ବୋଲଗଡ଼,୧୨।୯(ଡି.ଏନ୍.ଏ.): ଖୋର୍ଦ୍ଧା ଜିଲା ବୋଲଗଡ଼ ବ୍ଲକର ବାଙ୍କୋଇ -ସାଗରଗୁଆ ପୂର୍ତ୍ତ ରାସ୍ତା ମଝିରେ ଥିବା ଏକ ପୋଲ ନିକଟରେ ଜଣେ ବ୍ୟକ୍ତି ଜବରଦଖଲ କରିଛନ୍ତି। ଜବରଦଖଲ ଜାଗାରେ ଉକ୍ତ ବ୍ୟକ୍ତି ଗୋଟିଏ ଘର ନିର୍ମାଣ କରିବା ଯୋଗୁ ଗହୀର ଜଳ ନିଷ୍କାସନ ନ ହୋଇ ଜମା ହୋଇରହୁଛି। ଏହାଦ୍ୱାରା ରାସ୍ତା ପାର୍ଶ୍ୱରେ ଥିବା ଚାଷୀଙ୍କ ଜମିକୁ ପାଣି ଯାଇପାରୁ ନ ଥିବାରୁ ଚାଷ କାର୍ଯ୍ୟ ହୋଇ ନ ପାରି ଧାନଫସଲ ବ୍ୟାପକ କ୍ଷତି ହେଉଥିବା ଅଭିଯୋଗ ହୋଇଛି। ଏ ନେଇ ସ୍ଥାନୀୟ ଅଞ୍ଚଳର ଶତାଧିକ ଚାଷୀ ଉତ୍ତ୍ୟକ୍ତ ହୋଇ ରବିବାର ଉକ୍ତ ରାସ୍ତାକୁ ଆସି ଅବରୋଧ କରିଥିଲେ। ଖବରପାଇ ତହସିଲଦାର ଘଟଣାସ୍ଥଳକୁ ଆସି ଚାଷୀମାନଙ୍କ ସହ ଆଲୋଚନା କରି ବୁଝାଶୁଝା କରିବା ପରେ ରାସ୍ତାରୋକୋ ହଟିଥିଲା।
ଅନୁଯାୟୀ, ବାଙ୍କୋଇ ରାଜସ୍ବ ସର୍କଲର ରାମଚନ୍ଦ୍ରପୁର ମୌଜାର ଚାଷଜମିର ଜଳ ନିଷ୍କାସନ ପାଇଁ ବାଙ୍କୋଇ -ସାଗରଗୁଆ ରାସ୍ତାରେ ଦୀର୍ଘ ବର୍ଷ ହେବ ୪ଟି ପୋଲ ନିର୍ମାଣ ହୋଇଥିଲା। ହେଲେ ଜଣେ ନ୍ୟସ୍ତସ୍ବାର୍ଥ ବ୍ୟକ୍ତି କିଛିଦିନ ହେବ ଗୋଟିଏ ପୋଲକୁ ଅବରୋଧ କରି ଜଳ ନିଷ୍କାସନ ପଥ ସମ୍ମୁଖରେ ଘର ନିର୍ମାଣ କାର୍ଯ୍ୟ ଜାରି ରଖିଛନ୍ତି। ତେବେ ଏହି କାର୍ଯ୍ୟ ପାଇଁ ଅନୁମତି ଅଛି କି ନାହିଁ ତାହା ସ୍ପଷ୍ଟ ହୋଇନାହିଁ। ଯଦି ଅନୁମତି ମିଳିଥାଏ, ତେବେ ଉକ୍ତ ନିର୍ମାଣକୁ ତହସିଲ କର୍ମଚାରୀ କିଭଳି ମଞ୍ଜୁରୀ ଦେଇଛନ୍ତି ତାହା ସାଧାରଣରେ ପ୍ରଶ୍ନ ସୃଷ୍ଟି କରିଛି। କାରଣ ଏହି ନିର୍ମାଣ ଯୋଗୁ ବର୍ଷାଜଳ ନିଷ୍କାସନରେ ପ୍ରତିବନ୍ଧକ ସୃଷ୍ଟି ହେବା ସହ ଶତାଧିକ ଚାଷୀଙ୍କ ଜମିରୁ ଜଳ ନିଷ୍କାସନ ନ ହୋଇ ପାଣି ଜମି ରହୁଛି। ଫଳରେ ଧାନ ଫସଲ ନଷ୍ଟ ହେଉଥିବା ନେଇ ବାଙ୍କୋଇ ଗ୍ରାମର ଚାଷୀ ପ୍ରଦୀପ ପଟ୍ଟନାୟକ, ଡୁନା ପଟ୍ଟନାୟକ, କେଶବ ଫତେସିଂହ, ଜଟାଧାରୀ ଲେଙ୍କା ଓ ହାଡିବନ୍ଧୁ ପରିଡା ପ୍ରମୁଖ ଚାଷୀ କହିଛନ୍ତି। ତେଣୁ ଏହାର ପ୍ରତିବାଦରେ ରବିବାର ଶତାଧିକ ଚାଷୀ ସୁନାଖଳା-ଭାପୁର ମୁଖ୍ୟ ରାସ୍ତା ଅବରୋଧ କରିଥିଲେ। ତହସିଲଦାର ସନ୍ତୋଷିନୀ ଦାସ ପହଞ୍ଚତ୍ ଚାଷୀଙ୍କ ସହ କଥାହୋଇ ସୋମବାର ସେହି ପୋଲ ନିକଟରେ ତିଆରି ହେଉଥିବା ଘରର ସରଜମିନ ତଦନ୍ତ କରି ଯାହା କିଛି ନିଷ୍ପତ୍ତି ନେବେ ବୋଲି କହିବା ପରେ ରାସ୍ତା ଅବରୋଧ ହଟିଥିଲା।
