ଗୋପ,୧୩।୧୦(ଡି.ଏନ୍.ଏ.): ୨୪ ଘଣ୍ଟାରୁ ପରିବାରର କାର୍ଯ୍ୟ କରିବା ସହ ବାକି ଯାହା କିଛି ସମୟ ମିଳେ, ସେହି ସମୟରେ ପାଠ ପଢ଼ି ଓଡ଼ିଶା ସିଭିଲ ସର୍ଭିସ୍(ଓସିଏସ୍)ରେ ସଫଳତା ହାସଲ କରିଥିବା ତାପସ ଏବେ ରାଜ୍ୟ ପାଇଁ ଗୌରବ ଆଣିଛନ୍ତି। ପ୍ରାତଃରୁ ଉଠି ପ୍ରଥମେ ଶଯ୍ୟାଶାୟୀ ମା’ ଶଖୀମଣି, ବୃଦ୍ଧବାପା ଲିଙ୍ଗରାଜଙ୍କ ସେବା ଶୁଶ୍ର୍ରୂଷା କରିବା ସହ ପରିବାରର ସମସ୍ତ କାର୍ଯ୍ୟ ଶେଷ କରନ୍ତି। ଏପରିକି ପରିବାର ସଦସ୍ୟଙ୍କ ଲାଗି ତିନିବେଳାର ରୋଷେଇ ପ୍ରସ୍ତୁତ କରି ଖାଇବାକୁ ଦେଇଥାନ୍ତି। ଏହାପରେ ଯାହା ସମୟ ମିଳେ ସେହି ସମୟରେ ପାଠପଢ଼ାରେ ମନ ଦେଇଥାନ୍ତି ବୋଲି ଗୋପ ବ୍ଲକ ଅଧୀନ ବେଣୀପୁର ଗ୍ରାମର ତାପସ ରଞ୍ଜନ ମଲ୍ଲିକ କହିଛନ୍ତି। ପ୍ରକାଶ ଯେ, ଓପିଏସ୍ସି ଦ୍ୱାରା ପରିଚାଳିତ ଓସିଏସ୍ ପରୀକ୍ଷାରେ ୩୯୧ନମ୍ବର ର଼୍ୟାଙ୍କ ରଖି ଉତ୍ତୀର୍ଣ୍ଣ ହୋଇଛନ୍ତି ତାପସ। ସେ ଦିହୁଡ଼ାସ୍ଥିତ ନୀଳକଣ୍ଠେଶ୍ୱର ଉଚ୍ଚ ବିଦ୍ୟାଳୟରୁ ୧୦ମ ଶ୍ରେଣୀରେ ଉତ୍ତୀର୍ଣ୍ଣ ହେବା ପରେ ପୁରୀ ଏସ୍ସିଏସ୍ କଲେଜରେ +୨ ଓ ନିମାପଡ଼ା ସ୍ବୟଂଶାସିତ ମହାବିଦ୍ୟାଳୟରେ +୩ ପଢ଼ିଥିଲେ। ପରେ ରୋଜଗାର ନିମନ୍ତେ ଏକ ଘରୋଇ କମ୍ପାନୀରେ ଚାକିରି କରିଥିଲେ। ହେଲେ ବାପା ଲିଙ୍ଗରାଜଙ୍କ ଦେହ ଅସୁସ୍ଥ ଓ ମା’ ପକ୍ଷାଘାତରେ ପୀଡ଼ିତ ହେବା ପରେ ସେ ଚାକିରି ଛାଡ଼ି ଘରେ ରହି ପିତାମାତାଙ୍କ ସେବା କରିଥିଲେ। ପିତାମାତାଙ୍କ ସେବା ବ୍ୟତୀତ ସେ ପାଠ ପଢ଼ି ଓସିଏସ୍ ପରୀକ୍ଷା ଦେବା ଲାଗି ପ୍ରସ୍ତୁତ ହୋଇଥିଲେ। ଶେଷରେ ଏହି ପରୀକ୍ଷାରେ ସେ କୃତକାର୍ଯ୍ୟ ହୋଇଥିଲେ। ଏହି ସଫଳତା ମିଳିବା ପରେ ଗଣଶିକ୍ଷା ମନ୍ତ୍ରୀ ସମୀର ରଞ୍ଜନ ଦାଶ ଟେଲିଫୋନ୍ ଯୋଗେ ତାପସଙ୍କୁ କୃତଜ୍ଞତା ଜଣାଇଥିବା ସମୟରେ ଗୋପ ପଞ୍ଚାୟତ ସମିତି ଅଧ୍ୟକ୍ଷା ଝୁନୁ ମଲ୍ଲିକ୍, ପୂର୍ବତନ ସରପଞ୍ଚ ପ୍ରହଲ୍ଲାଦ ସ୍ବାଇଁ, ପୂର୍ବତନ ସମିତିସଭ୍ୟ କରୁଣାକର ସାହୁ ପ୍ରମୁଖ ପହଞ୍ଚତ୍ ପୁଷ୍ପଗୁଚ୍ଛ ଦେଇ ଶୁଭେଚ୍ଛା ଜଣାଇଥିଲେ। ଏ ନେଇ ତାପସ କୁହନ୍ତି, ମାଆବାପା ହେଉଛନ୍ତି ଚଳନ୍ତି ଭଗବାନ। ତାଙ୍କର ସେବା, ସାଙ୍ଗସାଥୀଙ୍କ ପ୍ରେରଣା ମୋତେ ଏହି ସଫଳତାର ପାହାଚରେ ଠିଆ କରାଇପାରିଛିି। ବର୍ତ୍ତମାନ କେବଳ ମାତାପିତାଙ୍କ ନୁହେଁ, ଓଡ଼ିଶାବାସୀଙ୍କ ସେବା କରିବି ବୋଲି ତାପସ କହିଛନ୍ତି।
