ଭୁବନେଶ୍ୱର,୨୬।୪(ବ୍ୟୁରୋ):ରାଜଧାନୀରେ ଡ୍ରାଇଭର ମହାସଂଘ ପକ୍ଷରୁ ଗତ ୧୮ ତାରିଖରେ ହୋଇଥିବା ହିଂସାତ୍ମକ ଆନ୍ଦୋଳନ ଘଟଣାକୁ ନେଇ କମିଶନରେଟ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିଛି। ଆଇନକୁ ହାତକୁ ନେଇ ବ୍ୟାପକ ହିଂସା ଘଟାଇଥିବା ହଜାର ହଜାର ଡ୍ରାଇଭରଙ୍କ ମଧ୍ୟରୁ ୨ଜଣଙ୍କୁ କ୍ୟାପିଟାଲ ଥାନା ପୋଲିସ ସୋମବାର ଗିରଫ କରି କୋର୍ଟ ଚାଲାଣ କରିଛି। ଗିରଫ ଡ୍ରାଇଭର ଦ୍ୱୟ ହେଲେ ଗଞ୍ଜାମ ଜିଲା ଜଗନ୍ନାଥ ପ୍ରସାଦ ଥାନା ଅଞ୍ଚଳର ବାବୁଲା ତ୍ରିପାଠୀ (୪୮) ଓ ବାଲେଶ୍ୱର ଜିଲା ସିଂଲା ଥାନା ଅଞ୍ଚଳର ଗୁପ୍ତେଶ୍ୱର ମହାନ୍ତି ଓରଫ ବୁଲୁ (୪୮)। ଏନେଇ ଭୁବନେଶ୍ୱର ଡିସିପି ଉମାଶଙ୍କର ଦାସ କହିଛନ୍ତି, ଏହି ମାମଲାରେ ପୋଲିସ ବିଭିନ୍ନ ଗଣମାଧ୍ୟମରୁ ସଂଗ୍ରହ କରିଥିବା ଭିଡିଓ ଫୁଟେଜ ଏବଂ ସହରରେ ଲାଗିଥିବା ସିସିଟିଭି କ୍ୟାମେରାରୁ ବର୍ତ୍ତମାନ ସୁଦ୍ଧା ୧୮୦ଜଣ ଗଣ୍ଡଗୋଳକାରୀ ଡ୍ରାଇଭରଙ୍କୁ ଚିହ୍ନଟ କରିଛି। ଏଥିସହ ଡ୍ରାଇଭର ସଂଘର ନେତୃତ୍ୱ ନେଉଥିବା ୩୫ଜଣ ନେତାଙ୍କୁ ମଧ୍ୟ ମଙ୍ଗଳବାର ଥାନାରେ ହାଜର କରିବାକୁ ନୋଟିସ ଦିଆଯାଇଥିବା ଡିସିପି ସୂଚନା ଦେଇଛନ୍ତି। ଜୋନ୍-୧ ଏସିପି ମାନସ ଗଡ଼ନାୟକ କହିଛନ୍ତି, ସଂଘର ନେତାମାନେ ଥାନାରେ ହାଜର ହୋଇ ପୋଲିସ ଦ୍ୱାରା ସଂଗୃହୀତ ସିସିଟିଭି ଓ ଭିଡିଓ ଫୁଟେଜରୁ ବିକ୍ଷୋଭକାରୀଙ୍କୁ ଚିହ୍ନଟ କରିବେ। ଆଇନକୁ ହାତକୁ ନେଇଥିବା ସମସ୍ତ ଗଣ୍ଡଗୋଳକାରୀଙ୍କ ବିରୋଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଏସିପି କହିଛନ୍ତି।
