କଟକ ଅଫିସ, ୮ା୧୦: ଓଡ଼ିଶା ଲୋକସେବା ଆୟୋଗ (ଓପିଏସ୍ସି) ଦ୍ୱାରା ପରିଚାଳିତ ଓଡ଼ିଶା ସିଭିଲ ସର୍ଭିସ ପରୀକ୍ଷା(ଓସିଏସ୍) ୨୦୨୦ ଫଳ ଶୁକ୍ରବାର ପ୍ରକାଶ ପାଇଛି। ମୋଟ୍ ୩୯୨ ଜଣ ପରୀକ୍ଷାର୍ଥୀ କୃତକାର୍ଯ୍ୟ ହୋଇଛନ୍ତି। ସେମାନଙ୍କ ମଧ୍ୟରେ ୨୪୪ ଜଣ ପୁଅ ଓ ୧୪୮ ଜଣ ଝିଅ ରହିଛନ୍ତି। ଶୀର୍ଷ ୧୦ ଜଣଙ୍କ ମଧ୍ୟରେ ୭ ଜଣ ମହିଳା ପରୀକ୍ଷାର୍ଥୀ ଥିବାବେଳେ ପ୍ରଥମ ତିନୋଟି ସ୍ଥାନରେ ମହିଳା ଅଛନ୍ତି। ତେଜସ୍ବିନୀ ବେହେରା ଓସିଏସ୍ ଟପ୍ପର ହୋଇଛନ୍ତି ା ସେହିପରି ଦ୍ୱିତୀୟ ସ୍ଥାନରେ ଶୁଭଙ୍କରୀ ସୁଦେଷ୍ଣା ଦାଶ, ତୃତୀୟ ସ୍ଥାନରେ ଅନନ୍ୟା ସୃଷ୍ଟି ଶତପଥୀ ରହିଛନ୍ତି। ଏଥିସହ ଚତୁର୍ଥ ସ୍ଥାନରେ ଦେବବ୍ରତ କର, ପଞ୍ଚମରେ ଦେବବ୍ରତ ମହାରଣା, ଷଷ୍ଠରେ ଅଭିସ୍ମିତା ତିୱାରୀ, ସପ୍ତମରେ ଶୁଭଶ୍ରୀ ରଥ, ଅଷ୍ଟମରେ ଶ୍ରୀତପା ମିଶ୍ର, ନବମରେ ବିବେକାନନ୍ଦ ଷଡ଼ଙ୍ଗୀ ଓ ଦଶମ ସ୍ଥାନରେ ତପତି ରାଜ ରହିଛନ୍ତି। କୃତକାର୍ଯ୍ୟ ହୋଇଥିବା ପରୀକ୍ଷାର୍ଥୀଙ୍କ ଲିଷ୍ଟ ଓପିଏସ୍ସି ୱେବ୍ସାଇଟ୍ରେ ଉପଲବ୍ଧ ରହିଛି। ପରୀକ୍ଷାର୍ଥୀମାନେ ଏହି ୱେବ୍ସାଇଟ୍ (www.opsc.gov.in)କୁ ଯାଇ ନିଜର ରେଜଲ୍ଟ ଦେଖିପାରିବେ।
ଓଡ଼ିଶା ସିଭିଲ ସର୍ଭିସ ପରୀକ୍ଷା ପାଇଁ ୭୧,୪୮୫ ଜଣ ଆବେଦନ କରିଥିଲେ। ଏଥିମଧ୍ୟରୁ ୩୬,୨୯୨ ଜଣ ଗତବର୍ଷ ଅଗଷ୍ଟ ୨୭ରେ ପ୍ରିଲିମ୍ ପରୀକ୍ଷା ଦେଇଥିଲେ। ଏଥିରେ ୪୭୫୪ ଜଣ ପରୀକ୍ଷାର୍ଥୀ କୃତକାର୍ଯ୍ୟ ହୋଇଥିବାବେଳେ ସେମାନଙ୍କ ମଧ୍ୟରେ ୧୫୫୧ ଜଣ ମହିଳା ଥିଲେ। ଓଡ଼ିଶା ସିଭିଲ ସର୍ଭିସ ୨୦୨୦ର ମେନ୍ ଲିଖିତ ପରୀକ୍ଷା ଗତ ଜାନୁୟାରୀ ୨୦ରୁ ଫେବୃୟାରୀ ୮ ମଧ୍ୟରେ ଅନୁଷ୍ଠିତ ହୋଇଥିଲା। ଏଥିରେ ୩୮୪୮ ଜଣ ପରୀକ୍ଷାର୍ଥୀ ଉପସ୍ଥିତ ଥିଲେ। ଏହା ମଧ୍ୟରୁ ୭୮୫ ପରୀକ୍ଷାର୍ଥୀଙ୍କୁ ଦସ୍ତାବିଜ ଯାଞ୍ଚ ଏବଂ ସାକ୍ଷାତକାର ପାଇଁ ଗତମାସ ୧୯ରୁ ୩୦ ତାରିଖ ମଧ୍ୟରେ କଟକସ୍ଥିତ ଓପିଏସ୍ସି କାର୍ଯ୍ୟାଳୟକୁ ଡକାଯାଇଥିଲା।
ଟପ୍ପରଙ୍କ ମୁହଁରୁ…
ପ୍ରଥମ ଆଟେମ୍ପ୍ଟରେ ଟପ୍ପର ହୋଇଛି। ଏଥିପାଇଁ ଖୁବ୍ ଖୁସି ଅଛି। ଲିଷ୍ଟରେ ନଁା ରହିବ ବୋଲି ନିଶ୍ଚିତ ଥିଲି। ହେଲେ ପ୍ରଥମ ହେବି ବୋଲି ଭାବି ନ ଥିଲି।
-ତେଜସ୍ବିନୀ ବେହେରା, ଓସିଏସ୍ ଟପ୍ପର
୨୦୧୯ରେ ପ୍ରଥମେ ଓଏଏସ୍ ପରୀକ୍ଷା ଦେଇଥିଲି, କିନ୍ତୁ ପ୍ରିଲିମ୍ରୁ କଟିଥିଲି। ସେବେ ପରୀକ୍ଷା ବିଷୟରେ ଭଲ ଭାବେ ଜାଣି ନ ଥିଲି। ଦିଗ୍ଦର୍ଶନ ଦେବାକୁ ସେତେବେଳ ଭଲ ମେଣ୍ଟର ବି ମିଳି ନଥିଲେ। ପ୍ରାଣୀ ଚିକିତ୍ସକ ଭାବେ କାର୍ଯ୍ୟ କରୁଥିଲି। ଏହି ପରୀକ୍ଷା ପାଇଁ ଚାକିରି ଛାଡ଼ିଥିଲି। ଏହାପରେ ପରୀକ୍ଷା ପାଇଁ ଲାଗିପଡିଥିଲି ା ଦ୍ୱିତୀୟ ଆଟେମ୍ପ୍ଟରେ କୃତକାର୍ଯ୍ୟ ହୋଇଛି। ଏଥିପାଇଁ ମୋ ପରିବାର ଲୋକେ ମୋତେ ବହୁତ ସହାୟତା କରିଛନ୍ତି ା କଠିନ ପରିଶ୍ରମ ଦ୍ୱାରା ହିଁ ଏହା ସମ୍ଭବ ହୋଇପାରିଛି।
-ଶୁଭଙ୍କରୀ ସୁଦେଷ୍ଣା ଦାଶ
ରେଜଲ୍ଟ ଭଲ ହେବ ବୋଲି ନିଶ୍ଚିତ ଥିଲି। କିନ୍ତୁ ତୃତୀୟ ସ୍ଥାନରେ ରହିବି ବୋଲି ଭାବି ନ ଥିଲି। ଏହା ମୋର ପ୍ରଥମ ଆଟେମ୍ପ୍ଟ ଥିଲା। ବୁର୍ଲାରୁ ଇଞ୍ଜିନିୟରିଂ ପରେ ଏବେ ମୁଁ ପିଏଚ୍.ଡି. କରୁଛି। କଠିନ ପରିଶ୍ରମ କରିବା ଆବଶ୍ୟକ ା ସଫଳତା ନ ମିଳିଲେ ବି କେବେ ଭାଙ୍ଗି ପଡିବା ଉଚିତ ନୁହେଁ। ପ୍ରୟାସ ଜାରି ରଖିବା ଦରକାର। ଏହି ସଫଳତାର ଶ୍ରେୟ ପରିବାର ଲୋକଙ୍କୁ ଦେଉଛି।
-ଅନନ୍ୟା ସୃଷ୍ଟି ଶତପଥୀ
