ମହାକାଳପଡା,୧୯ା୯ (ଡି.ଏନ.ଏ.):କେନ୍ଦ୍ର ଓ ରାଜ୍ୟ ସରକାର ସ୍ବାସ୍ଥ୍ୟସେବା କ୍ଷେତ୍ରରେ ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ଉପାନ୍ତ ଅଞ୍ଚଳରେ ସାଧାରଣ ରୋଗୀମାନେ ଭରସା କରିଛନ୍ତି ଡାକ୍ତରଖାନା ଯିବେ ଚିକିତ୍ସା ହୋଇ ଘରକୁ ଫେରିବେ। ଏହି ଲକ୍ଷ୍ୟ ନେଇ କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବତିଘରଠାରେ ଏକ ଆଶୁ ଆରୋଗ୍ୟ କେନ୍ଦ୍ର ପ୍ରତିଷ୍ଠା କରାଯାଉଛି। ଏହି ସ୍ବାସ୍ଥ୍ୟକେନ୍ଦ୍ରକୁ ପବ୍ଲିକ ପ୍ରାଇଭେଟ ପାର୍ଟନର ଶିପ (ପିପିପି ) ମୋଡରେ ପରିଚାଳନା ହେଉଛି। ଏହାକୁ ତଦାରଖ କରୁଛନ୍ତି ଜିଲା ସ୍ବାସ୍ଥ୍ୟ ବିଭାଗ। ଏହି ସ୍ବାସ୍ଥ୍ୟକେନ୍ଦ୍ରକୁ ଭରସା କରି ରୋଗୀ ଚିକିତ୍ସା ପାଇଁ ଯିବା ବେଳକୁ ଫାଟକରେ ଲାଗିଥିବା ନୋଟିସକୁ ଦେଖି ଆଶ୍ଚର୍ଯ୍ୟ ହୋଇଯାଇଥିଲେ। ଫାଟକରେ ଲାଗିଥିବା ନୋଟିସ୍ରେ ଲେଖାଥିଲା ଅନିବାର୍ଯ୍ୟ କାରଣ ବଶତଃ ଶୁକ୍ରବାର ସ୍ବାସ୍ଥ୍ୟକେନ୍ଦ୍ର ବନ୍ଦ ରହିବ ବୋଲି ଫାର୍ମାସିଷ୍ଟଙ୍କ ଦସ୍ତଖତ ସହ ସିଲ୍ ମରାଯାଇ ସର୍ବସାଧାରଣ ଅବଗତି ନିମନ୍ତେ ଉଲ୍ଲେଖ ଥିଲା।
ବତିଘର ପଞ୍ଚାୟତରେ ୧୨ ହଜାର ବିଶିଷ୍ଟ ଜନସଂଖ୍ୟା ଥିବାରୁ ଏହି ସ୍ବାସ୍ଥ୍ୟକେନ୍ଦ୍ର ଉପରେ ରୋଗୀ ନିର୍ଭର କରିଥାନ୍ତି। ଶିଶୁ, ଗର୍ଭବତୀ ମହିଳା, ଗୁରୁତର ରୋଗୀଙ୍କ ସମେତ ବିଭିନ୍ନ ପ୍ରକାର ରୋଗୀ ଚିକିତ୍ସା ପାଇଁ ଆସିଥାନ୍ତି। ପଞ୍ଚାୟତଟି ସଂରକ୍ଷିତ ଜଙ୍ଗଲ ପାର୍ଶ୍ୱବର୍ତ୍ତୀ ଅଞ୍ଚଳ ହୋଇଥିବାରୁ ଜଙ୍ଗଲୀ ଜନ୍ତୁଙ୍କ ଆକ୍ରମଣ ଶିକାର ହୋଇଥାନ୍ତି। ରୋଗୀଙ୍କୁ ତତ୍କାଳୀନ ସେବା ସ୍ବାସ୍ଥ୍ୟକେନ୍ଦ୍ର ପ୍ରଦାନ କରିଥାଏ। ୨୦୧୨ଠାରୁ ଏହି ସ୍ବାସ୍ଥ୍ୟକେନ୍ଦ୍ର ଭିତ୍ତିଭୂମି ବିକାଶ କରାଯାଇ ଏଠାରେ ଜଣେ ଆୟୁଷ ଡାକ୍ତର, ଫାର୍ମାସିଷ୍ଟ, ଏଏନ୍ଏମ୍ ଓ ଆଟେନାଣ୍ଟ ନିଯୁକ୍ତି ପାଇଛନ୍ତି। ଏହାକୁ ଏକ ଘରୋଇ ସେଚ୍ଛାସେବୀ ସଂସ୍ଥା ପରିଚାଳନା କରୁଛି। ଏଠାରେ ପ୍ରଶ୍ନ ଉଠେ ଜଣେ ଫାର୍ମାସିଷ୍ଠ ଦସ୍ତଖତ ବଳରେ କିପରି ସାସ୍ଥ୍ୟକେନ୍ଦ୍ରକୁ ବନ୍ଦ କରାଗଲା। ଏହାକୁ ନେଇ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି। ଏହି ସ୍ବାସ୍ଥ୍ୟକେନ୍ଦ୍ରକୁ ଘରୋଇ ସଂସ୍ଥା ପରିଚାଳନା କରି ସରକାରଙ୍କଠାରୁ ବାର୍ଷିକ ଲକ୍ଷାଧିକ ଟଙ୍କା ସ୍ବାସ୍ଥ୍ୟସେବା ନଁାରେ ଉଠାଯାଉଛି। ମାତ୍ର ତୃଣମୂଳ ସ୍ତରରେ ସ୍ବାସ୍ଥ୍ୟସେବା ସାଧାରଣ ଲୋକଙ୍କ ପାଖରେ କିପରି ପହଞ୍ଚୁନାହିଁ। ସରକାର ଏହି ଉପାନ୍ତ ପଞ୍ଚାୟତରେ ସ୍ବତନ୍ତ୍ର ଦୃଷ୍ଟି ଦେଇ ସ୍ଥଳପଥରେ ଆଶୁ ଆରୋଗ୍ୟ କେନ୍ଦ୍ର ଓ ଜଳପଥରେ ଗୁରୁତର ରୋଗୀଙ୍କୁ ସେବା ଯୋଗାଇ ଦେବାକୁ ବୋଟ୍ ଆମ୍ବୁଲାନ୍ସ ଯୋଗାଇ ଦେଇଛନ୍ତି। ତେବେ ଏହି ସ୍ବାସ୍ଥ୍ୟକେନ୍ଦ୍ରରେ ଆବଶ୍ୟକ ଅନୁସାରେ ଡାକ୍ତର ଅଭାବ ରହିଛି। ଅପରପକ୍ଷେ ସମୁଦ୍ର ଜଳ ଭଟ୍ଟା ଜୁଆର ଉପରେ ବୋଟ୍ ଆମ୍ବୁଲାନ୍ସ ଭରସା କରିଥାଏ। ଜୁଆର ହେଲେ ବୋଟ୍ ଆମ୍ବୁଲାନ୍ସରେ ରୋଗୀମାନେ ଯାତାୟାତ କରିଥାନ୍ତି। ଭଟ୍ଟା ବେଳେ ଗୁରୁତର ରୋଗୀ ଆମ୍ବୁଲାନ୍ସ ନିକଟରେ ପହଞ୍ଚେ ତେବେ କଥା ସରିଲା। ରୋଗୀଙ୍କ ସମ୍ପର୍କୀୟମାନେ ବାଧ୍ୟ ହୋଇ ଟୁବି ଫେରି ଘାଟ ପାର ହୋଇ ଅନ୍ୟ ଚିକିତ୍ସାଳୟକୁ ରୋଗୀଙ୍କ ନେଇଥାନ୍ତି। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସା ଅଧିକାରିଣୀ ଅନିତା ପଟ୍ଟନାୟକଙ୍କୁ ପଚାରିବାରେ ଫାଟକରେ ନୋଟିସ୍ ଝୁଲିବା ସମ୍ପର୍କରେ ରବିବାର ଏକ ସ୍ବତନ୍ତ୍ର ସ୍ବାସ୍ଥ୍ୟ ଟିମ୍ ବତୀଘର ସ୍ବାସ୍ଥ୍ୟକେନ୍ଦ୍ରକୁ ଯାଇ ତଦନ୍ତ କରିଛନ୍ତି। ତଦନ୍ତରେ ସ୍ବାସ୍ଥ୍ୟକେନ୍ଦ୍ର କର୍ମଚାରୀ ଆଗାମୀଦିନରେ ଆଉ ଏଭଳି କାର୍ଯ୍ୟ କରିବେ ନାହିଁ ସୂଚନା ଦେଇଛନ୍ତି।
