କେନ୍ଦୁଝର,୭ା୪: ସ୍ବାମୀଙ୍କ ଶୁଦ୍ଧିକ୍ରିୟା ପାଇଁ ୫ ହଜାର ଟଙ୍କା ଧାର ଆଣି ଶୁଝି ନ ପାରିବା ଯୋଗୁ ୨ପୁଅଙ୍କୁ ବନ୍ଧକ ରଖି ୭ବର୍ଷ ତଳେ ଚର୍ଚ୍ଚାକୁ ଆସିଥିବା କେନ୍ଦୁଝର ଜିଲା ଚମ୍ପୁଆ ପୌରପାଳିକା ଅଧୀନ ୧ ନଂ. ଓ୍ବାର୍ଡ ଗୋଧୂଳି ଗ୍ରାମର ସାବିତ୍ରୀ ନାଏକଙ୍କ ପରିବାରକୁ ନେଇ ପୁଣି ଆଲୋଚନା ଜୋର ଧରିଛି। କରୋନା ପୁଣି ଉକ୍ତ ପରିବାରକୁ ଅସହାୟ କରିଦେଇଛି।ସେତେବେଳେ ପ୍ରଶାସନର ଉଦାରପଣିଆ ଯୋଗୁ ରାହା ପାଇଥିବା ଉକ୍ତ ପରିବାର ଏବେ ପୁଣି ଦୁର୍ଦ୍ଦଶାରେ କାଳାତିପାତ କରୁଛନ୍ତି। ପେଟପାଟଣା ପାଇଁ ୩ପୁଅ ପାଠପଢ଼ା ଛାଡ଼ି ମୂଲମଜୁରି ଲାଗୁଛନ୍ତି। ଦୁଃଖ ଯେମିତି ସେମାନଙ୍କ ପିଛା ଛାଡ଼ୁନି।
ସୂଚନା ଅନୁଯାୟୀ, ୨୦୧୬ ଜାନୁୟାରୀ ୨୬ରେ ଦୀର୍ଘ ବର୍ଷ ଧରି ଅସୁସ୍ଥ ଥିବା ସାବିତ୍ରୀଙ୍କ ସ୍ବାମୀ ଆଖି ବୁଜିଥିଲେ। ସ୍ବାମୀଙ୍କ ଶୁଦ୍ଧିକ୍ରିୟା ପାଇଁ ଜଣେ ଲୋକ ପାଖରୁ ୫ ହଜାର ଟଙ୍କା ଧାର ଆଣିଥିଲେ। ଧାର ଅର୍ଥ ପରିଶୋଧ କରିବା ପାଇଁ ତାଙ୍କର ୨ପୁଅଙ୍କୁ ବଗାଳିଆ (ଗୋରୁ ଜଗାରଖା) କାମରେ ଲଗାଇଥିଲେ। ଯେଉଁ ବସୟରେ ଦୁଇ ଶିଶୁ ପାଠ ପଢ଼ିବା କଥା ସେହି ବୟସରେ ପର ଘରେ କାମ କରୁଥିଲେ। ଏନେଇ ଖବର ପ୍ରକାଶିତ ହେବା ପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା। ଜାତୀୟ ମାନବାଧିକାର କମିଶନଙ୍କ ନିକଟରେ ଅଭିଯୋଗ ପରେ କମିଶନ ରାଜ୍ୟ ସରକାରଙ୍କୁ ଚିଠିକରି ଏଭଳି ଘଟଣା ଯେପରି ଆଗକୁ ନ ଘଟେ ସେଥିପ୍ରତି ଧ୍ୟାନଦେବାକୁ କହିଥିଲେ। ତତ୍କାଳୀନ ଜିଲାପାଳ ତିରୁମାଲା ନାୟକ ସାବିତ୍ରୀଙ୍କ ଘରେ ପହଞ୍ଚତ୍ ଘଟଣାର ଅନୁଧ୍ୟାନ କରିଥିଲେ। ସାବିତ୍ରୀଙ୍କୁ ଘରୋଇ କମ୍ପାନୀ ସହାୟତାରେ ଘର ଦେବା ସହ ପିଲାଙ୍କୁ ବିଦ୍ୟାଳୟରେ ପାଠ ପଢ଼ାଇବା ବ୍ୟବସ୍ଥା କରିଥିଲେ। ତେବେ ଏହା ମଧ୍ୟରେ ୭ ବର୍ଷ ବିତିଯାଇଛି। ସାବିତ୍ରୀଙ୍କ ପରିବାର ପୂର୍ବଭଳି ଆର୍ଥିକ ଅନଟନ ମଧ୍ୟରେ ରହିଛନ୍ତି। କୋଭିଡ୍ ପରେ ୩ ପୁଅ ପାଠ ଛାଡ଼ି ପେଟପାଟଣା ପାଇଁ କାମ କରୁଛନ୍ତି। ବଡ଼ ପୁଅ ବୁକେଶ ଦାଦନ ଖଟିବାକୁ ବାହାର ରାଜ୍ୟକୁ ଚାଲିଯାଇଛନ୍ତି। ସେ ଆଉ ଘରକୁ ଆସୁ ନ ଥିବା ବେଳେ କେଉଁଠି ଅଛନ୍ତି ମଧ୍ୟ ଖୋଜ ଖବର ନାହିଁ। ସାନଝିଅ ବର୍ଷା ଏବେ ଗଁା ସ୍କୁଲରେ ପଞ୍ଚମ ଶ୍ରେଣୀରେ ପଢୁଛି। ଅନ୍ୟ ଦୁଇ ପୁଅ ପେଟପାଟଣା ପାଇଁ ମୂଲ ମଜୁରି ଲାଗୁଛନ୍ତି। ସେମାନେ କାମ କଲେ ଚୁଲି ଜଳୁଛି ବୋଲି ସାବିତ୍ରୀ କହିଛନ୍ତି। ଏ ନେଇ ୧ନଂ. ଓ୍ବାର୍ଡର କାଉନ୍ସିଲର ଛତ୍ରପତି ନାୟକ କହିଛନ୍ତି, ସେ ସମୟରେ ପ୍ରଶାସନ ପକ୍ଷରୁ ସହାୟତା ମିଳିଥିଲା। ଏବେ ସେମାନେ ଚମ୍ପୁଆ ଏନ୍ଏସିରୁ ସହାୟତା ପାଉଛନ୍ତି।
ନରେଶ ପଟ୍ଟନାୟକ
