ରୂପ୍ସା,୯।୧: ବାଉଁଶରୁ ବିଭିନ୍ନ ନିତ୍ୟ ବ୍ୟବହାର୍ଯ୍ୟ ସାମଗ୍ରୀ ପ୍ରସ୍ତୁତ କରିବା ହେଉଛି ଆମର କୌଳିକ ବୃତ୍ତି। ଅଧିକ ଲାଭ ମିଳୁ ନ ଥିଲେ ବି ବୃତ୍ତିକୁ ଛାଡ଼ି ହେଉନି। ପୁରୁଷ ପୁରୁଷ ଧରି ଏହି ବୃତ୍ତିକୁ ଅପଣାଇ ଦୟନୀୟ ପରିସ୍ଥିତିରେ ଜୀବିକା ନିର୍ବାହ କରୁଛୁ। ବର୍ତ୍ତମାନ କରୋନା ମାଡ଼ରେ ହାତ ବନ୍ଦ ହୋଇଯାଇଛି। ଇତି ମଧ୍ୟରେ ସରକାର ବିଭିନ୍ନ ବର୍ଗର ଲୋକଙ୍କୁ ପ୍ୟାକେଜ୍ ଘୋଷଣା କରିଛନ୍ତି। ହେଲେ ସରକାର ତାଙ୍କୁ ଆଡ଼ ନଜରରେ ରଖିବା ଅତ୍ୟନ୍ତ ଦୁର୍ଭାଗ୍ୟଜନକ ବୋଲି ବାଉଁଶ କାରିଗକର ମତପ୍ରକାଶ କରିଛନ୍ତି।
ବାଲେଶ୍ୱର ଜିଲା ରୂପ୍ସା ଥାନା ଗଡ଼ପଦା ପଞ୍ଚାୟତ ଲଛମନଖୁଣ୍ଟା ଅଞ୍ଚଳର ଡୁମସାହି ଗାଁ। ଗାଁରେ ଲକ୍ଷ୍ମଣ କାଳନ୍ଦୀ, ଉତ୍ତମ କାଳନ୍ଦୀ, ଅଭି କାଳନ୍ଦୀ, ଅନ୍ତା କାଳନ୍ଦୀ, ଫନୀ କାଳନ୍ଦୀ, କର୍ମୁ କାଳନ୍ଦୀ ଓ ସନ୍ତୋଷ କାଳନ୍ଦୀଙ୍କ ସମେତ ୧୦ରୁ ଅଧିକ ହରିଜନ ସମ୍ପ୍ରଦାୟର ବାଉଁଶ କାରିଗର ପରିବାର ବାସକରନ୍ତି। ସେମାନେ ବାଉଁଶରୁ ଚଲା, ଚାଲୁଣୀ, ଝୁଡ଼ା, ପାଛିଆ, କେଟିଆ, ଝାମ୍ପି, ଦଲମା ଆଦି ସାମଗ୍ରୀ ତିଆରି କରିଥାନ୍ତି। ଏହା ହିଁ ତାଙ୍କର ବଞ୍ଚତ୍ବାର ଆଧାର। କାରିଗର ଲକ୍ଷ୍ମଣ କାଳନ୍ଦୀ କହନ୍ତି, ବାପ, ଗୋଁସିବାପ ଅମଳରୁ ଆମେ ଏହି ବ୍ୟବସାୟ କରିଆସୁଛୁ। ଗୋଟିଏ ବାଉଁଶକୁ ୮୦ରୁ ୧୦୦ ଟଙ୍କା ମଧ୍ୟରେ କିଣିବାକୁ ପଡୁଛି। ସେଥିରୁ ବିଭିନ୍ନ ସାମଗ୍ରୀ ତିଆରି କରି ସାଇକେଲରେ ହାଟ,ବଜାର ବୁଲି ବିକ୍ରି କରିଥାଉ। ମାସରେ ୩ରୁ ୪ହଜାର ଟଙ୍କା ରୋଜଗାର ହୁଏ। ସେଇ ପଇସାରେ ଚାଉଳ, ରାଶନ, ତେଲଲୁଣ, ଔଷଧ, ଲୁଗାପଟା କିଣି ଚଳିବାକୁ ପଡ଼େ। ବେପାର ହେଲେ ଚୂଲୀ ଜଳେ, ନ ହେଲେ ପୂରା ପରିବାର, ପିଲାଛୁଆ ଭୋକ ଉପାସରେ ଦିନ କାଟୁ। ନିଜ ପରିଶ୍ରମରୁ ଯାହା ଦି ପଇସା ଲାଭ ମିଳେ ତାହା ହଁି ଆମ ସମ୍ବଳ।
