ପଦ୍ମପୁର,୩୦ା୬(ପ୍ରଦୀପ୍ତ ଦାଶ ):ପଦ୍ମପୁର ସହର ତଥା ଏହାର ଆଖପାଖ ଅଞ୍ଚଳର ପଦ୍ମପୁର ଦୈନିକ ପରିବା ବଜାର ଅନ୍ୟତମ। ସପ୍ତାହରେ ମଙ୍ଗଳବାର ଓ ଶନିବାର ଏଠାରେ ହାଟ ବସିଥାଏ। ଏହି ହାଟକୁ ଅଞ୍ଚଳର କୋଣ ଅନୁକୋଣରୁ ଅନେକ ପ୍ରକାର ବ୍ୟବସାୟୀ ଆସିଥାନ୍ତି। ଏହି ହାଟର ପରିଚାଳନା ଦାୟିତ୍ୱ ପଦ୍ମପୁର ବିଜ୍ଞାପିତ ଅଞ୍ଚଳ ପରିଷଦ ନେଇଥିବା ବେଳେ ବ୍ୟବସାୟୀଙ୍କଠାରୁ ଶୁଳ୍କ ମଧ୍ୟ ଆଦାୟ କରିଥାନ୍ତି। କିନ୍ତୁ ଏପର୍ଯ୍ୟନ୍ତ ବ୍ୟବସାୟୀମାନେ ବସିବା ପାଇଁ ପର୍ଯ୍ୟାପ୍ତ ପିଣ୍ଡି ବ୍ୟବସ୍ଥା କରାଯାଇନାହିଁ। ଖରା ହେଉ କି ବର୍ଷା ବ୍ୟବସାୟୀମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଥାନ୍ତି। ବର୍ତ୍ତମାନ ବର୍ଷା ଦିନ ଆସିଯାଇଥିବାରୁ ବେପାରୀ ସମେତ ଖାଉଟି ବହୁତ ଅସୁବିଧାର ସମ୍ମୁଖୀନ ହେଉଛନ୍ତି। ସେହିପରି ହାଟ ଭିତରେ ଲକ୍ଷ ଲକ୍ଷ ଟଙ୍କା ବ୍ୟୟରେ ଭେଣ୍ଡିଂ ଗୃହ ତିଆରି କରିଛନ୍ତି ମାତ୍ର ତାହା କାର୍ଯ୍ୟରେ ଲାଗୁନାହିଁ। ଏହି ଟିଣ ଘର ଯୋଗୁ ବଜାର ସଂକୁଚିତ ହେବା ସହିତ ଏହା ନିଶାକାରୀମାନଙ୍କ ଆଖଡା ସ୍ଥଳ ପାଲଟିଛି, ଯାହା କି ସାଧାରଣରେ ଅସନ୍ତୋଷ ପ୍ରକାଶ ପାଇଛି। ତେଣୁ ଏନ୍ଏସି ଶୀଘ୍ର ପିଣ୍ଡି ନିର୍ମାଣ ସହିତ ଦୈନିକ ବଜାରର ସ୍ବଚ୍ଛତା ପ୍ରତି ଦୃଷ୍ଟିଦେବାକୁ ଦାବି ହେଉଛି।
