ନୟାଗଡ଼,୧୩ା୫(ଲୋକନାଥ ମିଶ୍ର): ନୟାଗଡ଼ ଜିଲା ଓଡ଼ଗାଁ ଆଦର୍ଶ ଥାନାଠାରୁ ପ୍ରାୟ ୨କିମି ଦୂର କଦଳୀବନ୍ଧଠାରେ ଗତ ରବିବାର ରାତିରେ ଘଟିଥିବା ଓଡ଼ଗାଁ ଖେଳପଡ଼ିଆ ସାହିର ଅଜିତ କୁମାର ସାହୁ(୩୮)ଙ୍କ ହତ୍ୟାର ସିନ ରିକ୍ରିଏଶନ କରୁଛି ପୋଲିସ। ହତ୍ୟାକାଣ୍ଡସ୍ଥଳ କଦଳୀବନ୍ଧ ଗାଁ ନିକଟସ୍ଥ ନୟାଗଡ଼ ଭଞ୍ଜନଗର ରାସ୍ତା ନିକଟରେ ଅଭିଯୁକ୍ତମାନେ କେମିତି ହତ୍ୟା କଲେ ଦେଖାଉଛନ୍ତି। ଏହି ହତ୍ୟାକାଣ୍ଡରେ ୭ ଜଣ ନିୟୋଜିତ ହୋଇଥିଲେ ହେଁ ୬ଜଣଙ୍କ ନାଁରେ ଅଭିଯୋଗ ହୋଇଥିଲା। ଏମାନଙ୍କ ମଧ୍ୟରୁ ଓଡ଼ଗାଁର ପୂର୍ଣ୍ଣଚନ୍ଦ୍ର ନାୟକ, ରୋହିବାଙ୍କ ଧୋବାସାହିର ମହନ୍ତ ନାୟକ, ଓଡ଼ଗାଁ ମହାପୁରସାହିର ମାନସ ବେହେରା ଓ କୋମଣ୍ଡ ମକରପଦାର ଶ୍ରୀଧର ସାହୁଙ୍କ ସମେତ ୪ ଜଣ ମୁଖ୍ୟ ଅଭିଯୁକ୍ତଙ୍କୁ ପୋଲିସ ଗିରଫ କରିଛି।
ସୂଚନା ଅନୁସାରେ, ରବିବାର ରାତିରେ ଓଡ଼ଗାଁ ଖେଳପଡ଼ିଆ ସାହିର ଅଜିତ କୁମାର ସାହୁ ନିଜ ବନ୍ଧୁ ସନ୍ତୋଷ କୁମାର ପ୍ରଧାନଙ୍କ କାର୍ରେ ଯାତ୍ରା କରୁଥିଲେ। କଦଳୀବନ୍ଧଠାରେ ରବିବାର ରାତି ପ୍ରାୟ ୧୨.୫୦ରେ ଦୁଇ ବନ୍ଧୁ ଅଟକି ମାଙ୍କଡାପଥର ବୋଝେଇ ଦୁଇଟି ଟ୍ରକ୍କୁ ଅଟକାଇ ମାଙ୍କଡ଼ାପଥର ବେଆଇନ ପରିବହନ ସମ୍ପର୍କିିତ ସମସ୍ୟାର ସମାଧାନ ପାଇଁ ଟଙ୍କା ମାଗିଥିଲେ। ଏହାପରେ ଅଭିଯୁକ୍ତଙ୍କ ସହ ଦୁଇ ବନ୍ଧୁ ଅଜିତ ଓ ସନ୍ତୋଷଙ୍କ ସହ ପୂର୍ଣ୍ଣଚନ୍ଦ୍ରଙ୍କର ଯୁକ୍ତିତର୍କ କଥାକଟାକଟି ହୋଇଥିଲା। ପରେ ପରେ ଅଜିତଙ୍କୁ ହାଣି ଚାଲିଥିଲେ। ଆଜିତଙ୍କର ଉଭୟ ହାତରେ ଗଭୀର କ୍ଷତ ସୃଷ୍ଟି ହୋଇଥିଲା। ପରେ ଡାହାଣ ହାତର ପାପୁଲି କଟି ଯାଇଥିଲା। ଘଟଣାସ୍ଥଳରେ ଅଜିିତଙ୍କର ମୃତ୍ୟୁ ହୋଇଥିଲା। ଅଭିଯୁକ୍ତମାନେ ହତ୍ୟାକାଣ୍ଡ ଘଟାଇ ଫେରାର ହୋଇଯାଇଥିଲେ। ଅଜିତଙ୍କ ସାଙ୍ଗ ଘଟଣାସ୍ଥଳରୁ ବୁଦ୍ଧି ଖଟାଇ ଖସି ଯାଇଥିଲେ।
