ଛେଣ୍ଡିପଦା,୨୫।୬(ଅଜିତ ଧଳ): ଅନୁଗୋଳ ଜିଲା ଜରପଡ଼ା ବନାଞ୍ଚଳର କତଡା ଡ଼ଙ୍ଗାଧର ସାହିରେ ବୁଧବାର ଏକ ଅଭାବନୀୟ ଘଟଣା ଘଟିଛି । ହାତୀ ଘଉଡ଼ାଇବାକୁ ଯାଇଥିବା ବେଳେ ହାତୀ ଆକ୍ରମଣରେ ଜଣେ ଗଜସାଥୀଙ୍କର ମୃତ୍ୟୁ ଘଟିଛି। ମୃତକ ହେଲେ କତଡ଼ା ଗାଁର ଯୁଗଳ ନାଏକ। ଏହା ଜଣାପଡ଼ିବା ପରେ ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। ଜରପଡା ପୋଲିସ ଓ ବନବିଭାଗ ପହଞ୍ଚି ଉତ୍ୟକ୍ତ ଲୋକଙ୍କୁ ବୁଝାଶୁଝା ପାଇଁ ଉଦ୍ୟମ ଚଳାଇଛି ।
ସୂଚନାନୁଯାୟୀ, ବିଳମ୍ବିତ ରାତିରେ ଜରପଡା ବନାଞ୍ଚଳର କତଡ଼ା ଭାଗିରଥିପୁର ଡ଼ଙ୍ଗାଧର ସାହିକୁ ହାତୀପଲ ଗାଁ ନିକଟକୁ ପଶି ଆସିଥିଲେ । ଖବର ପାଇ ହାତୀ ସ୍କ୍ବାର୍ଡ ଓ ଗଜସାଥି ମିଳିତ ଭାବେ ହାତୀ ଘଉଡ଼ାଇବା ପାଇଁ ଡ଼ଙ୍ଗାଧର ସାହିକୁ ଯାଇଥିଲେ । ସେଠାରେ ହାତୀ ଘଉଡ଼ାଇବା ବେଳେ ଏକ ହାତୀ ହାବୁଡ଼ରେ ଗଜସାଥି ଯୁଗଳ ପଡିଯାଇଥିଲେ । ଫଳରେ ସାଥି କର୍ମଚାରୀମାନଙ୍କ ଆଗରେ ହାତୀ ଯୁଗଳକୁ ଶୁଣ୍ଢରେ କଚାଡି ମାରି ଦେଇଥିଲା । ଏନେଇ ଖବର ପାଇ ଘଟଣାସ୍ଥଳର ଯୁଗଳଙ୍କ ପରିବାର ସ୍ଥାନୀୟ ଲୋକେ ପହଁଚିଥିଲେ। ପରେ ଯୁଗଳଙ୍କ ମୃତ୍ୟକୁ ନେଇ କ୍ଷତିପୂରଣ ଦାବି ନେଇ ତୀବ୍ର ଉତ୍ତେଜନା ଦେଖା ଦେଇଥିଲା। ଖବର ଲେଖାଯିବା ପର୍ଯ୍ୟନ୍ତ କୌଣସି ସମାଧାନ ନ ହେବାରୁ ଦୀର୍ଘ ୭ ଘଣ୍ଟାରୁ ଊଦ୍ଧ୍ୱର୍ର୍ ହେବ ଘଟଣା ସ୍ଥଳରେ ମୃତଦେହ ପଡିରହିଛି ।
