କେସିଙ୍ଗା, ୧୪।୧୧(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ସହରସ୍ଥିତ ସରକାରୀ ବାଳିକା ଉଚ୍ଚ ବିଦ୍ୟାଳୟ ପରିସରରେ ମହାନ ଶିଶୁପ୍ରେମୀ ତଥା ଭାରତର ପ୍ରଥମ ପ୍ରଧାନମନ୍ତ୍ରୀ ପଣ୍ଡିତ ଜବାହରଲାଲ ନେହେରୁଙ୍କ ଜନ୍ମଜୟନ୍ତୀ ଅବସରରେ ଶନିବାର ଦିନ ଶିଶୁ ଦିବସ-୨୦୨୬ ଆନନ୍ଦ ଉଲ୍ଲାସ ଓ ଉତ୍ସାହର ସହ ପାଳିତ ହୋଇଯାଇଛି। ବିଦ୍ୟାଳୟର ଭାରପ୍ରାପ୍ତ ପ୍ରଧାନଶିକ୍ଷକ ସୁଶାନ୍ତ କୁମାର ମେହେରଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଶିଶୁମାନେ ଦେଶର ଭବିଷ୍ୟତ ଓ ରାଷ୍ଟ୍ର ନିର୍ମାଣର ମୁଖ୍ୟ ଆଧାର ବୋଲି ମତବ୍ୟକ୍ତ କରାଯାଇଥିଲା। ପାଳନ ସମାରୋହର ସଭାପତି କହ୍ନେଇଲାଲ ସାହୁ ପଣ୍ଡିତ ନେହେରୁଙ୍କ ଜୀବନୀ, ଆଦର୍ଶ ଏବଂ ଶିଶୁମାନଙ୍କ ପ୍ରତି ତାଙ୍କର ଅଗାଧ ସ୍ନେହ ଓ ଭଲପାଇବା ସମ୍ପର୍କରେ ଆଲୋକପାତ କରିବା ସହ ଛାତ୍ରୀମାନଙ୍କୁ ଶୃଙ୍ଖଳା, ନିଷ୍ଠା ଓ ଆତ୍ମବିଶ୍ୱାସ ସହ ଜୀବନରେ ଆଗକୁ ବଢ଼ିବାକୁ ଆହ୍ୱାନ ଦେଇଥିଲେ।
ଏହି କାର୍ଯ୍ୟକ୍ରମ ଅବସରରେ ଛାତ୍ରୀମାନଙ୍କ ମଧ୍ୟରେ ଲୁକ୍କାୟିତ ପ୍ରତିଭାର ବିକାଶ ଓ ସୃଜନଶୀଳତାର ପରିପ୍ରକାଶ ନିମନ୍ତେ ବିଭିନ୍ନ ପ୍ରତିଯୋଗିତା ଆୟୋଜିତ ହୋଇଥିଲା। କନିଷ୍ଠ ବିଭାଗର ଡ୍ରଇଂ ପ୍ରତିଯୋଗିତାରେ ନିର୍ମିତ ବିଶି, କୁନ୍ତଳା ସାହୁ, ପଦ୍ମିନୀ ମହାନନ୍ଦ ଓ ଆଦ୍ୟାଶା ଦାସ ଏବଂ ମ୍ୟୁଜିକ୍ ଚେୟାର ପ୍ରତିଯୋଗିତାରେ ଓମିନା ମହାନନ୍ଦ, ଉର୍ମିଳା ଭୂଏ ଓ ଖୁସବୁ ମାଝୀ କୃତିତ୍ୱ ଅର୍ଜନ କରିଥିଲେ। ସେହିପରି ବରିଷ୍ଠ ବିଭାଗର ସାଧାରଣ ଜ୍ଞାନ ପ୍ରତିଯୋଗିତାରେ ଦିବ୍ୟାଙ୍କା ବର୍ମା, ନିଭା ସ୍ୱାଇଁ ଓ ଜନନୀ ସେଠୀ ଏବଂ ମ୍ୟୁଜିକ୍ ଚେୟାରରେ ଚିନ୍ମୟୀ ଭୋଇ, ଅଞ୍ଜୁ ସାହୁ ଓ ବୈଷ୍ଣବୀ ନାଏକ ବିଜୟୀ ହୋଇଥିଲେ। ସମସ୍ତ କୃତୀ ପ୍ରତିଯୋଗୀଙ୍କୁ ଅତିଥିମାନଙ୍କ ଦ୍ୱାରା ପୁରସ୍କାର ଓ ପ୍ରମାଣପତ୍ର ପ୍ରଦାନ କରାଯାଇ ଉତ୍ସାହିତ କରାଯାଇଥିଲା। ସପ୍ତମ ଶ୍ରେଣୀ ଛାତ୍ରୀ ସୋନାକ୍ଷୀ ଠାକୁର ଏହି ସମଗ୍ର କାର୍ଯ୍ୟକ୍ରମକୁ ଅତ୍ୟନ୍ତ ସଫଳତାର ସହ ସଂଯୋଜନା କରିଥିଲେ।
