ମହାକାଳପଡ଼ା, ୨/୧୦(ପ୍ରତାପ ଚନ୍ଦ୍ର ସ୍ବାଇଁ):ସମୟ ବଦଳିବା ସାଙ୍ଗକୁ ପରିବାର ପରିବର୍ତ୍ତନ ଦେଖାଦେଉଛି। ଯେଉଁ ମା’ବାପା ଦିନେ ପିଲାଟିକୁ ଜନ୍ମ ଦେଇ ତା’ର ଭବିଷ୍ୟତର ଶୁଭ ଚିନ୍ତନ କରୁଥିଲେ। ସେହି ପିଲା ବଡ଼ ହେବା ପରେ ନିଜ ଜନ୍ମ କଲା ମା’ବାପାଙ୍କୁ ପର କରିଦେଲେ। ଦିନକୁ ମୁଠେ ଖାଇବାକୁ ଦେଲେ ନାହିଁ। ମା’ ବାପାମାନେ କୌଣସି ଉପାୟ ନ ପାଇ ଜୀବନରେ ଶେଷ ରାସ୍ତାକୁ ବାଛି ନୂଆ ଜୀବନ ବିତାଇବା ପାଇଁ ମହାକାଳପଡ଼ା ବ୍ଲକ ଖରିନାସୀରେ ଥିବା ସରକାରୀ ସୀକୃତିପ୍ରାପ୍ତ ବରିଷ୍ଠ ନାଗରିକ ନିବାସରେ ଥଇଥାନ ହୋଇଛନ୍ତି। ମଙ୍ଗଳବାର ବରିଷ୍ଠ ନାଗରିକ ଦିବସ ପାଳନ ଅବସରରେ କୋହ ସମ୍ଭାଳି ପାରୁ ନାହାନ୍ତି ଅଧିକାଂଶ ବୃଦ୍ଧାବୃଦ୍ଧ। ପୁଅ ବୋହୂଙ୍କ ନିର୍ଯାତନା ସହି ନ ପାରି ଘର ଛାଡ଼ିବାକୁ ପଡ଼ିଲା। ଏହି ଘର ଆମ ଶେଷ ଠିକଣା ବୋଲି ନିଜର ମନର ଭାଷା ବଖାଣିଛନ୍ତି। ଏହି ବରିଷ୍ଠ ନିବାସରେ ଜିଲା ତଥା ଜିଲା ବାହାର ବୃଦ୍ଧାବୃଦ୍ଧ ପରିବାରରେ ଅବହେଳିତ ହୋଇଥିବାରୁ ଏମାନଙ୍କୁ ଜିଲା ପ୍ରଶାସନ ପକ୍ଷରୁ ଥଇଥାନ କରାଯାଇଛି ବୋଲି କୁହାଯାଇଛି।
ଜିଲାର ବିଲ ବଳରାମପୁର ଅଞ୍ଚଳର ସୁନାକର ମହାନ୍ତି (୯୦)ଙ୍କ କହିବା କଥା ପରିଣତ ବୟସରେ ପରିବାର ମଧ୍ୟରେ କଳହ ଯୋଗୁ ଘର ଛାଡ଼ିବାକୁ ପଡ଼ିଲା। ନୂଆ ଜୀବନ ବିତାଇବା ପାଇଁ ଏଠାରେ ଭଲରେ ଅଛି ବୋଲି ସେ କହିଛନ୍ତି। ଏହି ଅବସରରେ ମଙ୍ଗଳବାର ପୂର୍ବାହ୍ନରେ ବ୍ଲକର ଜନ କଲ୍ୟାଣ ସେବା ସଂସ୍ଥା ଦ୍ୱାରା ପରିଚାଳିତ ଏହି ବରିଷ୍ଠ ନାଗରିକ ନିବାସରେ ଆନ୍ତର୍ଜାତିକ ବରିଷ୍ଠ ନାଗରିକ ଦିବସ ପାଳିତ ହୋଇଯାଇଛି। ପରେ ଆୟୋଜିତ ଏଜ ସଭାରେ ବିଶିଷ୍ଟ ଅତିଥିମାନଙ୍କ ମଧ୍ୟରେ ପୂର୍ବତନ ସେନା ଅଧିକାରୀ ତଥା ବ୍ଲକ ସାମାଜିକ ସୁରକ୍ଷା ଅଧିକାରୀ ଦୀପକ କୁମାର ପରିଡ଼ା ମୁଖ୍ୟ ଅତିଥି ଭାବେ ଯୋଗଦେଇ ପରିବେଶ ପରିବର୍ତ୍ତନ ପ୍ରଭାବରେ ପରିବାରରେ ବିବର୍ତ୍ତନ ଘଟୁଛି। ପରିବାର ମଧ୍ୟରେ ବୁଝାମଣା ଅଭାବ ଯୋଗୁ ମା’ବାପାଙ୍କୁ ଝିଅପୁଅ ମାନେ ପର କରିବାକୁ ପଛାଉ ନାହାନ୍ତି। କୌଣସି ପ୍ରକାର ପରିବାରରେ ସମସ୍ୟା ସମାଧାନ ପାଇଁ ଆମ୍ଭେ ପ୍ରୟାସ କରିବୁ ବୋଲି ପରିଡ଼ା ପରାମର୍ଶ ଦେଇଥିଲେ। ଏହି ଅନୁଷ୍ଠାନରେ ୨୫ ଜଣ ବରିଷ୍ଠ ନାଗରିକ କେନ୍ଦ୍ରାପଡ଼ା, ଜଗତ୍ସିଂହପୁର ଓ ଖୋର୍ଦ୍ଧା ଜିଲାର ରହିଛନ୍ତି। ଏଠାରେ ଜଣେ ୯୦ ବର୍ଷୀୟ ବୃଦ୍ଧଙ୍କ ଠିକଣା ମିଳୁନି। ବର୍ଷେ ପୂର୍ବେ ଜିଲା ପ୍ରଶାସନ ପକ୍ଷରୁ ଉଦ୍ଧାର କରି ଥଇଥାନ କରାଯାଇଛି ବୋଲି କହିଛନ୍ତି ପରିଚାଳକ। ସମ୍ମାନିତ ଅତିଥିମାନଙ୍କ ମଧ୍ୟରେ ଜମ୍ବୁ ପଞ୍ଚାୟତ ସରପଞ୍ଚ ବିଶ୍ୱଜିତ୍ ବସୁ ବରିଷ୍ଠ ନାଗରିକମାନଙ୍କୁ ଦୀର୍ଘାୟୁ ଜୀବନ କାମନା କରିଥିଲେ। ଅବଶିଷ୍ଟ ଜୀବନ ଅତିବାହିତ କରିବା ପାଇଁ ପରିବାର ଲୋକଙ୍କୁ ଛାଡ଼ି ଏଠାରେ ଖୁସିରେ ରହିବାକୁ ପ୍ରଭୁଙ୍କ ନିକଟରେ ପ୍ରାର୍ଥନା କରିଥିଲେ। ସଂସ୍ଥା ସମ୍ପାଦକ ପବିତ୍ର ପରିଡ଼ା କହିଛନ୍ତି, କେନ୍ଦ୍ର ସରକାର ପକ୍ଷରୁ ଗାଇଡ୍ଲାଇନ ଜାରି କରାଯାଇଛି, କୌଣସି ବୃଦ୍ଧାବୃଦ୍ଧ ପରିବାରରେ ଅବହେଳିତ ହେଲେ ସେମାନଙ୍କୁ ଆଇନ ସହାୟତା ବିନା ମୂଲ୍ୟରେ ଯୋଗାଇ ଦିଆଯିବ ବୋଲି ଉଲ୍ଲେଖ ରହିଛି। ଆବଶ୍ୟକସ୍ଥଳରେ ବୋହୂପୁଅ, ଝିଅଜ୍ବାଇଁଙ୍କୁ ଦଣ୍ଡ ମିଳିବ। ବହୁ ଉଚ୍ଚ ଶିକ୍ଷିତ ପିଲାମାନେ ମା’ବାପାଙ୍କ ସମ୍ପତ୍ତି ହାସଲ ପରେ ନିର୍ଯାତନା ଦେଇ ଘରୁ ବାହାର କରି ଦେଇଛନ୍ତି। ଉପସ୍ଥିତ ଥିବା ନିବାସ ନିର୍ଦ୍ଦେଶକ ତୁଷାରକାନ୍ତ ସାମନ୍ତରାୟ, ସଭାପତି ବିଶ୍ୱନାଥ ନାୟକ, ବିଶ୍ୱନାଥ ରାଉତରାୟ, ମନୋରଞ୍ଜନ ଜେନା, ରେବତୀ ଗାରୁ, ପୂଜାଲିନି ରାଉତଙ୍କ ସମେତ ସମସ୍ତ ବରିଷ୍ଠ ନାଗରିକ ଉପସ୍ଥିତ ଥିଲେ। ଶେଷରେ ପରିସର ମଧ୍ୟରେ ବରିଷ୍ଠ ନାଗରିକ ଓ ଅଧିକାରୀ ମାନେ ସ୍ବଚ୍ଛ ଭାରତ ଅଭିଯାନକୁ ଜୋରଦାର କରିଥିଲେ।
