ବମ୍ବେ: ନିଜର ବିବାଦୀୟ ବୟାନକୁ ନେଇ ସର୍ବଦା ଚର୍ଚ୍ଚାରେ ରହିଥାନ୍ତି ଅଭିନେତ୍ରୀ କଙ୍ଗନା ରାଣାଓ୍ବତ। ଏବେ ମଧ୍ୟ ସେଭଳି କିଛି ଚାଲିଛି। ଅଭିନେତା ସୁଶାନ୍ତ ସିଂହ ରାଜପୁତଙ୍କ ମୃତ୍ୟୁ ପରେ ମହାରାଷ୍ଟ୍ର ସରକାରଙ୍କ ବିରୋଧରେ କଟାକ୍ଷ କରି ସେ ଆଲୋଚନାର ପରିସରକୁ ଆସିଛନ୍ତି। ଏଭଳିସ୍ଥିତିରେ କଙ୍ଗନାଙ୍କ ମଣିକର୍ଣ୍ଣିକା ଷ୍ଟୁଡିଓର କିଛି ଅବୈଧ ନିର୍ମାଣକୁ ବିଏମ୍ସି ଭାଙ୍ଗି ଦେଇଥିଲା। ଏହାକୁ ନେଇ ରାଜନୀତି ଜୋରଦାର ଚାଲିଥିବା ବେଳେ ଏକ ଗୁଜବ ପ୍ରଚାରିତ ହେଉଛି। କଙ୍ଗନାଙ୍କୁ ମୁକେଶ ଅମ୍ବାନୀଙ୍କ ସ୍ତ୍ରୀ ନୀତା ଅମ୍ବାନୀଙ୍କ ପକ୍ଷରୁ ୨୦୦ କୋଟି ଟଙ୍କା ଦିଆଯିବ ବୋଲି କୁହାଯାଉଛି।
ତେବେ ଏହା ସତ ନୁହେଁ। ଅମ୍ବାନୀ ପରିବାର ପକ୍ଷରୁ ଏଭଳି କିଛି କଥା କୁହାଯାଇନାହିଁ। ହେଲେ କିଛି ବ୍ୟବହାରକାରୀ ଏଭଳି ମିଥ୍ୟା ଖବର ଶେୟାର କରି ଲୋକଙ୍କୁ ଭୁଆଁ ବୁଲାଉଛନ୍ତି।
ସେ ଯାହା ହେଉନା କାହିଁକି ବିଏମ୍ସିର କାର୍ଯ୍ୟାନୁଷ୍ଠାନ ଉପରେ ଅନେକ ପ୍ରତିକ୍ରିୟା ରଖୁଛନ୍ତି। ବେଆଇନ ନିର୍ମାଣ ହୋଇଥିବାରୁ ଏପରି କରିବା ଠିକ୍ ହୋଇଛି ବୋଲି କେହି କେହି କହୁଥିବା ବେଳେ କେହି କେହି ଶିବସେନା କଙ୍ଗନାଙ୍କ ଉପରେ ରାଗ ସୁଝାଉଥିବା କହୁଛନ୍ତି। ଇତିମଧ୍ୟରେ କରଣୀ ସେନା, ରିପବ୍ଲିକ୍ ପାର୍ଟି ଅଫ୍ ଇଣ୍ଡିଆ ଭଳି ସଂଗଠନ କଙ୍ଗନାଙ୍କୁ ଭେଟି ଘଟଣାର ନିନ୍ଦା କରିଛନ୍ତି। ବିଏମ୍ସିର କାର୍ଯ୍ୟାନୁଷ୍ଠାନ ଦ୍ୱାରା ୨ କୋଟି ଟଙ୍କାର କ୍ଷୟକ୍ଷତି ହୋଇଥିବା କଙ୍ଗନା କହିଛନ୍ତି। ତାଙ୍କୁ ଉକ୍ତ ଟଙ୍କା ବିଏମ୍ସି ପ୍ରଦାନ କରୁ ବୋଲି ସେ ଦାବି ମଧ୍ୟ କରୁଛନ୍ତି।
