ବନ୍ତ,୨୯।୧(ସ୍ବ.ପ୍ର.)-ଭଦ୍ରକ ଜିଲା ବନ୍ତ ବ୍ଲକ ଅଞ୍ଚଳବାସୀ କୃଷି ଉପରେ ନିର୍ଭରଶୀଳ। ବ୍ଲକର ପ୍ରାୟ ୯୫ ପ୍ରତିଶତ ଲୋକ ଚାଷ ଉପରେ ନିର୍ଭର କରିଥାନ୍ତିି। କିନ୍ତୁ ଜଳସେଚନ ବ୍ୟବସ୍ଥା ନ ଥିବାରୁ ବର୍ଷସାରା ମାତ୍ର ଗୋଟିଏ ଫସଲ ହୋଇଥାଏ। ବ୍ଲକରେ ୧୫ ହଜାର ହେକ୍ଟର ଚାଷଜମି ରବି ଋତୁରେ ଚାଷ ହୋଇ ନ ପାରି ପଡ଼ିଆ ପଡୁଛି। ନିଜ ଚାଷଜମିରୁ ୨ଟି ଫସଲ ଉତ୍ପାଦନ ହୋଇପାରିଲେ ଲୋକଙ୍କ ଆର୍ଥତ୍କ ସ୍ଥିତିରେ ସୁଧାର ଆସିପାରନ୍ତା। ଜଳସେଚନ ଅଭାବରୁ ଜାନୁୟାରୀରୁ ଜୁନ୍ ୬ ମାସ ଚାଷୀ ପରିବାରର ପିଲା ଦାଦନ ଖଟିବାକୁ ବାହାର ରାଜ୍ୟକୁ ଯିବାକୁ ବାଧ୍ୟ ହେଉଛନ୍ତି।
କୃଷି ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ବ୍ଲକରେ ମୋଟ ୧୮ ହଜାର ୮୬୫ ହେକ୍ଟର ଚାଷଜମି ରହିଛି। ସେଥିରୁ ରବିଋତୁରେ ମାତ୍ର ୩ ହଜାର ୭୦୦ ହେକ୍ଟର ଜମିରେ ଚାଷ ହୋଇଥାଏ। ଚଳିତବର୍ଷ ୩୭୯୨ ହେକ୍ଟର ଜମିରେ ରବି ଚାଷ କରାଯିବାକୁ ଲକ୍ଷ୍ୟ ରଖାଯାଇଛି। ସେଥି ମଧ୍ୟରୁ ୧୫୬୦ ହେକ୍ଟର ଜମିରେ ପରିବା, ୧୪୮୭ ହେକ୍ଟରରେ ଡାଲି ଜାତୀୟ, ୧୮୫ ହେକ୍ଟର ତୈଳ ବୀଜ, ୨୦ ହେକ୍ଟରରେ ଆଖୁଚାଷ ଓ ୫୪୦ ହେକ୍ଟରରେ ଧାନଚାଷ କରାଯିବାକୁ ସ୍ଥିର ହୋଇଛି। ୨୦୧୯-୨୦ ବର୍ଷରେ ୩୭୫୨ ହେକ୍ଟର ଜମି ରବି ଚାଷ କରାଯାଇଥିବା ବେଳେ ଚଳିତବର୍ଷ ଅଧିକ ୪୦ ହେକ୍ଟର ଜମିରେ ରବି ଚାଷ ଲାଗି ଲକ୍ଷ୍ୟ ରଖାଯାଇଛି। ସାଳନ୍ଦୀ ଜଳସେଚନ ପ୍ରକଳ୍ପରୁ ୪୮୩ ହେକ୍ଟର, ଲିଫ୍ଟ ଇରିଗେଶନରୁ ୧୦୭୮ ହେକ୍ଟର, ସାଲୋ ଟ୍ୟୁବୱେଲରୁ ୧୫୨୫ ହେକ୍ଟର, ନଦୀ ଓ ପୋଖରୀରୁ ୨୨୦ ହେକ୍ଟର ଜମି ଜଳସେଚିତ ହେଉଛି। ଅବଶିଷ୍ଟ ଜମି ଜଳସେଚନ ଅଭାବରୁ ପଡ଼ିଆ ପଡୁଛି। ଏହି ସମସ୍ୟା ପ୍ରତି ବିଭାଗ ପକ୍ଷରୁ ଗୁରୁତ୍ୱ ଦିଆଯାଇ ପଦକ୍ଷେପ ନିଆଯିବାକୁ ଚାଷୀମାନେ ଦାବି କରୁଛନ୍ତି। ନିମଗଢିଆର ଚାଷୀ ମାନସ ପାଳ କହନ୍ତି, ବର୍ଷ ସାରା ଗୋଟିଏ ଫସଲରେ ଚଳିବା କଷ୍ଟକର। ଅନ୍ୟପଟେ କାମ ଅଭାବରୁ ପିଲାମାନେ ରୋଜଗାର ପାଇଁ ବାହାରକୁ ଯିବାକୁ ବାଧ୍ୟ ହେଉଛନ୍ତି। ବର୍ଷରେ ଦୁଇଥର ଚାଷ ହୋଇପାରିଲେ ଆର୍ଥତ୍କ ସ୍ଥିତିରେ ଉନ୍ନତି ହେବା ସହ ଯୁବକମାନେ ଦାଦନ ଖଟିବାକୁ ନ ଯାଇ ଚାଷ କାମରେ ନିୟୋଜିତ ହୋଇପାରନ୍ତେ ବୋଲି କହିଛନ୍ତି କୁଆଁର୍ଦ୍ଦାର ଚାଷୀ ଅଭିମନ୍ୟୁ ଆଇଚ। ରବି ଋତୁରେ ଜମିକୁ ଜଳସେଚନ ବ୍ୟବସ୍ଥା ହୋଇପାରିଲେ ବର୍ଷରେ ୨ଟି ଫସଲ ଦ୍ୱାରା ଆୟ ଦ୍ୱିଗୁଣିତ ହୋଇପାରନ୍ତା। ଖରିଫରେ ରୋଗପୋକ ପାଇଁ ଯେଉଁ କ୍ଷତି ହୁଏ ତାହା ରବି ଋତୁରେ ଭରଣା ହୋଇପାରନ୍ତା ବୋଲି ସୁଅଁାପଦାର ଚାଷୀ ଚନ୍ଦ୍ରକାନ୍ତ ମଣ୍ଡଳ ମତ ପ୍ରକାଶ କରିଛନ୍ତି। ଏ ସମ୍ପର୍କରେ ଭାରପ୍ରାପ୍ତ ବ୍ଲକ କୃଷି ଅଧିକାରୀ ତୁଷାରକାନ୍ତ ପତିଙ୍କୁ ପଚାରିବାରୁ ପ୍ରତିବର୍ଷ କେନାଲ କାମ ଚାଲୁଥିବାରୁ ଏହି ସମୟରେ କେନାଲ ପାଣି ଆସିପାରୁ ନାହିଁ ବୋଲି କହିଛନ୍ତି।
