କଟକ,୧୮ା୧ (କାର୍ତ୍ତିକ ସାହୁ)ସାମୁଦ୍ରିକ ଥାନାରେ ଖାଲି ପଡ଼ିଥିବା ପଦବୀ ସଂକ୍ରାନ୍ତୀୟ ତଥ୍ୟ ଏବଂ ସେଗୁଡ଼ିକର ପୂରଣ ପାଇଁ ଗ୍ରହଣ କରୁଥିବା ପଦକ୍ଷେପ ସଂକ୍ରାନ୍ତରେ ଜଣାଇବାକୁ ହାଇକୋର୍ଟ ରାଜ୍ୟ ସରକାରଙ୍କୁ ବୁଧବାର ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ କାର୍ଯ୍ୟକାରୀ ମୁଖ୍ୟ ବିଚାରପତି ଡ. ବିଦ୍ୟୁତ୍ ରଞ୍ଜନ ଷଡ଼ଙ୍ଗୀ ଓ ବିଚାରପତି ଏମ୍.ଏସ୍. ରମଣଙ୍କୁ ନେଇ ଗଠିତ ଖଣ୍ଡପୀଠ ମାମଲାର ଶୁଣାଣି କରି ଏହି ନିର୍ଦ୍ଦେଶ ଦେଇଛନ୍ତି। ଆସନ୍ତା ସପ୍ତାହରେ ମାମଲାର ପରବର୍ତ୍ତୀ ଶୁଣାଣି ହେବ।
ମାମଲାର ବିବରଣୀ ଅନୁଯାୟୀ, ଗହୀରମଥା, ଋଷିକୁଲ୍ୟା, ଦେବୀ ନଦୀ ଆଦି ମୁହାଣରେ ମାଛଧରା ଯୋଗୁ ଅନେକ ସମୟରେ ଅଲିଭ୍ ରିଡ୍ଲେ କଇଁଛଙ୍କ ଜୀବନହାନି ଘଟୁଛି। ଏହାକୁ ଗୁରୁତ୍ୱର ସହ ଗ୍ରହଣ କରି ହାଇକୋର୍ଟ ନିଜ ଆଡୁ ଏହି ମାମଲା ରୁଜୁ କରିଥିଲେ। ସାମୁଦ୍ରିକ ଥାନାଗୁଡ଼ିକରେ ୫୦ ପ୍ରତିଶତରୁ ଅଧିକ ପଦବୀ ଖାଲି ପଡ଼ିଛି। ଫଳରେ ନିୟମିତି ପାଟ୍ରୋଲିଂ କରାଯାଉନାହିଁ। ଏହାର ସୁଯୋଗରେ ମାଫିଆମାନେ ବେଆଇନ ଭାବେ ନିଷିଦ୍ଧାଞ୍ଚଳରେ ଟ୍ରଲର ଚଲାଉଛନ୍ତି। ଯେଉଁଥିପାଇଁ ଅଲିଭ୍ ରିଡ୍ଲେ କଇଁଚ୍ଛଙ୍କ ଜୀବନହାନି ଘଟୁଛି। ଏହାକୁ ନେଇ ପରିବେଶବିତ୍ମାନେ ମଧ୍ୟ ଉଦ୍ବେଗ ପ୍ରକାଶ କରିଥିଲେ। ଏ ସଂକ୍ରାନ୍ତୀୟ ମାମଲାର ଶୁଣାଣିବେଳେ କେନ୍ଦ୍ର ଓ ରାଜ୍ୟ ସରକାର ମିଳିତ ଭାବେ ଟ୍ରାନ୍ସପଣ୍ଡର ଲଗାଇବା ପାଇଁ ପଦକ୍ଷେପ ଗ୍ରହଣ କରୁଛନ୍ତି ବୋଲି ହାଇକୋର୍ଟଙ୍କୁ ସତ୍ୟପାଠରେ ପୂର୍ବରୁ ଦର୍ଶାଯାଇଛି।
