ନାଉଗଁା,୭ା୧(ସ୍ବ.ପ୍ର): ବନ୍ୟା ସମୟରେ ଦେବୀ ନଦୀ କୂଳ ଖାଇବା ଯୋଗୁ ପ୍ରତି ବର୍ଷ ନାଉଗଁା ବ୍ଳକ ଅନ୍ତର୍ଗତ ପାରିଶିଖର ଗ୍ରାମର ଅନେକ ଚାଷ ଜମି ନଦୀ ଗର୍ଭରେ ଲୀନ ହୋଇଯାଉଛି। ଚାଷ ଜମିକୁ ସୁରକ୍ଷା ଦେବା ପାଇଁ ସ୍ଥାନୀୟ ବାସିନ୍ଦା ପ୍ରଶସାନିକ ଅଧିକାରୀଙ୍କ ନିକଟରେ ବାରମ୍ବାର ଅଭିଯୋଗ କରିବା ପରେ ନଦୀରେ ବୁରୁଜ ନିର୍ମାଣ ସହ ପଥର ପ୍ୟାକିଂ କାର୍ଯ୍ୟ ଚାଲୁ ରହିଛି। ଓଡିଶା ସରକାରଙ୍କ ଜଳ ସେଚନ ବିଭାଗ ଦ୍ୱାରା ଉକ୍ତ କାର୍ଯ୍ୟ କରାଯାଉଥିବାବେଳେ ଜଳ ସେଚନ ବିଭାଗ ନିମାପଡା ଡିଭିଜନର କାକଟପୁର ଉପଖଣ୍ଡ ଏହାର ତଦାରଖ ଦାୟିତ୍ୱରେ ରହିଛନ୍ତି। ଉକ୍ତ ନିର୍ମାଣ କାର୍ଯ୍ୟ ପାଇଁ ବିଭାଗ ପକ୍ଷରୁ କୋଟି କୋଟି ଟଙ୍କା ଖର୍ଚ୍ଚ କରାଯାଉଛି। ମାତ୍ର ଏପର୍ଯ୍ୟନ୍ତ ନିର୍ମାଣ କାର୍ଯ୍ୟରେ କୌଣସି ସୂଚନା ଫଳକ ଲଗାଯାଇ ନାହିଁ। ସରକାରଙ୍କ ନିୟମାନୁସାରେ କୌଣସି ନିର୍ମାଣ କାର୍ଯ୍ୟ ପୂର୍ବରୁ ଜନ ସାଧାରଣଙ୍କ ଅବଗତି ନିମନ୍ତେ ସୂଚନା ଫଳକ ଲଗାଯିବା କଥା। କିନ୍ତୁ ଏଠାରେ ନିୟମକୁ ଉଲ୍ଲଂଘନ କରାଯାଇଥିବା ନେଇ ସାଧାରଣ ଅଭିଯୋଗ ହୋଇଛି। ଜଳସେଚନ ବିଭାଗ ଉପଖଣ୍ଡର ଯନ୍ତ୍ରୀ ତପନ ନାୟକଙ୍କ ସୂଚନାନୁସାରେ ଏହି କାର୍ଯ୍ୟ ଡିସେମ୍ବର ୨୦୨୨ରୁ ଆରମ୍ଭ କରାଯାଇଛି। ମାର୍ଚ୍ଚ ୨୦୨୪ରେ ଶେଷ ହେବ। ଏନେଇ ନଦୀ କୂଳଠାରୁ ଭିତରକୁ ୨୦ ମିଟର ପର୍ଯ୍ୟନ୍ତ ୬ଟି ବୁରୁଜ ନିର୍ମାଣ କରଯିବା ସହ ୭୪୦ ମିଟର ପଥର ପ୍ୟାକିଂ କରାଯିବ। ଏହି କାର୍ଯ୍ୟ ପାଇଁ ବିଭାଗ ପକ୍ଷରୁ ୯ କୋଟି ୮୫ ଲକ୍ଷ ୮ହଜାର ୨୭୦ ଟଙ୍କା ବ୍ୟୟ ଅଟକଳ କରାଯାଇଛି। ଏବେ ଠିକାଦାରଙ୍କ ଦ୍ୱାରା ନଦୀ ପାର୍ଶ୍ୱରେ ବୁରୁଜ ନିର୍ମାଣ କାର୍ଯ୍ୟ ଚାଲୁ ରହିଛି। କିନ୍ତୁ ନିର୍ମାଣ କରାଯାଉଥିବା ବୁରୁଜରେ ନିମ୍ନମାନର ପଥର ବ୍ୟବହାର କରାଯାଉଥିବା ବେଳେ ଛୋଟ ପଥର ବ୍ୟବହାର କରାଯାଉଛି। ଏନେଇ ସ୍ଥାନୀୟ ଲୋକେ ଅସନ୍ତୋଷବ୍ୟକ୍ତ କରିଛନ୍ତି। ପଥର ପ୍ୟାକିଂ କାର୍ଯ୍ୟ କିମ୍ବା ବୁରୁଜ କାର୍ଯ୍ୟ ଠିକ୍ ନ ହେଲେ ନଦୀରେ ବନ୍ୟା ଆସିଲେ ଉକ୍ତ ପଥର ଖସି ପାଣିକୁ ଚାଲିଯିବାର ସମ୍ଭାବନା ରହିଛି ବୋଲି ସେମାନେ କହିଛନ୍ତି। ଏନେଇ କାର୍ଯ୍ୟର ସ୍ଥାୟିତ୍ୱ ପ୍ରଶ୍ନବାଚୀ ସୃଷ୍ଟି ହୋଇଛି। ଏହି କାର୍ଯ୍ୟକୁ ଠିକ୍ ଭାବେ କରିବା ପାଇଁ ଚିତ୍ତରଞ୍ଜନ କାଣ୍ଡି, ପ୍ରସନ୍ନ ସ୍ବାଇଁ,ପ୍ରଶାନ୍ତ ବାରିକ,ସିଲୁ ପରିଡା
ପ୍ରମୁଖ ଦାବି କରିଛନ୍ତି। ଏନେଇ ସ୍ଥାନୀୟ ବାସିନ୍ଦା ଜଗତସିଂହପୁର ବିଧାୟକ ପ୍ରଶାନ୍ତ ମୁଦୁଲିଙ୍କ ନିକଟରେ ମଧ୍ୟ ଅଭିଯୋଗ କରିଥିଲେ। ଅଭିଯୋଗକୁ ଭିତ୍ତି କରି ଗତ ୩ ଜାନୁୟାରୀ ୨୦୨୩ ଜଳସେଚନ ବିଭାଗର ସର୍ବୋଚ୍ଚ ଯନ୍ତ୍ରୀ ଭକ୍ତ ରଞ୍ଜନ ମହାନ୍ତି ପହଞ୍ଚତ୍ ବୁରୁଜ କାର୍ଯ୍ୟ ବୁଲି ଦେଖିବା ସହ ଠିକ୍ ଭାବେ କାର୍ଯ କରିବାକୁ ଠିକାଦାର ଓ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛନ୍ତି। ସୂଚନା ଫଳକ ବିଷୟରେ ଜଳସେଚନ ବିଭାଗର କାକାଟପୁର ଉପଖଣ୍ଡ ଯନ୍ତ୍ରୀ ତପନ ନାୟକ କୁହନ୍ତି, ଏବେ କାର୍ଯ୍ୟ ଚାଲୁ ରହିଛି। ଠିକାଦାରଙ୍କୁ କହି ସୂଚନା ଫଳକ ଲଗାଯିବାର ବ୍ୟବସ୍ଥା କରାଯିବ।
