ପାଟନା,୧୫।୧୧: ବିହାରରେ ପୁଣି ନୀତିଶ କୁମାର ଏବଂ ସୁଶୀଲ ମୋଦିଙ୍କ ଯୋଡ଼ି ଶାସନ ଡୋର ଧରିବେ। ଏନେଇ ରବିବାର ଏନ୍ଡ଼ିଏ ବୈଠକରେ ସ୍ଥିର ହୋଇଛି। ନିତୀଶଙ୍କୁ ଏନ୍ଡ଼ିଏର ନେତା ଭାବେ ଚୟନ କରାଯାଇଛି। ନୀତିଶ ପୁଣି ମୁଖ୍ୟମନ୍ତ୍ରୀ ହେବେ ଏବଂ ସୁଶୀଲ ଉପମୁଖ୍ୟମନ୍ତ୍ରୀ ଭାବେ ଦାୟିତ୍ୱ ଗ୍ରହଣ କରିବେ। ନୀତିଶ ରାଜ୍ୟପାଳ ଫାଗୁ ଚୌହ୍ବାନଙ୍କୁ ଭେଟି ସରକାର ଗଠନ ପାଇଁ ଦାବି ଉପସ୍ଥାପନ କରିଛନ୍ତି। ସୋମବାର ଅପରାହ୍ନ ୪ଟା ୩୦ରେ ନୀତିଶ ରାଜ୍ୟର ୩୭ ମୁଖ୍ୟମନ୍ତ୍ରୀ ଭାବେ ଶପଥ ନେବେ। ମୁଖ୍ୟମନ୍ତ୍ରୀ ଭାବେ ସେ ୭ମ ଥର ଲାଗି ଶପଥ ନେବେ। ସେ ମୁଖ୍ୟମନ୍ତ୍ରୀ ହେବାକୁ ମନା କରୁଥିଲେ ବୋଲି ନୀତିଶ କହିଛନ୍ତି। ତେବେ ସମସ୍ତଙ୍କର କଥା ମାନି ସେ ଏହା ଗ୍ରହଣ କରିଛନ୍ତି। ଭାଜପାରୁ କେହି ଜଣେ ମୁଖ୍ୟମନ୍ତ୍ରୀ ହୁଅନ୍ତୁ ବୋଲି ସେ ଚାହୁଁଥିବା କହିଛନ୍ତି। ସୁଶୀଲଙ୍କୁ ଭାଜପା ବିଧାନମଣ୍ଡଳ ନେତା ଭାବେ ଚୟନ କରାଯାଇଛି। ସେହିପରି ଭାଜପା ବିଧାୟକ ଦଳ ନେତା ଭାବେ କଟିହାର ଆସନରୁ ବିଜୟୀ ହୋଇଥିବା ତାରକିଶୋର ପ୍ରସାଦଙ୍କୁ ଚୟନ କରାଯାଇଛି। ସେହିପରି ଉପନେତା ଭାବେ ରେଣୁ ଦେବୀ ଚୟନ ହୋଇଛନ୍ତି।
