ନୂଆଦିଲ୍ଲୀ,୨୫ା୩: କେବଳ ରାହୁଲ ଗାନ୍ଧୀ ନୁହନ୍ତି, ଅତୀତରେ ଅନେକ ଆଇନପ୍ରଣେତା ଗୃହରେ ଅଯୋଗ୍ୟ ଘୋଷିତ ହୋଇଥିଲେ। ୧୯୭୭ର ଜରୁରିକାଳୀନ ପରିସ୍ଥିତି ପରେ ଅନୁଷ୍ଠିତ ସାଧାରଣ ନିର୍ବାଚନରେ ରାହୁଲଙ୍କ ଜେଜେ ମା’ ତଥା ପୂର୍ବତନ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀଙ୍କୁ ଶୋଚନୀୟ ପରାଜୟର ମୁହଁ ଦେଖିବାକୁ ପଡ଼ିଥିଲା। ୧୯୭୮ରେ କର୍ନାଟକର ଚିକ୍ମାଗଲୁର ଉପନିର୍ବାଚନରେ ଇନ୍ଦିରା ବିଜୟୀ ହୋଇ ଲୋକ ସଭାକୁ ଯାଇଥିଲେ। ନଭେମ୍ବର ୧୮ରେ ସେ ଲୋକ ସଭାରେ ପହଞ୍ଚତ୍ବା ପରେ ତତ୍କାଳୀନ ପ୍ରଧାନମନ୍ତ୍ରୀ ମୋରାରଜୀ ଦେଶାଇ ଇନ୍ଦିରାଙ୍କ ବିରୋଧରେ କ୍ଷମତାର ଦୁରୁପଯୋଗ ଓ ସରକାରୀ ଅଧିକାରୀମାନଙ୍କୁ ଅପମାନିତ କରିବା ଅଭିଯୋଗ ଆଣିଥିଲେ। ଉକ୍ତ ପ୍ରସ୍ତାବ ପାରିତ ହୋଇଥିଲା। ୭ ଦିନ ଧରି ବିତର୍କ ଚାଲିବା ପରେ ଇନ୍ଦିରାଙ୍କ ବିରୋଧରେ ସ୍ବାଧିକାର କମିଟି ଗଠନ କରାଯାଇଥିଲା। ଉକ୍ତ କମିଟି ଇନ୍ଦିରାଙ୍କ ବିରୋଧରେ ତଦନ୍ତ କରି ମାସକ ଭିତରେ ରିପୋର୍ଟ ପ୍ରଦାନ କରିଥିଲା। ଫଳରେ ଇନ୍ଦିରାଙ୍କୁ ପାର୍ଲମେଣ୍ଟରୁ ବହିଷ୍କାର ସହ ଗିରଫ କରି ତିହାର ଜେଲକୁ ପଠାଇ ଦିଆଯାଇଥିଲା। ୧୯୮୦ରେ ଅନୁଷ୍ଠିତ ନିର୍ବାଚନରେ ଇନ୍ଦିରା ବିଜୟୀ ହୋଇ ପ୍ରଧାନମନ୍ତ୍ରୀ ହୋଇଥିଲେ।
୨୦୦୬ରେ ରାହୁଲଙ୍କ ମା’ ସୋନିଆ ଗାନ୍ଧୀଙ୍କ ବିରୋଧରେ ପାର୍ଲାମେଣ୍ଟରେ ଲାଭଜନକ ପଦବୀ (ଅଫିସ୍ ଅଫ୍ ପ୍ରଫିଟ୍) ପ୍ରସଙ୍ଗ ଉଠିଥିଲା। ସେତେବେଳେ କେନ୍ଦ୍ରରେ କଂଗ୍ରେସ ନେତୃତ୍ୱାଧୀନ ଉପା ସରକାର ଚାଲିଥିଲା। ସୋନିଆ କଂଗ୍ରେସ ଅଧ୍ୟକ୍ଷା ଏବଂ ରାଏବରେଲି ଏମ୍ପି ଥିଲେ। ଏଥିସହ ଉପା ସରକାର ଗଢ଼ିଥିବା ନ୍ୟାଶନାଲ ଆଡ୍ଭାଇଜରି କାଉନ୍ସିଲର ମଧ୍ୟ ସେ ଅଧ୍ୟକ୍ଷା ଥିଲେ। ଏହାକୁ ଅଫିସ୍ ଅଫ୍ ପ୍ରଫିଟ୍ ଆଖ୍ୟାଦେଇ ସୋନିଆଙ୍କୁ ଟାର୍ଗେଟ କରାଯାଇଥିଲା। ଶେଷରେ ସେ ବାଧ୍ୟହୋଇ ଲୋକ ସଭାରୁ ଇସ୍ତଫା ଦେଇଥିଲେ। ପରେ ସୋନିଆ ରାଏବରେଲିରୁ ପୁନଃ ନିର୍ବାଚିତ ହୋଇ ଲୋକ ସଭାରେ ପ୍ରତିନିଧିତ୍ୱ କରିଥିଲେ।