ଅନୁଯାୟୀ, ୧୧ ଦଫା ଦାବି ନେଇ ରାଜ୍ୟ ଡ୍ରାଇଭର ମହାସଂଘ ପକ୍ଷରୁ ୪୦ ହଜାରରୁ ଊର୍ଦ୍ଧ୍ୱ ଡ୍ରାଇଭର ଘଟଣା ଦିନ ସକାଳୁ ଭୁବନେଶ୍ୱର ଭିତରେ ପଶି ଆନ୍ଦୋଳନ କରିଥିଲେ। ବିଭିନ୍ନ ସ୍ଥାନରେ ହିଂସା ଘଟାଇବା ସହ ଟ୍ରାଫିକ୍ ଜାମ୍ କରିଥିଲେ। ଫଳରେ ଦୀର୍ଘ ଘଣ୍ଟା ଧରି ସାଧାରଣଲୋକ ଡହ ଡହ ଖରାରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥିଲେ। ରାଜଧାନୀର ଜୀବନଯାତ୍ରା ପୂରା ବିଗିଡିଯାଇଥିଲା। ଏପରି କି ମାଷ୍ଟରକ୍ୟାଣ୍ଟିନ ଛକସ୍ଥିତ ଘୋଡ଼ା ଉପରେ ଚଢ଼ିବା ସହ ନାନା ଅଶୋଭନୀୟ କାର୍ଯ୍ୟ ପ୍ରଦର୍ଶନ କରିଥିବା ନଜରକୁ ଆସିଥିଲା। ଏତେ ସଂଖ୍ୟକ ଆନ୍ଦୋଳନକାରୀଙ୍କୁ ନିୟନ୍ତ୍ରଣକୁ ଆଣିପାରି ନ ଥିଲା କମିଶନରେଟ ପୋଲିସ। କେତେକ ସ୍ଥାନରେ ପୋଲିସ ହଟହଟା ହୋଇ ଛାଡ଼ି ପଳାଉଥିବା ଦେଖିବାକୁ ମିିଳିଥିଲା। ଏ ପରିସ୍ଥିତି ପାଇଁ
ସହରବାସୀ ପୋଲିସ ଓ ଢିଲା ସୁରକ୍ଷା ବ୍ୟବସ୍ଥାକୁ ଦାୟୀ କରିଥିଲେ। ପ୍ରଥମେ ଗୋଇନ୍ଦା ସୂଚନା ମିଳି ନ ଥିବା କୁହାଯାଇଥିଲା। ମାତ୍ର ଦିନକ ପରେ ଗୋଇନ୍ଦା ରିପୋର୍ଟ ସାର୍ବଜନୀନ ହେବା ପରେ ପ୍ରକୃତ ଘଟଣା ପଦାକୁ ଆସିଥିଲା। ଆନ୍ଦୋଳନ ପୂର୍ବରୁ ଅର୍ଥାତ୍ ଗତ ୧୬ ତାରିଖରେ ଗୋଇନ୍ଦା ବିଭାଗ ପକ୍ଷରୁ ଏପରି ବଡ଼ ଆନ୍ଦୋଳନ ସମ୍ପର୍କରେ କମିଶନରେଟ ପୋଲିସକୁ ସୂଚନା ଦିଆଯାଇଥିଲା। ହେଲେ ଆଇନ ଶୃଙ୍ଖଳା ରକ୍ଷା ସହ ଆନ୍ଦୋଳନକୁ ମୁକାବିଲା ପାଇଁ ପୋଲିସ ପ୍ରସ୍ତୁତ ହୋଇ ନ ଥିଲା। କମିଶନରେଟ ପୋଲିସର କାର୍ଯ୍ୟ ଦକ୍ଷତାକୁ ନେଇ ପ୍ରଶ୍ନ ଉଠିବା ପରେ ଏପରି କାର୍ଯ୍ୟାନୁଷ୍ଠାନ ଗ୍ରହଣ କରି ଦୋଷ ଘୋଡ଼ାଇବାକୁ ଉଦ୍ୟମ ଆରମ୍ଭ ହୋଇଥିବା ଚର୍ଚ୍ଚା ଚାଲିଛି।
