ଭୁବନେଶ୍ୱର,୧୪।୫: ଓଡ଼ିଶା ରାଜ୍ୟ ମନ୍ତ୍ରୀମଣ୍ଡଳୀ ରାଜ୍ୟର ‘ମମତା’ ଯୋଜନାକୁ କେନ୍ଦ୍ର ସରକାରଙ୍କ ‘ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନା (PMMVY)’ ସହିତ ସମନ୍ୱିତ ଭାବେ ‘ମମତା-PMMVY’ ନାମରେ କୋ-ବ୍ରାଣ୍ଡିଂ ମାଧ୍ୟମରେ କାର୍ଯ୍ୟକାରୀ କରିବାକୁ ଅନୁମୋଦନ ପ୍ରଦାନ କରିଛି। ନିମ୍ନରେ ଏହି ଯୋଜନାର ମୁଖ୍ୟ ବିଷୟଗୁଡ଼ିକ ଉଲ୍ଲେଖ କରାଯାଇଛି:
ମମତା ଓ PMMVYର ସମନ୍ୱୟ: ରାଜ୍ୟ ମନ୍ତ୍ରୀମଣ୍ଡଳୀ ନିଷ୍ପତ୍ତି ନେଇଛି ଯେ ‘ମମତା’ ଏବଂ ‘ପ୍ରଧାନମନ୍ତ୍ରୀ ମାତୃ ବନ୍ଦନା ଯୋଜନା’କୁ ୧ ଏପ୍ରିଲ ୨୦୨୫ରୁ ମିଳିତ ଭାବେ ‘ମମତା-PMMVY’ ନାମରେ କାର୍ଯ୍ୟକାରୀ କରାଯିବ।
ଝିଅ ସନ୍ତାନ ଜନ୍ମ ପାଇଁ ଅଧିକ ସହାୟତା: ପୂର୍ବରୁ ‘ମମତା’ ଯୋଜନା ଅଧୀନରେ ଝିଅ ସନ୍ତାନ ଜନ୍ମ ପାଇଁ ହିତାଧିକାରୀଙ୍କୁ ୧୦,୦୦୦ ଟଙ୍କା ମିଳୁଥିଲା। ଏବେ ‘ମମତା-PMMVY’ ଅଧୀନରେ ଏହା ବୃଦ୍ଧି କରି ୧୨,୦୦୦ ଟଙ୍କା କରାଯାଇଛି।
ପୁଅ ସନ୍ତାନ ଜନ୍ମ ପାଇଁ ସହାୟତା: ‘ମମତା-PMMVY’ ଅଧୀନରେ ପୁଅ ସନ୍ତାନ ଜନ୍ମ ପାଇଁ ହିତାଧିକାରୀଙ୍କୁ ୧୦,୦୦୦ ଟଙ୍କା ପ୍ରଦାନ କରାଯିବ।
PVTG ସମ୍ପ୍ରଦାୟ ପାଇଁ ସ୍ୱତନ୍ତ୍ର ସହାୟତା: ଅତ୍ୟନ୍ତ ପଛୁଆ ଜନଜାତି (PVTG) ସମ୍ପ୍ରଦାୟର ମହିଳାମାନଙ୍କୁ ସମସ୍ତ ଜୀବନ୍ତ ଜନ୍ମ ପାଇଁ ଝିଅ ସନ୍ତାନ ଜନ୍ମ ହେଲେ ୧୨,୦୦୦ ଟଙ୍କା ଏବଂ ପୁଅ ସନ୍ତାନ ଜନ୍ମ ହେଲେ ୧୦,୦୦୦ ଟଙ୍କା ପ୍ରଦାନ କରାଯିବ।
ଅଙ୍ଗନବାଡ଼ି କର୍ମୀଙ୍କ ପାଇଁ ବୃଦ୍ଧିପ୍ରାପ୍ତ ପ୍ରୋତ୍ସାହନ: ପୂର୍ବରୁ ଅଙ୍ଗନବାଡ଼ି କର୍ମୀ (AWW) ଏବଂ ଅଙ୍ଗନବାଡ଼ି ସହାୟିକା (AWH) ମାନେ ପ୍ରୋତ୍ସାହନ ରାଶି ଭାବେ ଯଥାକ୍ରମେ ୨୦୦ ଟଙ୍କା ଏବଂ ୧୦୦ ଟଙ୍କା ପାଉଥିଲେ। ‘ମମତା-PMMVY’ ଅଧୀନରେ ଏବେ ଏହା ବୃଦ୍ଧି କରି AWW ପାଇଁ ୨୫୦ ଟଙ୍କା ଏବଂ AWH ପାଇଁ ୧୫୦ ଟଙ୍କା କରାଯାଇଛି।
ଯୋଗ୍ୟତା ମାନଦଣ୍ଡ: ଭାରତ ସରକାରଙ୍କ PMMVY ଯୋଜନାର ଯୋଗ୍ୟତା ମାନଦଣ୍ଡ ‘ମମତା-PMMVY’ ଯୋଜନା ପାଇଁ ମଧ୍ୟ ପ୍ରଯୁଜ୍ୟ ହେବ।
ଆଗାମୀ ପାଞ୍ଚ ବର୍ଷର ଖର୍ଚ୍ଚ: ‘ମମତା-PMMVY’ ଯୋଜନା ପାଇଁ ଆଗାମୀ ପାଞ୍ଚ ବର୍ଷରେ ପ୍ରାୟ ୨,୬୭୦ କୋଟି ଟଙ୍କା ଖର୍ଚ୍ଚ ହେବ ବୋଲି ଅନୁମାନ କରାଯାଇଛି।
