୍ତ ରାଉତ ମ୍ୟାନ ଅଫ ଦି ମ୍ୟାଚ ପୁରସ୍କାର ପାଇଥିଲେ। ପ୍ରତିଯୋଗିତାରେ ଅପରାଜେୟ ଥିବା ପାନ୍ଥର୍ସର ଏହା ୫ ମ୍ୟାଚରୁ ୫ ବିଜୟ ହୋଇଥିବାବେଳେ ଜାଗୁଆର୍ସର ୪ ମ୍ୟାଚରୁ ୪ ପରାଜୟ।
