ଭୁବନେଶ୍ୱର, ୩୦।୮ (କ୍ରୀଡ଼ା ପ୍ରତିନିଧି): ପୁଣେର ମହାଲୁଙ୍ଗେସ୍ଥିତ ଶ୍ରୀ ଶିବ ଛତ୍ରପତି ସ୍ପୋଟର୍ସ କମ୍ପ୍ଲେକ୍ସରେ ଚାଲିଥିବା ଅଲ୍ଟିମେଟ୍ ଖୋ ଖୋ ଲିଗ୍ରେ ସୋମବାର ୨ଟି ମ୍ୟାଚ ଅନୁଷ୍ଠିତ ହୋଇଯାଇଛି। ଏଥିରେ ଚେନ୍ନାଇ କୁଇକ୍ ଗନ୍ସ ୧୬ (୫୮-୪୨) ପଏଣ୍ଟରେ ମୁମ୍ବାଇ ଖିଲାଡିଜ୍କୁ ହରାଇ ୪ର୍ଥ ଦଳଭାବେ ପ୍ଲେ-ଅଫ୍ରେ ପ୍ରବେଶ କରିଛି। ଅନ୍ୟଏକ ମ୍ୟାଚରେ ତେଲଗୁ ଯୋଦ୍ଧାସ ୬୭ (୮୮-୨୧) ପଏଣ୍ଟରେ ଗୁଜରାଟ ଜାଏଣ୍ଟ୍ସକୁ ହରାଇ ଦେଇଛି। ଏଥିସହ ପ୍ରତିଯୋଗିତାର ପ୍ଲେ-ଅଫ୍ ଷ୍ଟାଣ୍ଡିଂ ଚୂଡ଼ାନ୍ତ ହୋଇଯାଇଛି। ଭୁବନେଶ୍ୱର ଭିତ୍ତିକ ଫ୍ରାଞ୍ଚାଇଜ୍ ଓଡ଼ିଶା ଜଗରନଟ୍ସ ୮ ମ୍ୟାଚରୁ ୭ ବିଜୟ ସହ ୨୧ ପଏଣ୍ଟ ପାଇ ଟେବୁଲର ଶୀର୍ଷରେ ରହିଛି। ଗୁଜରାଟ ଦଳ ୯ ମ୍ୟାଚରୁ ୨୦ ପଏଣ୍ଟ ସହିତ ଦ୍ୱିତୀୟ, ତେଲ୍ଗୁ ଯୋଦ୍ଧାସ ୯ ମ୍ୟାଚରୁ ୧୬ ଓ ଚେନ୍ନାଇ କୁଇକ୍ ଗନ୍ସ ୯ ମ୍ୟାଚରୁ ୧୫ ପଏଣ୍ଟ ପାଇ ଆଗକୁ ବଢ଼ିଛି। ମୁମ୍ବାଇ ଖିଲାଡିଜ୍ ୯ ମ୍ୟାଚରୁ ୯ ଓ ରାଜସ୍ଥାନ ଓ୍ବାରିୟର୍ସ ୮ ମ୍ୟାଚରୁ ୧ ପଏଣ୍ଟ ପାଇ ବିଦାୟ ନେଇଛି। ପ୍ରତିଯୋଗିତାରେ ଆଉ ୪ଟି ଗ୍ରୁପ୍ ମ୍ୟାଚ ବାକି ରହିଛି। ତେଣୁ ଓଡ଼ିଶା ଦଳ ଶୀର୍ଷ ୨ ଦଳ ମଧ୍ୟରେ ରହିବା ନିଶ୍ଚିତ ହୋଇଯାଇଛି। ଜଗରନଟ୍ସ ଏହାର ପରବର୍ତ୍ତୀ ୨ଟି ମ୍ୟାଚରେ ଯଥାକ୍ରମେ ମୁମ୍ବାଇ ଖିଲାଡିଜ୍ ଓ ତେଲଗୁ ଯୋଦ୍ଧାସକୁ ଭେଟିବ।
