କଟକ,୩।୮(ପ୍ରଭୁକଲ୍ୟାଣ ପାଲ୍): ଏମକେସିଜି ମେଡିକାଲ କଲେଜର ପିଜି ଶେଷ ବର୍ଷ ପରୀକ୍ଷା ସମୟରେ ପ୍ରଶ୍ନପତ୍ର ଭାଇରାଲ ହୋଇଥିଲା । ଏହି ମାମାଲାର ତଦନ୍ତ ଭାର କ୍ରାଇମବ୍ରାଞ୍ଚକୁ ହସ୍ତାନ୍ତର କରାଯାଇଛି । ତଦନ୍ତ ପାଇଁ ସ୍ଵତନ୍ତ୍ର ଟିମ୍ ଗଠନ କରାଯିବ ।
ଏହି ମାମାଲାର ପ୍ରାଥମିକ ପର୍ଯ୍ୟାୟରେ ଖୋଳତାଡ଼ ଆରମ୍ଭ ହୋଉଛି। ଏନେଇ କ୍ରାଇମବ୍ରାଞ୍ଚ ଆଇଜି ସାର୍ଥକ ଷଡଙ୍ଗୀ ସୂଚନା ଦେଇଛନ୍ତି । ଓଡ଼ିଶା ସ୍ୱାସ୍ଥ୍ୟ ବିଶ୍ୱବିଦ୍ୟାଳୟ ଅଧୀନରେ ଚାଲିଥିବା ୨୦୨୩-୨୬ ବ୍ୟାଚ୍ ଜେନେରାଲ ସର୍ଜରୀ ବାର୍ଷିକ ପରୀକ୍ଷାର ପ୍ରଶ୍ନପତ୍ର ଲିକ୍ ହୋଇଥିବା ନେଇ ସାଘାଂତିକ ଅଭିଯୋଗ ପଦାକୁ ଆସିବା ପରେ ଏବେ ହଟଚମଟ ସୃଷ୍ଟି ହୋଇଛି । ସୂଚନ ଯୋଗ୍ୟ ଯେ ଏହି ପରୀକ୍ଷା ଗତ ଜୁଲାଇ ମାସ ୨୧ ତାରିଖରୁ ଆରମ୍ଭ ହୋଇଥିଲା। ଏମକେସିଜି କଲେଜରେ ୨୭ ତାରିଖରେ ପ୍ରଶ୍ନପତ୍ର ଭାଇରାଲ ହୋଇଥିଲା। ଏହାକୁ ନେଇ ଏମକେସିଜିର କୁଳପତି ତଦନ୍ତ ପାଇଁ ୫ ଜଣିଆ ଟିମ୍ ଗଠନ କରିଥିଲେ । ତେବେ ପରୀକ୍ଷାକେନ୍ଦ୍ରରୁ ପ୍ରଶ୍ନପତ୍ରର ଫଟୋ ଉଠାଇ ଦୁଇଟି ସୋସିଆଲ ମିଡିଆ ଗ୍ରୁପରେ ସୋୟାର ହୋଇଥିବା ନେଇ ଓଡ଼ିଶା ସ୍ବାସ୍ଥ୍ୟ ବିଶ୍ବବିଦ୍ୟାଳୟରେ ନିକଟରେ ଅଭିଯୋଗ ହୋଇଥିଲା ।
ଅଭିଯୋଗ ଆସିବା ପରେ ଓଡ଼ିଶା ସ୍ବାସ୍ଥ୍ୟ ବିଶ୍ବବିଦ୍ୟାଳୟର ଏକ ଟିମ୍ ଏମକେସିଜିରେ ପହଞ୍ଚି ଘଟଣା ସଂପର୍କରେ ଅବଗତ କରିବା ସହିତ ଏହାକୁ ନେଇ କର୍ତ୍ତୁପକ୍ଷଙ୍କ ସହିତ ଆଲୋଚନା କରିଥିଲା। ତେବେ ମେଡିକାଲ ପରୀକ୍ଷାରେ ଯାଞ୍ଚ କଡାକଡି ହେଉଥିବାବେଳେ କିଏ ଓ କିଭଳି ପରୀକ୍ଷା ପ୍ରଶ୍ନପତ୍ର ଫଟୋ ଉଠାଇ ସୋସିଆଲ ମିଡିଆ ୱାଟସଆପ ଗ୍ରୁପରେ ପୋଷ୍ଟ କରିଥିଲେ ଏବଂ ଗ୍ରୁପରେ ତାହାର ଉତ୍ତର ପାଇଥିଲେ ତାହାକୁ ନେଇ ଚର୍ଚ୍ଚା ଲାଗିରହିଛି ।
