ନୂଆଦିଲ୍ଲୀ,୩ା୯(ପି.ଟି.):ଫେସ୍ବୁକ୍ ରାଜନୈତିକ ଦୃଷ୍ଟିରୁ ପକ୍ଷପାତ କରୁଥିବା ଏବଂ ଭାରତର ଗଣତାନ୍ତ୍ରିକ ପ୍ରକ୍ରିୟାରେ ହସ୍ତକ୍ଷେପ କରୁଥିବା ନେଇ ବିବାଦ ଦେଖାଦେଇଥିବାବେଳେ କଂଗ୍ରେସ କରିଥିବା ଅଭିଯୋଗ ଉପରେ ସୋସିଆଲ ମିଡିଆ ପ୍ଲାଟଫର୍ମ ପକ୍ଷରୁ ଜବାବ ରଖାଯାଇଛି। ଏହା ପକ୍ଷପାତ କରେନାହିଁ ଏବଂ ଯେକୌଣସି ପ୍ରକାର ଘୃଣା ଓ ଧର୍ମାନ୍ଧତାକୁ ନିନ୍ଦା କରେ ବୋଲି ଫେସ୍ବୁକ୍ ପକ୍ଷରୁ କୁହାଯାଇଛି। କଂଗ୍ରେସର ଅଭିଯୋଗ ଉପରେ ଫେସ୍ବୁକ୍ର ପବ୍ଲିକ୍ ପଲିସି, ଟ୍ରଷ୍ଟ ଆଣ୍ଡ ସେଫ୍ଟି ନିର୍ଦ୍ଦେଶକ ନେଇଲ୍ ପଟ୍ସ କହିଛନ୍ତି, ପାତରଅନ୍ତର ଅଭିଯୋଗ ଅତ୍ୟନ୍ତ ଗୁରୁତର। ଏହା ସବୁବେଳେ ନିରପେକ୍ଷ ରହିଆସିବା ସହ ସର୍ବୋଚ୍ଚ ସ୍ତରର ସାଧୁତା ବଜାୟ ରଖିଆସିଛି ବୋଲି ସେ କହିଛନ୍ତି।
ଫେସ୍ବୁକ୍ରେ ଭାଜପା ନେତାମାନଙ୍କ ଉତ୍ତେଜନାପୂର୍ଣ୍ଣ ଓ ଘୃଣା ଉଦ୍ରେକକାରୀ ବକ୍ତବ୍ୟକୁ ଏହି ସୋସିଆଲ ମିଡିଆ ପ୍ଲାଟଫର୍ମ ଅଣଦେଖା କରୁଥିବାନେଇ ଓ୍ବାଲ ଷ୍ଟ୍ରିଟ୍ ଜର୍ନାଲରେ ପ୍ରକାଶ ପାଇଥିଲା। ଭାରତୀୟ ଗଣତାନ୍ତ୍ରିକ ପ୍ରକ୍ରିୟା ଏବଂ ସାମାଜିକ ସୌହାର୍ଦ୍ଦ୍ୟରେ ଫେସ୍ବୁକ୍ ହସ୍ତକ୍ଷେପ କରୁଥିବା ନେଇ କଂଗ୍ରେସ ଅଭିଯୋଗ କରିଥିଲା। ଘୃଣିତ ବକ୍ତୃତା ନିୟମାବଳୀ ଶାସକ ଭାଜପା ନେତାଙ୍କ ଉପରେ ଲାଗୁ କରିବାରେ ଏହା କୋହଳ ମନୋଭାବ ପୋଷଣ କରୁଥିବା ନେଇ ବିରୋଧୀ ଦଳ ପକ୍ଷରୁ ଅଭିଯୋଗ ହୋଇଥିଲା। ଏନେଇ କଂଗ୍ରେସ ଫେସ୍ବୁକ୍ ସିଇଓ ମାର୍କ ଜୁକରବର୍ଗଙ୍କୁ ପତ୍ର ଲେଖି ଜବାବ ମାଗିଥିଲା।
ଫେସ୍ବୁକ୍ର ନୀତିର ଉଲ୍ଲଂଘନ କରିଥିବା ଅଭିଯୋଗରେ ଭାଜପା ନେତା ଟି. ରାଜା ସିଂଙ୍କୁ ଉକ୍ତ ପ୍ଲାଟଫର୍ମ ନିଷିଦ୍ଧ କରିଛି। ରାଜନୈତିକ ଚାପ ବଢ଼ିବା ପରେ ତେଲଙ୍ଗାନାର ଏହି ଭାଜପା ବିଧାୟକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିବା ଅଭିଯୋଗ ହେଉଛି। ତାଙ୍କୁ ଫେସ୍ବୁକ୍ର ବିପଜ୍ଜନକ ବ୍ୟକ୍ତିବିଶେଷ ଓ ସଂଗଠନ ନୀତି ତାଲିକାରେ ରଖାଯାଇଛି। ଫେସ୍ବୁକ୍ କିମ୍ବା ଏହାର ଫଟୋ ଓ ଭିଡିଓ ଶେୟାରିଂ ପ୍ଲାଟଫର୍ମ ଇନ୍ଷ୍ଟାଗ୍ରାମରେ ତାଙ୍କୁ ଅନୁମତି ମିଳିବ ନାହିଁ।
