ଭଞ୍ଜନଗର,୩ା୩(ଡି.ଏନ୍.ଏ): ଗଞ୍ଜାମ ଜିଲା ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ଦୁର୍ଗାପ୍ରସାଦ ଏବଂ ମୁଜାଗଡ ସେକ୍ସନର ଏକାଧିକ ଜଙ୍ଗଲରେ ଗୁରୁବାର ନିଆଁ ଲାଗିଥିବା ଦେଖିବାକୁ ମିଳିଛି। ଦୁର୍ଗାପ୍ରସାଦ ଅଞ୍ଚଳ ଜଙ୍ଗଲରେ ମଧ୍ୟ ନିଆଁ ଲାଗିଛି। ସମ୍ପୃକ୍ତ ସେକ୍ସନର କିଛି କର୍ମଚାରୀ ଲୋକଙ୍କ ସହ ସୁସମ୍ପର୍କ ରଖିବାରେ ବିଫଳ ଯୋଗୁଁ ନିଆଁକୁ ଆୟତ୍ତ କରିପାରୁନାହାନ୍ତି। କିଛି କର୍ମଚାରୀ କର୍ମକ୍ଷେତ୍ରରେ ରହିବା ବଦଳରେ ଭଞ୍ଜନଗର ସହର ନଚେତ ନିଜ ଘରେ ରହିବାକୁ ପସନ୍ଦ କରୁଛନ୍ତି। ତେଣୁ ଜଙ୍ଗଲରେ ନିଆଁ ଲାଗିଲେ ହଠାତ୍ କର୍ମଚାରୀମାନେ ଜାଣି ପାରୁନାହାନ୍ତି। ଫଳରେ ଜଙ୍ଗଲ ପୋଡି ବଢିଯାଉଛି। ବିଗତ ଦୁଇଦିନ ହେଲା କର୍ମଚାରୀମାନେ ଦୁର୍ଗାପ୍ରସାଦ ଅଞ୍ଚଳର ଲାଗିଥିବା ବିଭିନ୍ନ ଜଙ୍ଗଲ ନିଆଁକୁ ରୋକିପାରୁନାହାନ୍ତି। ଡିଏଫଓ ସୁଦର୍ଶନ ବେହେରା ନିଆଁକୁ ନିୟନ୍ତ୍ରଣ କରିବା ପାଇଁ ଅନ୍ୟ ରେଞ୍ଜର କର୍ମଚାରୀମାନଙ୍କୁ ଏକାଠି କରି ଘଟଣା ସ୍ଥଳକୁ ଯାଇଛନ୍ତି। ସେହିଭଳି ମୁଜାଗଡ ନିକଟସ୍ଥ କୁଟୁଣିକୁମ୍ପା ପାହାଡ଼ର ଦୁଇଟି ସ୍ଥାନରେ ନିଆଁ ଲାଗିଛି। ବାପାଙ୍ଗୀ ନିକଟସ୍ଥ ପାହାଡ଼ ମଧ୍ୟ ଜଳୁଛି। ଗୋଟିଏ ପଟେ ହାତୀ ଭୟ, ଅନ୍ୟପଟେ ଜଙ୍ଗଲ ଜଳିବା ଯୋଗୁଁ ରାତିରେ ନିଆଁ କୁ ନିୟନ୍ତ୍ରଣ କରିବା କଷ୍ଟକର ହୋଇପଡୁଛି। ଏଥିସହ ଜଗନ୍ନାଥପ୍ରସାଦ, ତାରସିଂ ରେଞ୍ଜରେ ମଧ୍ୟ କେତେକ ଜଙ୍ଗଲ ଜଳୁଥିବା ଦେଖିବାକୁ ମିଳିଛି। ତାହାକୁ ନିୟନ୍ତ୍ରଣ କରାଯାଇଥିବା ଜଣାପଡିଛି। ଯେଉଁ କର୍ମଚାରୀମାନେ ନିଷ୍ଠାର ସହ କାମ କରୁଛନ୍ତି ସେଠାରେ ନିଆଁ ତୁରନ୍ତ ନିୟନ୍ତ୍ରଣ କରାଯାଇପାରୁଛି।
ଏନେଇ ଡିଏଫଓ ସୁଦର୍ଶନ ବେହେରାଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି, ନିଆଁ ନିୟନ୍ତ୍ରଣ କରିବା ପାଇଁ ସବୁ ପ୍ରକାର ଚେଷ୍ଟା କରାଯାଉଛି। ଭିଏସଏସ୍ କର୍ମକର୍ତ୍ତା ଏବଂ ବନ କର୍ମଚାରୀ ମିଳିମିଶି ନିଆଁକୁ ନିୟନ୍ତ୍ରଣ ପାଇଁ ଲାଗି ପଡ଼ିଛନ୍ତି। ଜଙ୍ଗଲ ପୋଡି ଯୋଗୁଁ ଜଙ୍ଗଲର ତିନୋଟି ସ୍ତର ମଧ୍ୟରୁ ପ୍ରଥମ ସ୍ତର ଜଙ୍ଗଲଟି ବିଶେଷ କ୍ଷତିଗ୍ରସ୍ତ ହେଉଛି। ଦ୍ୱିତୀୟସ୍ତର ମଧ୍ୟ କିଛିମାତ୍ରାରେ କ୍ଷତିଗ୍ରସ୍ତ ହେଉଛି। ବନ୍ୟପ୍ରାଣୀ ବିପଦରେ ପଡ଼ିବା ସହ ପରିବେଶ ପ୍ରଦୂଷିତ ହେଉଛି। ଏହିଭଳି ପରିସ୍ଥିତିରେ ସମସ୍ତେ ମିଳିମିଶି ଜଙ୍ଗଲ ପୋଡିକୁ ରୋକିବାର ଆବଶ୍ୟକ ରହିଛି।
